Xiñee rilaa cani

«Beeda caadxi fariseu ra nuu [Jesús], cuyubi ca modo usaba ca laabe pur ni iníʼ be. Para na ca rabi ca laabe: Ñee nouʼ jneza ilaa né cabe xheela cabe pur intiica cosa la?» (Mateo 19:3)

ÑEE zanda cueza ti guendaxheelaʼ juntu biaʼ dxi guibánicaʼ la? Ora gunabadiidxacabe Jesús pa zanda gaca divorciar binni pur intiica si cosa, laabe bisiénebe laacaʼ naquiiñeʼ guindaa xquendaxheelaʼ binni biaʼ dxi guibani ne guniʼbe: «Qué xa huayuunda tu ra cá xi biʼni Dios dxi bizulú bizáʼ binni. Bizáʼ be hombre ne gunaa, ne na be: ʼʼPur nga runi zusaana hombre bixhoze ne jñaa, ne zadxaaga xheela ne zaca ca tobi si.ʼʼ Ne zacá ma cadi chupa cabe sínuque tobi si laacabe. Pur nga runi ni ma bichaaga Dios la? ma cadi indaa binni guidxilayú» (Mateo 19:4-6).a Rihuinni dxíchica racalaʼdxiʼ Dios guindaa ca guendaxheelaʼ ca.

Neca zacá, ndaaniʼ stale lugar, de cada ti gayuaa guendaxheelaʼ raca divorciar jma de cuarenta. Ñee riníʼ nga maʼ qué zanda gacané ca conseju rudii Biblia ca guendaxheelaʼ ca yanna la? Ñee dxandíʼ nga cadi jneza runi binni richaganáʼ la?

Quíxenu ti ejemplu. Guxuíʼlunu chupa guendaxheelaʼ, cada tobi de laacaʼ guziʼcaʼ ti carru de ti modelu si. Ti guendaxheelaʼ que nabé riuucaʼ cuidadu ora gusacaʼ xcárrucaʼ ne nabé rápacaʼ ni, nga runi nuuni galán. Yanna, xi runi sti guendaxheelaʼ que yaʼ. Laacaʼ qué liica riuucaʼ cuidadu para gusacaʼ xcárrucaʼ ne qué rizaaláʼdxicaʼ gápacaʼ ni. Ne cumu qué ñápacabe ni la? biuxe ni ne maʼ qué ñanda niquiiñecabe ni. Xi pur guca feu xcarru ca binni riʼ yaʼ. Ñee zaninu carru que nga qué niree galán la? Coʼ xa. Rihuinni dxíchica ca xpixuaanaʼ carru ca nga qué ñápacaʼ ni.

Zacaca rizaaca né ca guendaxheelaʼ ca, cadi purtiʼ si ribiá stale de laacani nga guininu cadi jneza runi binni richaganáʼ. Ne rihuinni zacá ni purtiʼ millón de guendaxheelaʼ nabánicaʼ nayecheʼ ne cadi guirá si dxi cusabixheelacaʼ ne nga racané guibani xcaadxi binni galán. Zanda guininu zeeda gaca guendaxheelaʼ ca casi ti carru: para ganda guindaani ne chuʼ ni galán la? caquiiñeʼ gápacabe ni.

Xi zanda gacané xquendaxheelaluʼ pa nacubi bichaganaluʼ o pa maʼ zineluʼ iza de bichaganaluʼ yaʼ. Lu Biblia zeeda stale conseju ni racané ca guendaxheelaʼ ca para cadi gusaana de chuʼcaʼ tobi si ne chuʼ xquendaxheelacaʼ naguidxi. Ñee riuuláʼdxiluʼ gánnaluʼ chupa chonna de laacani la? Pa zacá ni, rinábadu lii gúʼndaluʼ stiʼ tema ca.

[Ni cá ñee yaza]