«Caquiiñeʼ gueeʼ sti tragu»

ALBERTO bizulú güeʼ nisa dxuʼniʼ dxi napa 11 iza.a Laabe ne ca xhamígube riécabe ndaaniʼ guiʼxhiʼ ne riguítecabe casi ora ñácacabe ca binni nadxibalú riree lu ca película ca. Ca binni riʼ cadi dxandíʼ diʼ nácacaʼ casi modo rireecaʼ lu ca película que, peru nisa dxuʼniʼ reʼ Alberto ne ca xhamigu que dxandíʼ ruxhúdxini laacaʼ.

Peru Tony bizulú güeʼ jma ziáʼ nisa dxuʼniʼ dxi maʼ napa 40 iza. Primé que la? reʼbe tobi o chupa copa guiráʼ gueelaʼ, de raqué maʼ gúcani gaayuʼ o xhoopaʼ, ne ra gudiʼdiʼ tiempu maʼ qué liica ñánnabe panda reʼbe ti dxi.

Alberto biyubi ximodo gusaana de xhudxi, peru Tony qué niná nucaadiaga ca conseju bidii ca binnilidxi ne ca xhamigu laa. Xi bizaacacabe despué yaʼ. Alberto nabániruʼ para guiníʼ ximodo bisaana viciu que, peru Tony guti raca chupa chonna iza dxi bidxelasaané carru stiʼ purtiʼ naxudxi ora zigusá ni.

Nuu tu riníʼ ique qué runiná guirutiʼ ora rixudxi, peru cadi zacá diʼ ni. Ora réʼcabe ziáʼ la? laaca runinácabe ca binni nuu gaxha de laacabe, ne stale biaje nabé naroʼbaʼ ca yuubaʼ redaneni.b Stale biaje, ora maʼ güeʼ tuuxa ziáʼ nisa dxuʼniʼ la? riníʼ mal de sti binni, runiná ne rucaalú binni, ruuti, nuu tiru dede rizaaca binni ca xiixa desgracia ne xcarru o ra dxiiñaʼ ne laaca rapa stale guendahuará. Cada iza runiti binni stale millón de dólar pur guiráʼ ca desgracia ni runi ca binni ni rixudxi ca, ne laaca runinani ne riguuni laacabe triste ne ca binnilídxicabe.

Neca zacá, ca Instituto Nacional de la Salud, ni nuu Estados Unidos cusiene: «Cadi guiráʼ diʼ binni ni reʼ gatigá nga zanda guininu maʼ napa viciu de xhudxi, ne cadi guiráʼ diʼ ni napa viciu ca reʼ guiráʼ dxi». Stale tu qué reeda gapa viciu ca, peru maʼ reʼ xhaataʼ ne qué rudii cuenta pa maʼ ziáʼ güeʼ. Xcaadxi nuusi tiru reʼcaʼ, peru ora guecaʼ la? reʼcaʼ jma de gaayuʼ copa.

Yanna, ximodo zanda gánnaluʼ pa maʼ ziáʼ reʼluʼ yaʼ. Ne ximodo zanda gánnaluʼ pora nga maʼ cadi naquiiñeʼ gueluʼ ninruʼ sti tragu (Proverbios 23:29, 30, 35, La Palabra de Dios para Todos). Xhupa tema ni zeeda ca cacabi cani gunabadiidxanu riʼ.

[Cani cá ñee yaza]