Cani bisiidiʼ Jesús de Reinu stiʼ Dios

«Canazá [Jesús] guidxi roʼ ne guidxi huiiniʼ, canayuíʼ né binni modo runi mandar Dios [o «de reinu stiʼ Dios», NM].» (LUCAS 8:1)

TI BIAJE guníʼ Jesús: «De ndaani ladxidoʼ [binni] nga riree diidxa ni riníʼ» (Mateo 12:34). Dxandíʼ ni na ca diidxaʼ ca, purtiʼ ora nabé risaca ti cosa para laanu la? riuuláʼdxinu guininu de laani. Nga runi, pur cani bisiidiʼ Jesús dxi bicheeche diidxaʼ, rudiʼnu cuenta nabé bisaca Reinu stiʼ Dios para laabe.

Xii nga Reinu stiʼ Dios Laani nga ti gobiernu ni napa Dios guibáʼ ne nápani ti rey. Cumu jma de ti gayuaa chii biaje rieeteʼ de gobiernu riʼ lu guidapaʼ Evangeliu ca la? nga rusihuinni de laani nga ni jma guníʼ Jesús. Ximodo zanda guizíʼdinu jma de Reinu riʼ ne cani chigúnini para laanu yaʼ. Ora guizíʼdinu xi biʼniʼ Jesús ne xi guníʼ.

Tuu nga rey lu Reinu stiʼ Dios Cadi binni diʼ nga ribí tu gaca rey lu Reinu riʼ, sínuque Dios nga maʼ gulí tu gaca rey. Ne Jesús guníʼ maʼ gulí Dios laa para puestu ca.

Jesús maca nanna ruzeeteʼ Biblia de Mesías ni chiguni mandar lu ti reinu ni qué zanitilú (2 Samuel 7:12-14; Daniel 7:13, 14; Mateo 26:63, 64). Ngue runi, ora guníʼ Jesús laa nga Mesías que la? bisihuínnibe laabe nga Rey ni gulí Dios (Juan 4:25, 26). Nga runi, stale biaje biquiiñebe diidxaʼ «reinu stinneʼ» (Juan 18:36, NM).

Jesús laaca guníʼ de caadxi binni ni zuni mandarné laa (Lucas 22:28-30). Cumu maca nexheʼ panda nga ca binni riʼ la? ngue runi guníʼ Jesús nácacabe casi ti «grupu huiiniʼ de dendxuʼ». Ne óraque gúdxibe laacaʼ: «Bixhózetu na gudii laatu reinu stiʼ» (Lucas 12:32, NM). Lu últimu libru stiʼ Biblia na biaʼsi 144,000 binni nga bibí para dxiiñaʼ risaca riʼ (Apocalipsis 5:9, 10; 14:1).

Paraa nuu Reinu ca Dxi caniʼné Jesús Poncio Pilatu, gobernador stiʼ Roma, gúdxibe laa: «Cadi de guidxilayú riʼ diʼ nga reinu stinneʼ» (Juan 18:36, NM). Nga runi, qué zaquiiñeʼ diʼ Reinu stiʼ Dios gobiernu stiʼ binni guidxilayú para guni mandar. Rihuínnica ziuu gobiernu ca guibáʼ, purtiʼ stale biaje guníʼ Jesús de laani casi «reinu ni nuu guibáʼ» (Mateo 4:17; 5:3, 10, 19, 20, NM).a

Jesús maca nanna zabiguetaʼ guibáʼ ora maʼ biluxe dxiiñaʼ stiʼ ndaaniʼ Guidxilayú riʼ. Ora maʼ nuube guibáʼ zuni chaahuibe ti lugar para ca xpínnibe ni bibí, ti ganda chúʼnecaʼ laabe raqué (Juan 14:2, 3).

Xi chiguni Reinu riʼ Ora cusiidiʼ Jesús ca discípulo stiʼ guni orarcaʼ la? guniʼbe: «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mateo 6:9, 10, NM). Maʼ cayaca ni na Dios guibáʼ, ne Reinu ca nga ni zaquiiñebe para gaca ni nabe ndaaniʼ Guidxilayú riʼ. Peru naquiiñeʼ guidxaa stale cosa lu Guidxilayú para gaca ni.

Xi chiguni Reinu ca ndaaniʼ Guidxilayú Jesús guníʼ zunitilú Reinu stiʼ Dios guiráʼ cosa malu nuu yanna. Ximodo yaʼ. Ora cueeni guiráʼ ca binni malu nuu ndaaniʼ Guidxilayú riʼ (Mateo 25:31-34, 46). Zacá nga zanitilú guiráʼ guendaquéiquiiñeʼ nuu yanna ne guiráʼ ni cadi jneza cayaca ca dxi riʼ tobi si tiru. Ne casi guníʼ Jesús, lu Guidxilayú riʼ ziuu puru si binni «ni nadóʼ», ni runi ni jneza, ni riá binni, «ni nayá ladxidóʼ» ne ni qué ridinde (Mateo 5:5-9).

Laaca zabani guiráʼ ca binni ca ndaaniʼ ti lugar sicarú, ne qué ziuu diʼ gastiʼ ni guni biidiʼ o guni yuudxuʼ ni, purtiʼ guníʼ Jesús zuchaa Reinu stiʼ Dios Guidxilayú riʼ. Hombre ni gucuá cueʼ Jesús dxi cayuuticabe laa que guníʼ sicaríʼ: «Bietenalaʼdxiʼ naa ora guiuuluʼ lu reinu stiluʼ». Óraque gudxi Jesús laabe: «Dxandipeʼ cayabeʼ lii yannadxí: Ziuuneluʼ naa ndaaniʼ Paraísu» (Lucas 23:42, 43, NM). Ni guníʼ Jesús ca rusihuínnini Reinu stiʼ Dios nga chiguni Guidxilayú riʼ ti paraísu cásica jardín ni guyuu Edén que.

Xiruʼ zuni Reinu ca para binni Jesús qué niníʼ si xi guiráʼ chiguni Reinu stiʼ Dios, sínuque laaca bisihuínnibe xi chiguni Reinu ca. Bíʼnibe milagru para bisiándabe stale binni, laacani nga caadxi de ca cosa ni bisihuinni xi guiráʼ zúnibe ora maʼ guni mandarbe casi Rey. Mateo bicaa lu Biblia xi guiráʼ bíʼnibe: «Uzá Jesús irá guidxi sti Galilea, bisidi ndaani ca yuʼdu sti ca judíu, ne byuiʼ né laacabe [de reinu]. Ne irá ra uyé be bisianda be irá enda huará ne irá yuuba sti ca binni que» (Mateo 4:23).

Jesús bisianda guiráʼ clase guendahuará. Ti biaje bisiándabe ti binni nacheepaʼ lú de gule (Juan 9:1-7, 32, 33). Sti biaje la? gudixhenabe luguiáʼ ti hombre ni gupa ti guendahuará malu láʼ lepra, ne oraqueca bianda (Marcos 1:40-42). Ne ora «bedané cabe ti hombre nacuaata diaga ne napaapa ruaa ra nuu be» la? bisihuínnibe zanda «[gu]xhele be diaga cani nacuaata diaga ne [gu]siníʼ chaahui be cani napaapa ruaa» (Marcos 7:31-37).

Laaca bisihuinni Rey gulí Dios riʼ napa poder para gusibani gueʼtuʼ. Biblia ruzeeteʼ bisibani Jesús chonna binni ni maʼ guti. Laacabe nga: tobi lucha xiiñiʼ ti viuda, ti dxaapahuiiniʼ de 12 iza ne Lázaro, ti hombre nabé guca xhamígube (Lucas 7:11-15; 8:41-55; Juan 11:38-44).

Jesús gudxi apóstol Juan ximodo zabani ca binni ni chiguni mandar Reinu stiʼ Dios laacaʼ. Guniʼbe: «Biiyaʼ, ma nabeza Dios lade binni. Laape be zabeza né be laacaʼ. Zaca ca xpinni be, ne laabe zaca be Dios sticaʼ. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 1:1; 21:3, 4). Cadi dxandíʼ guizáʼ galán nga guiníʼ íquenu ziuu ti guidxilayú ra qué zacananu, ra qué ziuu yuubaʼ nin guendaguti la? Ora guidxiña dxi ca, zaca guiráʼ ni rinábanu lu oración que: zaca ni na Dios ndaaniʼ Guidxilayú cásica rácani guibáʼ.

Padxí gueeda ni Jesús guníʼ zuzulú zuni mandar ora guidxiña tiempu maʼ chuʼbe lade binni. Padxí guzulú tiempu ca yaʼ. Laabe guniʼbe xi guiráʼ zahuinni ora guedandá tiempu ca: zaca stale cosa ni zuniná binni, casi guerra, ziaadxaʼ ni gó binni, zaca xu, ziuu stale guendahuará ne laaca ziuu stale binni ni zuni guendaquéiquiiñeʼ (Mateo 24:3, 7-12; Lucas 21:10, 11). Cani bizéʼtenu ca ne xcaadxi ni guníʼ Jesús jma cayácani dede 1914, iza guca primé Guendaridinde roʼ lu guidubi naca Guidxilayú. Xi cayabi nga laanu yaʼ. Cayábini laanu maʼ naca Jesús Rey guibáʼ. Nga runi, maʼ cadi candaa diʼ para gueeda Reinu ca ne gaca ni na Dios ndaaniʼ Guidxilayú riʼ.b

Yanna, ñee zanda guicaaluʼ ca ndaayaʼ ni guedané Reinu stiʼ Dios ca la? Zanda guicaaluʼ cani pa gúniluʼ guiráʼ cani bisiidiʼ Jesús.

[Cani cá ñee yaza]