Cani ruundaʼ revista riʼ racaláʼdxicaʼ gánnacaʼ
Ñee nuu ti raza jma risaca para Dios la?
▪ Coʼ, purtiʼ Biblia na: «Biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35).
Rihuinni dxíchica qué zanda diʼ ugaanda modo riníʼ ique binni guidxilayú né modo riníʼ ique Dios ni bizáʼ laanu. Stale binni riníʼ ique nuu ti raza jma risaca que xcaadxi, ne raza stícabe nga laani. Modo riníʼ ique ca binni riʼ, zacaca nga guníʼ ique Charles Darwin, laa bicaa: «Lu ca iza ni zeeda, [...] ca raza jma nuu xpiaaniʼ casi zusiracaʼ ca raza ni huaxiéʼ nanna, ne ziuucaʼ lugar stícani». Triste guininu ni, peru ca binni ni riníʼ ique jma risaca raza stiʼ nabé huayuninacaʼ stale binni.
Peru ñee jneza nga guiníʼ ique binni jma risaca raza stiʼ la? Ñee maʼ bisihuinni ciencia nuu raza napa gen jma risaca la? Coʼ, cadi zaca diʼ ni. Bryan Sykes, ti hombre ni biindaʼ de ca gen stiʼ binni ne naca maestru ndaaniʼ Universidad stiʼ Oxford, guníʼ sicaríʼ: «Gastiʼ xiixa ni gusihuinni pa dxandíʼ nuu gen jma risaca que xcaadxi. [...] Gatigá rinabadiidxacabe naa pa nuu ti ADN griegu o ti gen italiano, ne dxandipeʼ la? gastiʼ diʼ. [...] Guiranu tobi si modo nácanu».
Cásica guníʼ hombre riʼ zacaca rusiidiʼ Biblia. Laani rusiidini ti hombre si ne ti gunaa si bizáʼ Dios ne guiranu zanu de laacabe (Génesis 3:20; Hechos 17:26). Nga runi, nezalú Dios ti raza si nuu ne laani nga raza stiʼ binni.
Jiobá qué ruuyaʼ diʼ color stiʼ binni, nin ximodo rihuinni lúcabe, sínuque ruuyabe xi nuu ndaaniʼ ladxidoʼno ne nga nga ti cosa jma risaca para laabe. Ne laapebe guniʼbe: «Binni ruuyaʼ ni rihuinni si; peru naa ruuyaʼ ladxidóʼ binni» (1 Samuel 16:7, Nueva Biblia al Día). Ora gánnanu ndiʼ la? riguixhedxini ladxidoʼno. Guidúʼyanu xiñee.
Zándaca stale de laanu qué riuuláʼdxinu modo rihuínninu, neca gadxé gadxé raza laanu. Ne dxandipeʼ la? qué zanda diʼ gúninu stale cosa para guchaʼnu modo rihuínninu. Peru ni zanda guchaʼnu nga modo riníʼ íquenu ne cani nuu ndaaniʼ ladxidoʼno, ne nga nga ni jma naquiiñeʼ gúninu (Colosenses 3:9-11). Ora guʼyaʼ chaahuinu ximodo nuunu la? zudiʼnu cuenta pa rudxíʼbanu laca laanu o pa runi sentirnu jma risaca xcaadxi raza que raza stinu. Cumu cadi zacá diʼ nga riníʼ ique Dios la? naquiiñeʼ gúninu stipa pur cueenu cani de ndaaniʼ ladxidoʼno (Salmo 139:23, 24).
Jiobá zacané laanu pa gúninu stipa pur guiníʼ íquenu casi riníʼ ique. Biblia na: «[Jiobá] cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Crónicas 16:9). ¡Pabiáʼ galán nga gánnanu zaca ni na ca diidxaʼ riʼ, neca gadxé gadxé raza laanu!