Ni rinabadiidxaʼ cani ruundaʼ

Ximodo naquiiñeʼ guiénenu ra cá pabiáʼ dxiiñaʼ guca lu guidubi ti iza.

Tobi de ca ndaa ni reeda lu Anuario ni jma riuuláʼdxinu nga ra caníʼ pabiáʼ dxiiñaʼ cayaca lu guidubi Guidxilayú. Riéchenu ora guidúʼyanu pabiáʼ zidale cani rucheeche diidxaʼ ne pabiáʼ cadale binni ni caziidiʼ de Jiobá lu guidubi Guidxilayú. Zanda cueendunu ni galán de laani, pa guiene chaahuinu xipeʼ caníʼ cada columna ni zeeda luni. Guidúʼyanu caadxi ejemplu.

Iza dxiiñaʼ. Lu Anuario reeda pabiáʼ dxiiñaʼ guca ti iza ante, ni ruzulú dede beeu Septiembre stiʼ ti iza ne rilúxeni lu beeu agosto stiʼ sti iza. Nga runi, lu Anuario 2011 zeeda guiráʼ ni guca lu iza dxiiñaʼ 2010, ni bizulú 1 stiʼ septiembre 2009 ne bilúxeni 31 stiʼ agosto 2010.

Guiráʼ cani rucheeche diidxaʼ ne panda de laacabe bidii pabiáʼ dxiiñaʼ biʼniʼ iza ca. «Ni rucheeche diidxaʼ» nga rábinu ca binni ni maʼ guníʼ xquidxi Dios maʼ zanda gucheechecaʼ ca diidxaʼ nacubi ne galán stiʼ Reinu, ládecabe nuu cani maʼ guyuunisa ne cani caʼruʼ chúʼnisa. Xi zanda guiénenu ora guidúʼyanu ra na «Guiráʼ cani rucheeche diidxaʼ» yaʼ. Laani nga guiráʼ xpinni Cristu ni bicaa pabiáʼ dxiiñaʼ biʼniʼ lu ti beeu. Peru cadi guiaandaʼ ndiʼ laanu, pa ti ni rucheeche diidxaʼ guiaandaʼ laa gudii pabiáʼ dxiiñaʼ biʼniʼ lu ti beeu ne gudiini dede lu sti beeu la? zugábacabe laabe chupa biaje lu beeu ca. Peru lu columna ca qué rigabaʼ diʼ ni rucheeche diidxaʼ ni biaandaʼ laa gudii pabiáʼ dxiiñaʼ biʼniʼ beeu qué nudii ca. Racá ridúʼyanu nabé risaca gudiʼnu pabiáʼ dxiiñaʼ bíninu cada beeu nagueendaca. Yanna ximodo gánnanu pabiáʼ «panda de laacabe bidii pabiáʼ dxiiñaʼ biʼniʼ iza ca» yaʼ. Ra igabaʼ guiráʼ cani bidii pabiáʼ dxiiñaʼ biʼniʼ guidubi ti iza ne gaca dividir ni pur doce.

Guiráʼ ca hora bíʼnicabe. Lu Anuario 2011, cá bíninu jma de 1,600 millón de hora iza gudídinu ca ora bicheechenu diidxaʼ. Ñee laani nga guiráʼ hora ni riquiiñenu para guni adorarnu Jiobá la? Coʼ. Purtiʼ racá qué ricá tiempu ni riquiiñenu cada semana para gúninu xcaadxi xhiiñaʼ Jiobá, casi ora riganna ca binnigola tuuxa para uguucaʼ gana laabe, ora riuunu ca guendaridagulisaa, ora ridúʼndanu laasinu ne ora riníʼ íquenu de ni bíʼndanu.

Bueltu ni riquiiñeʼ. Ca testigu stiʼ Jiobá biquiiñecaʼ jma de 155 millón de dólar para gucanecaʼ ca precursor especial, ca misioneru ne ca binnigola ni riganna ca neza binni ridagulisaa lu iza dxiiñaʼ 2010. Peru lu bueltu ca cadi zeeda diʼ biaʼ bueltu biquiiñeʼ para gaca imprimir libru ne revista nin ni riquiiñeʼ jma de gande mil binni ni runi dxiiñaʼ ndaaniʼ ca Yoo Betel ni nuu lu guidubi Guidxilayú.

Cani gudó pan ne güeʼ vinu dxi bietenaláʼdxinu guendaguti stiʼ Jesús. Laacabe nga guiráʼ ca Testigu ni maʼ guyuunisa ni gudó pan ne güeʼ vinu dxi bietenaláʼdxinu guendaguti stiʼ Jesús. Ñee laacabe nga guiráʼ ca binni ni maʼ gulí Dios ni nabániruʼ ndaaniʼ Guidxilayú riʼ la? Coʼ, cadi nga diʼ nga laani. Guzéʼtenu ti ejemplu para gánnanu xiñee. Nuu binni riníʼ ique zie guibáʼ pur cani bisiidicabe laa ndaaniʼ religión stiʼ dxiqué o pur huará xpiaaniʼ. Qué zanda gánnanu pándapeʼ xpinni Cristu ni bibí nabani ndaaniʼ Guidxilayú riʼ, peru laaca cadi caquiiñeʼ diʼ gánnanu ni. Grupu ni Zaniruʼ qué gapa diʼ ti lista ra cá lá guiráʼ cani ró pan ne reʼ vinu ne laaca cadi guiráʼ xixé cani bibí nga riguixhe ximodo naquiiñeʼ guiénenu xiixa ni zeeda lu Biblia.a

Ni nánnanu nga nabániruʼ caadxi de ca xpinni Dios ni bibí pur espíritu ndaaniʼ Guidxilayú riʼ ora guidxiña dxi gueeda ca dxi nagana para gunitilú Dios ca cosa malu nuu yanna (Apo. 7:1-3). Laga cabézanu gaca nga, ca xpinni Cristu ni bibí, qué zusaana de sanírucaʼ lu dxiiñaʼ ni cayaca de guireeche diidxaʼ ne guiziidiʼ binni de Dios, ne lu Anuario ra ricá pabiáʼ dxiiñaʼ cayaca cada iza rihuinni zacá ni.

[Cani cá ñee yaza]