Carta ni zeeda de Irlanda

Qué nireebe gana de niyúbibe ti binni

NACHUUNDUʼ nuu dxi que, ne cumu nabé cayaba nisaguiedé lu parabrisa stiʼ carru stinneʼ la? qué ñanda ñuuyaʼ chaahueʼ ximódopeʼ lugar que. Despué de 16 kilómetru yendayaʼ lu ti dani dede ra rihuinni Westport, ti guidxihuiiniʼ stiʼ Irlanda ni nuu neza ra riaaziʼ Gubidxa. Gupa si ratu maʼ gunda bizaaniʼ Gubidxa raqué ne bihuinni guiráʼ ca islahuiiniʼ sicarú nuu guriá nisadóʼ. Neca cadi nabeza binni lu stale de ca isla que la? ca binni nuu gaxha rinecaʼ maniʼ sticaʼ lu barcu para gó guixi raqué.

Jma delante neza ra riaaziʼ Gubidxa que bihuinni xcaadxi dani ni napa jma guixi gaʼ. Ni jma bihuinni raqué nga ique ti dani láʼ Croagh Patrick, ca binni de raqué rábicaʼ ni Reek. De raqué gudiideʼ ndaaniʼ ca callehuiiniʼ stiʼ Westport ne bidiéʼ bieque dani que para chuaa ti lugar ra qué riepeʼ ca testigu stiʼ Jiobá.

Hombre ni ziyubeʼ que qué ganna diʼ pa zigannaʼ laa. Laabe bicaabe ti carta ra caniʼbe maʼ yendézabe sti lugar ne racaláʼdxibe chiganna ti Testigu laabe para gusiidiʼ laabe de Biblia. Qué gannadiáʼ stale cosa de hombre que, casi panda iza nápabe, pa maʼ bichaganabe ne xii nga ca tema jma riuuláʼdxibe... Óraque bietenaladxeʼ ziniáʼ Biblia ne caadxi revista ndaaniʼ portafolio stinneʼ. Guníʼ iqueʼ xi zanda gabeʼ laabe para chuuláʼdxibe guiziidibe jma de stiidxaʼ Reinu.

Bireesiáʼ de lu dani láʼ Reek que bihuinni stiʼ cosa. Biiyaʼ caadxi lindaa de guié ni bizáʼcabe lu siglu XIX, dxi nabé biaadxaʼ ni gó binni, ne nabé sicarú modo rihuínnicani lu ca layú nuu guriá nisadóʼ que. Ne ora gundisaluáʼ luguiáʼ que biiyaʼ canapapa ti gaviota. Jma zitu que bihuinni ximodo runiibi bi caadxi yaga zuhuaa raqué.

Nagana para guidxelaʼ binni ziyubeʼ lugar que purtiʼ qué gapa diʼ ca yoo que númeru nin ca calle que qué gápacaʼ lacaʼ. Ni gudxísicabe naa nga paneza nuu lídxibe. Nga runi, primé ca carteru stiʼ lugar que biyubeʼ, purtiʼ laa nga nanna paraa nabeza guiráʼ binni nuu raqué. Yeniáʼ media hora para bidxelaʼ ra nuu oficina stiʼ correu que, nácasini ti cuartuhuiiniʼ stiʼ ti yoo. Ora bidxiñaʼ raqué nanda ti letreru na daʼguʼ ni. Qué nireediaʼ gana, ne yenabadiidxaʼ ndaaniʼ ti tienda nuu gaxha, raqué gúdxicabe naa paneza nuu yoo que.

Despué de xhono kilómetru jma delante bidxela ladu gúdxicabe naa que, ti curva nuu ladu derechu ne luni riree ti nezahuiiniʼ zeʼ ladu bigaʼ. Bixhidxenayaʼ ti yoo nuu gaxha de raqué ne biree ti binnigola huiiniʼ. Gunaa que guyuulaʼdxiʼ gacané naa, ne gúdxibe naa dede nahuiinibe nabézabe raqué. Peru qué ñanda ñábibe naa paraa nabeza binni ni canayubeʼ que. Neca zaqué guniʼbe pur teléfono ne gúdxibe naa chuaa ndaaniʼ lídxibe.

Laga canidu que bidiéʼ cuenta nuu gunaa que ganna tu naa ne xiñee canayubeʼ hombre que. Cueʼ puerta que nuu ti bidóʼ stiʼ ti Virgen ne cá ti cuadru ngola stiʼ Cristu cueʼ yoo que. Para cadi guiníʼ íquebe gadxé cosa la? gudxeʼ laabe ziniáʼ ti noticia nabé risaca ni biseendaʼ caadxi xhamigu hombre que.

Cabídxiruʼ gunaa que pur teléfono ora beeda xheelaʼ ne bizulú cayabi naa historia stiʼ lugar que. Cumu qué nidxela gunaa que binni ni cuyubi la? gúdxibe naa cuezaʼ laga guiníʼnebe xcaadxi. Peru ruluíʼ si guirutiʼ tu ganna de hombre que ne paraa nabeza. Bidiéʼ cuenta maʼ huadxí ngue ora biiyaʼ lu reló stinneʼ. Ngue runi rabeʼ jma galán guibiguetaʼ sti biaje. Óraque bidiéʼ xquíxepeʼ guendaxheelaʼ que pur gucané naa, gudxibaʼ ndaaniʼ carru stinneʼ ne bibiguetaʼ.

Ra bibiguetaʼ sti semana que maʼ bidxelaʼ carteru que ne gúdxibe naa paneza chaa. Biaʼsi quince minutu yeniáʼ para yendayaʼ ra gúdxibe naa nuu ti neza ladu bigaʼ. Gudiideʼ ndaaniʼ neza que chupa chonna biaje peru qué nidxéladiaʼ puente de guié ni nabe que. Neca qué nidxelaʼ ni, peru bidxelaʼ dani gúdxibe naa que. Ne biaʼsi ique dani que zuba yoo ni guizáʼ bidii dxiiñaʼ naa guidxelaʼ que.

Ante guxhidxenayaʼ ra yoo que guníʼ iqueʼ xi gabeʼ binni que ora guiree. Hombre ni bixheleʼ ra yoo que gudxi naa cadi raqué diʼ ni, ne biluíʼ nabe naa stiʼ yoo nuu lade caadxi yaga. Nagueendaca bieeteʼ ra nuu yoo que ne bixhidxenayaʼ. Laga cabezaʼ biiyaʼ pabiáʼ sicarú rihuinni océano Atlántico ni nuu biaʼ chupa chonna metru de ra zuhuaa que. Cumu jma maʼ nadipaʼ nuu bi que la? jma nadipaʼ ridxelasaa ca ola que guriá nisadóʼ. Qué rihuinni guirutiʼ raqué nin ra yoo que.

De lu guionna biaje bibiguetaʼ que biree ti baʼdunguiuu raqué. Laabe gúdxibe naa sicaríʼ: «Ndiʼ nga yoo canayubuʼ ca, peru hombre que maʼ zeʼ sti lugar ne qué gannadiáʼ paraa». Ra canieniáʼ laabe que gúdxibe naa qué huayuu dxi guiníʼnebe ca Testigu. Bizeetebe guláʼnacabe ca stibe ti biaje, ne dede dxiqué riníʼ íquebe xiñee cudii Dios lugar nuu ca cosa malu ca. Biaananebe revista Torre stiʼ ni rapa ne ¡Despertad! ni jma nacubi ni caníʼ de tema que ne guyuuláʼdxibe cani.

Biblia cayabi ca xpinni Cristu cadi guireecaʼ gana de guyúbicaʼ binni ni racalaʼdxiʼ guidxiña Dios. Ne neca qué nidxelaʼ hombre ziyubeʼ que peru qué riníʼ iqueʼ pur gana si ngue guyaa. Ndaaniʼ guidxi Irlanda nuuruʼ jma binni ni racalaʼdxiʼ guiziidiʼ de Reinu stiʼ Dios casi baʼdunguiuu riʼ. Ne nannaʼ zaguu Jiobá ndaayaʼ stipa ni gúninu pur chinenu stiidxabe ra nuu binni.