3 Biiyaʼ xipeʼ nga rusiidiʼ Biblia de Jesús
«Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe.» (Juan 3:16)
XIÑEE RACA NAGANA PARA BINNI GUNI CRÉ JESÚS. Purtiʼ gadxé gadxé nga ni runi cré binni de Jesús. Caadxi binni riníʼ cadi dxandíʼ diʼ bibánibe. Xcaadxi riníʼ gúcabe ti binni casi laanu ne riníʼcabe cadi dxandíʼ diʼ biásabe de lade gueʼtuʼ.
XIMODO ZANDA GÁNNALUʼ TUPEʼ NGA GUCA JESÚS. Zanda gúniluʼ cásica biʼniʼ Natanael,a ti discípulo stiʼ Jesús. Ora gudxi Felipe xhamígube laabe maʼ bidxela Mesías o «Jesús xiiñi José de Nazaret» que la? qué ñuni crédibe ni guníʼ. Natanael gudxi laabe: «Zanda xa iree ni iquiiñe de Nazaret». Óraque gudxi Felipe laabe: «Gudáʼ guʼyuʼ». Ngue runi, guyé Natanael yeguuya pa dxandíʼ ni (Juan 1:43-51). Para gánnaluʼ tupeʼ nga guca Jesús la? caquiiñeʼ gúʼyaluʼ xi razón nuu para guni creluʼ laabe.
Cani rucaa historia riniʼcaʼ dxandíʼ bibani Jesús. Josefo ne Tácito, chupa hombre ni bicaa historia ni bibani lu primé siglu, guniʼcaʼ dxandíʼ bibani Jesús neca qué ñácacaʼ xpínnibe. Ora bicaa Tácito de dxi bigaaniʼ Nerón donda ca xpinni Cristu pur guyaʼquiʼ Roma lu iza 64 que la? bicaabe sicaríʼ: «Nerón bigaaniʼ donda ca xpinni Cristu ne biyubi castigu jma naná para laacabe, nabé gucananalaʼdxiʼ binni laacabe purtiʼ gúcacabe xpinni Cristu. Laacabe bíʼnicabe ni na Cristu, hombre biiti Poncio Pilatu dxi naca Tiberio rey».
Sicaríʼ caníʼ ti enciclopedia de cani guca lu siglu I ne II: «Ca historia riʼ rusihuinni dede ca xhenemigu Cristu guniʼcaʼ dxandíʼ bibánibe, peru guyuu caadxi binni ni bizulú guníʼ cadi dxandíʼ ni lu siglu XVIII, XIX ne ra bizulú siglu XX» (Encyclopædia Britannica, ni biree lu 2002). Ne periódico The Wall Street Journal guníʼ sicaríʼ lu iza 2002: «Stale de ca binni ni ruundaʼ de historia runi crecaʼ dxandíʼ bibani Jesús de Nazaret, chupa chonna si ni qué runi cré Dios nga riníʼ cadi dxandíʼ ni».
Xi razón nuu biasa Jesús de lade gueʼtuʼ. Guiníʼ íquenu xi bizaaca dxi gunaazecabe Jesús. Ca discípulo que bisaanacaʼ laabe, dede Pedru xhamígube guníʼ qué runibiáʼ laabe purtiʼ bidxibi (Mateo 26:31, 55, 56, 69-75). Peru guti si Jesús guca xiixa ni bicaa laacabe gucheechecabe diidxaʼ sin guidxíbicabe. Casi Pedru ne Juan, qué nidxíbicaʼ ora guníʼnecaʼ cani biiti Maestru sticaʼ. Cumu nabé nadipaʼ fe gupa ca discípulo que la? ngue runi bisiidicaʼ de Jesús guidubi naca Imperiu stiʼ Roma. Para laacabe jma risaca ngue cadi gucheenécabe ley stiʼ Dios neca guuti binni laacabe.
Xiñee bichaacabe yaʼ. Tobi de ca razón ca nga purtiʼ stale de ca discípulo que biiyacaʼ maʼ biasa Jesús de lade gueʼtuʼ. Apóstol Pablu na biásasibe de lade gueʼtuʼ «uyé be ra nuu Pedru ne laca uyé be ra nuu irá ca apóstol. Laca uyé be ra nuu jma de gaayu gayuaa hermanu tobi si lugar». Dxi bicaa Pablu ca diidxaʼ ca nabániruʼ stale de cani biiyaʼ Jesús despué de biasa lade gueʼtuʼ (1 Corintios 15:3-7). Pa ñaca chupa si binni nga niníʼ biásabe lade gueʼtuʼ la? zándaca ñaca nagana para stale binni ñuni cré ni (Lucas 24:1-11). Peru cumu 500 binni nga biiyaʼ laabe la? ngue runi biʼniʼ crécabe dxandíʼ gúcani.
XI RIBEENDÚ BINNI. Ca binni ni gapa fe Jesús ne guzuubacaʼ stiidxabe zaxá stóndacaʼ ne ziuu xquendabiaanicaʼ nayá (Marcos 2:5-12; 1 Timoteo 1:19; 1 Pedro 3:16-22). Ne pa gueeda gáticabe zanda guibánicabe sti biaje purtiʼ maʼ guníʼ Jesús zusibani laacabe «dxi iluxe guidxilayú» (Juan 6:40).
Pa riuuláʼdxiluʼ gánnaluʼ jma de laani la? biiyaʼ capítulo 4 ne 5 stiʼ libru Xipeʼ ndiʼ cusiidiʼ Biblia,b ra na «Tuu nga Jesucristu» ne «Bilanu pur rini bixhii Jesús: ni jma naroʼbaʼ bisigaʼdeʼ Dios laanu».
[Cani cá ñee yaza]
a Xcaadxi Evangeliu casi Mateo, Marcos ne Lucas ruzeetecaʼ laabe casi Bartolomé.
b Ni biʼniʼ ca testigu stiʼ Jiobá.
[Ca dibuju/foto ni zeeda lu yaza 7]
Para gánnaluʼ tupeʼ nga guca Jesús la? zanda gúniluʼ cásica biʼniʼ Natanael ne gúʼyaluʼ xi razón cusihuinni dxandíʼ ni