Ñee nuuluʼ listu para gusiéneluʼ ni runi creluʼ la?

ÑEE huayuu biaje huayábicabe lii xiixa ni gucaa lii gusiéneluʼ ni runi creluʼ la? Biiyaʼ xi bizaaca Susana, ti badudxaapaʼ Testigu ni napa 16 iza de guidxi Paraguay. Laga nuube lu ti clase stibe ra scuela la? biree tuuxa guníʼ qué runi cré diʼ ca testigu stiʼ Jiobá ni na «Antiguo Testamento» ne qué runi crédicaʼ Jesucristu nin María. Ne stobi ni nuu raqué laaca guníʼ jma riuulaʼdxiʼ ca Testigu gati que guuyaʼ doctor laacaʼ. Xi ñuʼnuʼ pa nucaadiágaluʼ xiixa zacá yaʼ.

Susana biʼniʼ orar Jiobá ne gundísanaʼ. Peru cumu maʼ caluxe clase que ne maʼ gastiʼ tiempu la? gúdxibe maestra que pa zanda gusiénebe de cani runi crebe sti dxi. Maestra que gudxi laabe zanda, nga runi bizulube biindabe folletu ni láʼ Los testigos de Jehová: ¿quiénes son y qué creen? Biaʼ chupa semana biindabe ni para chuʼbe listu ti ganda gusiénebe cani runi crebe.

Ora bedandá dxi que la? bisiene Susana xiñee lanu testigu stiʼ Jiobá ne guniʼbe xi cabézanu guni Dios para laanu ne xi pur qué ricanu rini. Óraque gúdxibe ca compañeru stibe que pa náparucaʼ ni guinabadiidxacaʼ, ne stale de laacaʼ gundísanacaʼ. Nabé bidxagayaa maestra que Susana purtiʼ biquiiñebe cani zeeda lu Biblia para bicábibe ca xcompañérube.

Tobi de ca baʼduscuela que na dxi guyé ndaaniʼ ti Yoo stiʼ Reinu qué ñuuyaʼ nin ti bidóʼ ndaaniʼ ni. Maestra que gunabadiidxaʼ xiñee gastiʼ nin ti bidóʼ raqué. Susana biindaʼ Salmo 115:4-8 ne Éxodo 20:4. Nabé bidxagayaa maestra que ni gúdxibe laa ne guníʼ: «Yanna, xiñee ndaaniʼ yuʼduʼ stidu dxaʼ bidóʼ pa Biblia na cadi jneza diʼ nga iquiiñeʼ binni bidóʼ yaʼ».

Nabé gunabadiidxaʼ ca baʼduscuela que Susana ne bicabi laacabe, ne pur nga bindaacabe biaʼ cuarenta minutu. Ora gúdxibe laacaʼ pa zúʼyacaʼ videu ni láʼ La negativa a la sangre. La medicina acepta el reto que la? guiracaʼ guniʼcaʼ zuuyacaʼ ni. Nga runi, maestra que gudixhe sti dxi que para guiníʼrucabe diidxaʼ ne gúʼyacabe videu que. Biiyasícabe ni la? bisiene Susana laacabe xi remediu cadi né rini zanda guicaa caadxi testigu stiʼ Jiobá lugar de rini. Maestra que guníʼ: «Qué gannaʼ pa nuu stale remediu ni zanda guicá binni lugar de rini, ne qué gannaʼ pabiáʼ galán cadi guicá binni rini. Ñee para si ca Testigu ni la?». Ora binadiágabe laaca zanda guicaa guiráʼ binni ni la? guniʼbe: «Ora cheʼ ca Testigu ra nuaa sti biaje la? zanieniáʼ laacaʼ diidxaʼ».

Gande si minutu nga bidiicabe Susana para gusiene cani guníʼ ca baʼduscuela que peru bindaani chonna hora. Ti semana despué, guyuu xcaadxi baʼduscuela laaca bisiénecaʼ ni runi crecaʼ lu clase ca. Stale tu gunabadiidxaʼ laacaʼ, peru qué ñanda nicábicaʼ. Maestra que gunabadiidxaʼ laacabe: «Xiñee qué ñanda nusiénetu ni runi cretu casi biʼniʼ compañera stitu ni naca testigu stiʼ Jiobá ca pue».

Para bicabi ca baʼduscuela que laabe: «Purtiʼ laacabe dxandíʼ ruundacabe Biblia, laadu coʼ».

Maestra que biiyadxí Susana ne gúdxibe laa: «Lii huaxa ruundaluʼ Biblia ne rúniluʼ stipa pur gúniluʼ ni nani. Guizáʼ galán nga ni ruʼnuʼ ca».

Ñándaca qué niníʼ Susana gastiʼ ora guníʼ ca baʼduscuela que. Peru guníʼ íquebe jma jneza gusiénebe laacaʼ, zacá yenándabe ejemplu stiʼ dxaapahuiiniʼ israelita ni gunaazeʼ ca siriu que. Dxaapahuiiniʼ que biʼniʼ dxiiñaʼ casi esclava ralidxi Naamán, xaíque stiʼ ca soldadu de guidxi Siria. Hombre que gupa ti guendahuará ladi guizáʼ feu. Dxaapahuiiniʼ que gudxi xheelaʼ Naamán pa cheʼ Naamán ra nuu ni riguixhená stiʼ Jiobá ni nuu Samaria que la? zianda de lepra stiʼ. Dxaapahuiiniʼ que biiyaʼ naquiiñeʼ guiníʼ de Dios ni runi adorar. Ne pur ni bíʼnibe ca biʼniʼ adorar Naamán Jiobá (2 Rey. 5:3, 17).

Zaqueca nga guca Susana, biiyabe naquiiñeʼ guiniʼbe de Jiobá ne de xquidxi. Ra bisiénebe cani runi crebe que la? bisihuínnibe zinándabe ni na ca diidxaʼ riʼ: «Lausisaca Cristu ndaani ladxidóʼ to. Laguietenalaʼdxi laa nga Señor stitu. Ne lagataná para icabi tu cani racalaʼdxi ganna xii nga runi cre tu, peru laicabi laaca ne diidxa nadóʼ ne respetu» (1 Ped. 3:15). Yanna lii, ñee nuuluʼ listu para gusiéneluʼ cani runi creluʼ ora caquiiñeʼ gúniluʼ ni la?

[Dibuju/foto ni zeeda lu yaza 17]

Folletu riʼ ne videu riʼ zanda gacané lii para ganda gusiéneluʼ cani runi creluʼ