Zinebe guiráʼ dxiiñaʼ bíʼnibe
THEODORE JARACZ, ni guyuu lade Grupu ni Zaniruʼ stiʼ ca Testigu stiʼ Jiobá, bilúxebe guendanabani stibe ndaaniʼ Guidxilayú riʼ miércoles 9 stiʼ junio 2010 dxi nápabe 84 iza. Nabani xheelabe Melita, ni bibaninebe dede bichaganabe raca cincuenta y tres iza, ne laaca nabani ti bizáʼnabe, ti sobrínube ne chupa sobrínabe.
Jaracz gule 28 stiʼ septiembre iza 1925 guidxi County (Kentucky, Estados Unidos). Lu chii stiʼ agosto de iza 1941, dxi nápabe 15 iza, guyuunísabe para gudiibe laabe Jiobá. Bizulube de precursor regular dxi nápabe 17 iza, dxi ca nga casi ñaca nuzulube ti carrera lu xhiiñaʼ Dios ni bindaa sesenta y siete iza.
Lu iza 1946, dxi nacubi bisaabe 20 iza, guyebe Scuela stiʼ Galaad stiʼ Watchtower. Biluxe si scuela que, biseendacabe laabe casi binnigola ni riganna ca binni ridagulisaa Cleveland (Ohio, Estados Unidos). Lu iza 1951 biseendacabe laabe chigúnibe dxiiñaʼ Betel ni nuu Australia, ne gúcabe tuuxa ni biiyaʼ dxiiñaʼ gaca guidxi que. Lu Anuario de los testigos de Jehová para 1983 na «nabé guluube gana guiráʼ ca xpinni Cristu de guidxi que purtiʼ riuuláʼdxibe gúnibe dxiiñaʼ modo na xquidxi Jiobá ne purtiʼ galán modo gudíxhebe guireeche diidxaʼ».
Dxi bibiguétabe Estados Unidos, bichaganabe Melita Lasko 10 stiʼ diciembre iza 1956. Dxi nacubi bichaganabe gúcabe binnigola ni riganna ca binni ridagulisaa, ne gucanebe stale neza binni ridagulisaa de guidxi que. Ra ziluxe iza 1974 guca invitarbe para chuʼbe lade Grupu ni Zaniruʼ.
Nabé xadxí zietenaláʼdxicabe Jaracz purtiʼ nabé gudixhe íquebe gúnibe xhiiñaʼ Jiobá né stale gana. Nabé gunnaxhiibe xheelabe ne gúcabe ti binni nachaʼhuiʼ, ne jma gucuá íquebe gacanebe sti binni que gúnibe ni riuuláʼdxibe (1 Cor. 13:4, 5). Bihuinni dxandíʼ rizaaláʼdxibe sti binni purtiʼ qué ñúnibe menu guirutiʼ ne bilaseláʼdxibe laacaʼ. Ne cumu nabé nadxiibe binni la? bicaa ngue laabe gucheechebe diidxaʼ né stale gana.
Riuʼnu triste purtiʼ maʼ qué guinni ti hombre ni nabé runi dxiiñaʼ. Nabé gunnaxhiicabe laabe Betel ne laaca nabé gunnaxhii guiráʼ ca xpinni Cristu ni nuu lu guidubi Guidxilayú laabe. Neca maʼ qué guínnibe lu Guidxilayú riʼ, ridxá tipa ladxidoʼno ora guietenaláʼdxinu modo bíʼnibe xhiiñaʼ Jiobá pur stale iza. Zanda guininu qué nixélebe de Dios dede dxi gútibe ne maʼ gucuaabe «enda nabani casi ti premiu». Ne nanna dxíchinu zinebe «irá dxiiñaʼ» bíʼnibe (Apo. 14:13).