Ni rinabadiidxaʼ cani ruundaʼ
Lu Nehemías 8:10 cayábicabe ca judíu que ca diidxaʼ riʼ: «Lagó ca cosa ni napa za», peru Levítico 3:17 na: «Cadi naquiiñeʼ goto nin ti clase za». Ximodo zanda guiénenu ni na ca textu riʼ yaʼ.
Diidxaʼ hebreu ni riquiiñeʼ para guiníʼcabe «ca cosa ni napa za» ni zeeda lu Nehemías 8:10 gadxé ni de diidxaʼ ni riquiiñecabe para guiníʼcabe «za» ni cuzeeteʼ Levítico 3:17. Lu Levítico biquiiñecabe diidxaʼ Hebreu jélev, ne diidxaʼ riʼ riquiiñeʼ ni para guzeeteʼ ni de za stiʼ maniʼ ne za stiʼ binni (Lev. 3:3; Jue. 3:22). Ca versículo ni cá ante de 17 ca rusihuínnicani cadi naquiiñeʼ gó ca israelita que za ni renda ladi doo xquiʼ ca maniʼ ni chiguzaaquicabe para Jiobá, nin za ni renda ladi riñón ne ni zeeda lu ca beela stícame (Lev. 3:14-16). Casi maʼ bidúʼyanu ca, cadi naquiiñeʼ gócabe za stiʼ ca maniʼ ni chiguzaaquicabe para Jiobá.
Peru diidxaʼ maschmanním ni zeeda lu Nehemías 8:10 ca rutiixhicabe ni casi «ca cosa ni napa za», ne diidxaʼ riʼ ti biaje si rieeteʼ ni lu Stiidxaʼ Dios ni gucuá lu diidxaʼ hebreu. Diidxaʼ riʼ zeedani de diidxaʼ schamén ni riníʼ «ni naróʼ o ni riroo ne ni rusiroo». Zándaca guiráʼ ca diidxaʼ ni zeeda de schamén riquiiñeʼ cani ora chiguzeetecabe nuu binni nazaaca ne napa stale cosa (zanda gúʼndaluʼ Isaías 25:6). Ti diidxaʼ ni jma riquiiñecabe ora guiníʼcabe schamén ca nga schémen ni rutiixhicabe casi «aceite», casi ora guiníʼcabe «aceite de oliva» (Deu. 8:8; Lev. 24:2). Casi na Nehemías 8:10 que, zándaca riquiiñeʼ diidxaʼ maschmanním ca ora maʼ cayeeteʼ de ti guendaró ni gucané ziáʼ aceite ne ni ziné beela ni qué gápapeʼ za.
Nécapeʼ cadi naquiiñeʼ gó ca israelita que za stiʼ ca maniʼ que, peru zanda gócabe guendaró nanixe. Ne ora bíʼnicabe pan bininécabe cani aceite guendaró, casi aceite de oliva ne qué ñuninécabe cani za stiʼ tuuxa maniʼ (Lev. 2:7). Nga runi ora Perspicacia para comprender las Escrituras gusiene «“ca cosa ni napa za” caniʼni de ca guendaró nanixe ni napa beela o cani runinécabe aceite guendaró ne cadi caníʼ diʼ ni de ca guendaró ni qué gapa beela o qué liica gapa aceite».
Laanu, ca xpinni Cristu, nánnanu dxiqué nga gunabaʼ Ley ni gucuaa ca israelita que cadi gocaʼ za, peru laanu maʼ qué rinándanu ni na Ley que ne maʼ qué ruzáʼquinu maniʼ para Jiobá (Rom. 3:20; 7:4, 6; 10:4; Col. 2:16, 17).