Biziideʼ gusisacaʼ xquendanabaneʼ jma

QUÉ ZIUU DXI GUIAANDAʼ NAA NI BIZAACA 16 STIʼ ABRIL 2007. Nucaacheluaʼ lu guionna pisu stiʼ yoo ngola ni láʼ Norris Hall, ra runi ti empresa láʼ Virginia Tech dxiiñaʼ (Instituto Politécnico y Universidad Estatal de Virginia, Estados Unidos). Siadóʼ que bizaaca xiixa ni bisiidiʼ naa pabiáʼ naquiiñeʼ gudiéʼ xquíxepeʼ Dios guiráʼ dxi.

Nuaa ndaaniʼ oficina stinneʼ, mayaca guiree para chaa lu guiropa pisu stiʼ yoo que para chicaa caadxi carta, ora biuu ti maestru ni gunabaʼ naa gacaniáʼ laa ne computadora stiʼ. Ante guiuʼdu ra oficina stibe, ni nuu lu guionna pisu que la? binadiágadu caree tiru lu guiropa pisu que. Biúʼ guxóʼñedu ra rúnibe dxiiñaʼ que, biséʼgudu puertaʼ ne guluʼdu seguru. Qué liica gánnadu xii ngue cayaca, peru guizáʼ cayaca dítidu tantu cadxíbidu. Xi gácaxa de laadu yaʼ. Yegucacheluaʼ ti squina nuu ndaaniʼ oficina que ne bineʼ orar Jiobá de guidubi ladxiduáʼ, para gudii stipa naa ti ganda gudxieluáʼ intiisi cosa gueeda guizaacadu.

Laga cayaca ngue la? bietenalaʼdxeʼ ti desgracia ni bizaacaʼ raca quince iza, dxi runeʼ dxiiñaʼ ti lugar ra raca chaahuiʼ carru. Ti dxi málasi gucuá guí ti botehuiiniʼ daʼ gasolina naazeʼ tobi de ca hombre cayuneniáʼ dxiiñaʼ que. Bisáʼbibe ni tantu cadxíbibe, peru biaʼsi luaʼ bidxá gasolina ndaʼ que. Guidubi luaʼ ne xpechuaʼ bizaaquiʼ guí que. Bedacaa ti helicopteru naa ne yenécabe naa ndaaniʼ ti hospital ra rié binni ni ricaguí ladi. Guyuaa raqué chonna beeu arondaʼ para gusiándacabe naa, biaʼ qué ñatesiaʼ. Gudiʼdiʼ si gaayuʼ beeu de cayacaʼ remediu maʼ biree ndaaniʼ hospital que ne bibiguetaʼ ralidxeʼ, rudiéʼ xquíxepeʼ Dios purtiʼ nabáneruaʼ. Ni bizaacaʼ que bisiidini naa gusisacaʼ cada dxi nabaneʼ. Para ca dxi que maʼ testigu stiʼ Jiobá naa. Dede dxi que gudixhe iqueʼ iquiiñeʼ guendanabani stinneʼ para guneʼ ni na Jiobá Dios biaʼ gándatiʼ, purtiʼ pur laabe nga nabaneʼ (Salmo 90:12; Isaías 43:10).

Pur ni bizaacaʼ que maʼ qué ñanda diʼ ñuneʼ dxiiñaʼ de mecánicu, ngue runi biziideʼ guneʼ chaahueʼ computadora. Despué maʼ bidxelaʼ dxiiñaʼ ra nuu empresa Virginia Tech, ngue runi nuaa ndaaniʼ yoo ni láʼ Norris Hall, siadóʼ ora biree ca tiru que.

Qué niníʼ íquedu pa xagueteʼ de ra nuudu que cazaaca ti cosa feu ni qué huayuu dxi gaca Estados Unidos. Hombre ni cabee ca tiru que biiti 32 binniʼ, de raqué biiti laca laa. Gudiʼdiʼ si gande minutu de bizulú guiráʼ ni cayaca que, binadiágadu maʼ bedandá puliciá raqué. Bicaʼdu ridxi laacabe para guleecabe laadu de raqué.

Desgracia ni bizaaca dxi que bisiidini naa ti ratuhuiiniʼ nga runiti binni xquendanabani (Santiago 4:14). Nga runi, risaca stale nga guni crenu Jiobá de guidubi ladxidoʼno, Dios ni bizáʼ laanu. Ne laaca naquiiñeʼ gusisácanu guendanabani stinu guiráʼ dxi (Salmo 23:4; 91:2).

[Paraa gucuaacabe dibuju o foto ni zeeda lu yaza 22]

AP Photo/The Roanoke Times, Alan Kim