Cayunibiáʼ binni Jiobá ca lugar ni nuu jma zitu
NDAANIʼ guidxi Rusia nuu ti guidxi láʼ República stiʼ Tuva ne laani nuuni ladu gueteʼ stiʼ Siberia ne dxaagani Mongolia. Stale de ca binni de guidxi Tuva nabézacaʼ zitu de capital stini, ngue runi nagana para guiniʼné binni laacabe de Reinu stiʼ Dios. Peru cadi tan xadxí, stale binni de ca guidxihuiiniʼ que guyecaʼ ti seminariu ndaaniʼ guidxi Kyzyl, capital stiʼ Tuva. Ti precursora ni láʼ María, gunna chigueeda ca binni que xquidxi, ne guníʼ ique raqué si nga zanda guiniʼné ca binni que de stiidxaʼ Dios.
María guníʼ xi bizaaca: «Naa rusiideʼ ndaaniʼ ti scuela, ne raqué gudíxhecabe gaca ti seminariu ra gueeda caadxi binni para guiniʼcaʼ de ca viciu napa binni. Gudíxhecabe cheʼ biaʼ cincuenta binni de ca lugar ni nuu jma zitu stiʼ guidxi Tuva. Lade cani biʼniʼ invitárcabe que nuu maestru, psicólogo, cani ruuyaʼ chuʼ cani nahuiiniʼ nazaaca ne xcaadxi binni». María biiyaʼ galán guiniʼné ca binni que de stiidxaʼ Dios, peru nuu xiixa ni cucueeza laabe gúnibe ni. Laabe guniʼbe: «Ridxibeʼ ne raca nagana para naa guinieniáʼ binni de stiidxaʼ Dios ora tiica si. Peru gunabaʼ Jiobá gacané naa gacaʼ nadxibalú para cadi guidxibeʼ ora guinieniáʼ ca binni que de Stiidxabe». Xi guleendube yaʼ.
Laabe guníʼrube: «Bidxelaʼ ti revista ¡Despertad! ni cuzeeteʼ de guiráʼ ca dxiibi rapa binni ne guníʼ iqueʼ: “Tema riʼ zándaca chuulaʼdxiʼ tuuxa psicólogo ni”, ngue runi yeniáʼ revista que ra scuela. Dxi que guyé tobi de ca maestra ni guca invitar que ra oficina stinneʼ ne bidieeʼ laabe revista que. Guyuuláʼdxibe ni ne gucuaabe ni. Ne bizeetebe laapebe nápabe ti dxiibi. Sti dxi que yeniáʼ ti libru ni láʼ Lo que los jóvenes preguntan. Respuestas prácticas (volumen 1) ne laaca gucuaabe ni. Cumu guyuuláʼdxibe libru ne revista bidieeʼ laabe que la? bicaani naa guiníʼ iqueʼ zándaca ziuulaʼdxiʼ xcaadxi maestru que cani. Ngue runi yeniáʼ ra cayaca seminariu que ti caja libru Los jóvenes preguntan ne xcaadxi libru ne revista». Nin qué nidaa birá cani. María guníʼ: «Stale de cani runiné maestra gunieniáʼ que dxiiñaʼ guyecaʼ ra oficina stinneʼ ne gunabadiidxacaʼ naa: “Paraa cudiicabe ca libru ca”». ¡Biáʼsipeʼ jneza ngue bíʼnicabe guyécabe ra nuaaʼ!
Seminariu que bilúxeni ti sábadu. Cumu qué runi María dxiiñaʼ dxi que la? bisaanabe caadxi libru ne revista lu caadxi mexaʼ ni nuu ra oficina stibe ne bicaabe ca diidxaʼ riʼ lu ti pizarrón: «Para ca Maestru: zanda chinetu libru ne revista para laatu ne para cani runibiaʼtu. Zacanécani laatu lu xhiiñatu ne guibaninetu binnilídxitu jma galán». Xi guca despué yaʼ. Laabe nabe: «Gudideʼ ra oficina stinneʼ dxi que ne biiyaʼ mayaca guirá ca libru ne ca revista que. Ngue runi yeyubeʼ jma libru ne revista». Biaʼsi dxi biluxe seminariu que, gudiiziʼ María 380 revista, 173 libru ne 34 folletu. Ca binni guyé raqué yenecaʼ ca libru ne ca revista que de ra zeedacaʼ. Sicaríʼ biluxe guníʼ María: «Nuaaʼ nayecheʼ purtiʼ cayunibiáʼ binni Jiobá ca lugar ni nuu jma zitu stiʼ guidxi Tuva» (Ecl. 11:6).
[Mapa ni zeeda lu yaza 32]
RUSIA
REPÚBLICA STIʼ TUVA