Xi caquiiñeʼ guiziidicabe

«Irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios.» (2 TIMOTEO 3:16)

CA XIIÑIʼ binni caquiiñeʼ gánnacaʼ ni dxandíʼ de Dios. Paraa zanda guiziidicabe ni yaʼ. Zanda guiziidicabe ni lu ti libru ni jma runi respetar ca binni ni napa religión, ne laani nga Biblia.

Biblia zeeda gaca casi ti carta ni bicaa Dios ra nuunu, luni rusihuínnibe ximodo laabe ne laaca zeeda ximodo zanda guibani guiráʼ xiiñibe nayá, cásica cani nahuiiniʼ zaqueca cani huaniisi. Chiguzéʼtenu caadxi textu stiʼ Biblia ne xi rusiidicani binni dede né cani nahuiiniʼ.

Xi racalaʼdxiʼ Dios gánnanu de laa

◼ Ni rusiidiʼ Biblia: «Ti ganna binni, lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú» (Salmo 83:18).

Ni rizíʼdinu de laani: Dios cadi naca diʼ ti stipa ni qué rihuinni, sínuque nácabe tuuxa ni nabani ne napa ti lá ne laasibe labe zacá.

◼ Ni rusiidiʼ Biblia: «Jiobá cayuuyaʼ ximodo nuu ladxidóʼ guiráʼ binni ne cayuuyabe pa jneza nuu guiráʼ ni riníʼ ique binni ne ni racalaʼdxiʼ. Pa guyúbiluʼ laabe la? laabe zudiibe lugar guidxélaluʼ laabe» (1 Crónicas 28:9).

Ni rizíʼdinu de laani: Jiobá rizaalaʼdxiʼ guiranu ne qué rusiaandabe cani jma nahuiiniʼ (Salmo 10:14; 146:9). Laabe racaláʼdxibe gunibiaʼnu laabe.

◼ Ni rusiidiʼ Biblia: «Cadi naquiiñeʼ guninatu [...] ti hombrehuiiniʼ ni maʼ guti bixhoze. Pa guninaluʼ laabe ne [...] gucaabe ridxi naa la? dxandipeʼ zucaadiagaʼ laabe» (Éxodo 22:22-24).

Ni rizíʼdinu de laani: Jiobá rucaadiaga oración stiʼ guiráʼ binni, dede né oración ni runi cani jma nahuiiniʼ. Zanda gábinu laabe cani riníʼ íquenu ne cani runi sentirnu.

◼ Ni rusiidiʼ Biblia: «Qué nusaanacabe de nucheenécabe Dios, ne bisiuubacabe ladxidóʼ Dios ni nayá stiʼ Israel» (Salmo 78:41).

Ni rizíʼdinu de laani: Zanda gusiéchenu Jiobá o cuʼnu triste laabe pur ni guininu ne ni gúninu, nga runi naquiiñeʼ guiníʼ íquenu ante guininu ne ante gúninu xiixa.

Ximodo naquiiñeʼ gúʼyanu ca binni de sti guidxi.

◼ Ni rusiidiʼ Biblia: «Biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35).

Ni rizíʼdinu de laani: Pa Dios runi xiiñiʼ guiráʼ clase binni la? laanu laaca cadi naquiiñeʼ gúninu menu ca binni de gadxé color o cani rihuinni lú gadxé.

◼ Ni rusiidiʼ Biblia: «Lagataná para icabi tu cani racalaʼdxi ganna xii nga runi cre tu, peru laicabi laaca ne diidxa nadóʼ ne respetu» (1 Pedro 3:15).

Ni rizíʼdinu de laani: Naquiiñeʼ guininu de cani runi crenu sin guidxíbinu, peru naquiiñeʼ guyúbinu modo gúninu ni. Laaca naquiiñeʼ guni respetarnu ca binni ni qué runi cré cani runi crenu.

[Dibuju/foto ni zeeda lu yaza 5]

Ximodo naquiiñeʼ gaca xpiaʼnu né xcaadxi binnilídxinu.

◼ Ni rusiidiʼ Biblia: «Baʼdu caʼ, lauzuuba stiidxa bixhoze tu ne jñaa tu de iráʼ, purti nga nga riulaʼdxi Señor» (Colosenses 3:20).

Ni rizíʼdinu de laani: Ca xiiñiʼ binni ni ruzuubaʼ diidxaʼ cadi rusihuínnisicaʼ nadxiicaʼ bixhózecaʼ ne jñaacaʼ, sínuque laaca rusihuínnicaʼ racaláʼdxicaʼ gusiéchecaʼ ladxidóʼ Dios.

◼ Ni rusiidiʼ Biblia: «Cadi ixhacalaʼdxi saa tu, ne laguni perdonar ni guni stobi laatu. Casi bini perdonar Cristu laatu, zacaca laguni» (Colosenses 3:13).

Ni rizíʼdinu de laani: Ziuu biaje zuniná ca binnilídxinu laanu ne xcaadxi binni. Peru pa racaláʼdxinu gutiidilaʼdxiʼ Dios stóndanu la? naquiiñeʼ guizíʼdinu gutiidiláʼdxinu stonda binni (Mateo 6:14, 15).

Xiñee cadi naquiiñeʼ gusiguiinu ne xiñee naquiiñeʼ gácanu nachaʼhuiʼ.

◼ Ni rusiidiʼ Biblia: «Lausaana de usiguii tu, ne ora güi tu diidxa lainíʼ ni dxandíʼ» (Efesios 4:25).

Ni rizíʼdinu de laani: Ora guininu ni dxandíʼ, rúninu cásica runi Dios ne rusiéchenu ladxidoʼbe. Peru pa guiaʼnu gusiguiinu la? zácanu casi Binidxabaʼ, xhenemigu Dios, purtiʼ laa nga «bixhoze gola enda rusiguii» (Juan 8:44; Tito 1:2).

◼ Ni rusiidiʼ Biblia: «Irá ni racalaʼdxi tu guni binni laatu la? ngue ca laguni laacaʼ» (Mateo 7:12).

Ni rizíʼdinu de laani: Caquiiñeʼ gánnanu xi runi sentir ca binnilídxinu, xi riníʼ íquecaʼ ne xi caquiiñecaʼ ne zaqueca ca binni ni nuu gaxha de laanu. Pa gúninu stipa pur guiénenu laacabe ne gácanu nachaʼhuiʼ né laacabe la? zándaca jma nagueenda gácacabe nachaʼhuiʼ ne laanu (1 Pedro 3:8; Lucas 6:38).

Casi maʼ bidúʼyanu lu ca textu riʼ, zeeda stale conseju lu Biblia ni zanda gacané ca xcuidi huiiniʼ ora maʼ guiniisicaʼ, casi gápacaʼ respetu binni ne guiénecaʼ laacabe. Peru tu laa naquiiñeʼ gusiidiʼ laacabe yaʼ.