Carta ni zeeda de República Democrática del Congo

Lu bandáʼ stiʼ ti «dani de gui»

ORA maʼ ziree Gubidxa ndaaniʼ guidxi Goma, casi ñaca nutiee ni guibáʼ de color rosadu ne naranjadu, ne sicarú rihuinni dani Nyiragongo —tobi de ca volcán ni nuu lu Guidxilayú ni nabé rundaa gui— ne zaqué rirá gueelaʼ guiráʼ dxi lugar riʼ. Ruaani riree ti guʼxhuʼ, ne huaxhinni rihuinni ni naxiñáʼ pur gui ni napa volcán ca ndaaniʼ.

Lu diidxaʼ suajili rábicabe ni Mulima ya Moto, ni riníʼ «dani de gui». Lu iza 2002 bindaa ni gui últimu biaje, ne stale de ca xpecínudu ne ca xpinni Cristu ni nabeza gaxha de laani biníticaʼ guiráʼ ni nápacaʼ. Nabé feu ca neza stiʼ stale de ca lugar ra yegucheecheniáʼ xheelaʼ diidxaʼ, purtiʼ maʼ bichonga ca beñe ndaʼ ni gulee volcán que, ne riníʼ iqueʼ zándaca zacá nga rizá binni lu beeu. Ca binni ni nabeza ndaaniʼ guidxi Goma nabé naguudxi ladxidoʼcaʼ ne cadi nachonga ni casi beñe riree ndaaniʼ volcán que, ne laaca pur zaqué ladxidóʼcabe gunácabe bicaadiágacabe ca diidxaʼ nacubi ne galán ni zinedu que. Modo ca binni que gucaneni laadu guni sentirdu nayecheʼ pur dxiiñaʼ ni cayúnidu lu bandáʼ stiʼ «dani de gui» que.

Ti sábadu biasaʼ né stale gana. Naa ne xheelaʼ, ca xhamígudu ni yeganna laadu ne xcaadxi misioneru guyuudu ti lugar ra ruyubi binni guilá ni nuu fuera de guidxi Mugunga, riaanani neza ra riaaziʼ Gubidxa stiʼ guidxi riʼ. Stale de ca binni ni nabeza lugar que, yendézacaʼ raqué purtiʼ cuxooñelucaʼ de ca cosa malu ni cayaca xquídxicaʼ.

Bichadu camioneta stidu de libru ne revista ni cusiene de Biblia lu diidxaʼ francés, suajili ne kiniaruanda, ne bireʼdu ziuudu. Laga ziyuʼdu ndaaniʼ guidxi ni láʼ Route Sake, maʼ bizulú bihuinni canazá binni ndaaniʼ ca carretera ni maʼ guca feu stini. Ca hombre que cucaanacaʼ chukudus sticaʼ —ti tipu bicicleta de yaga— ni dxaʼ de cosa ni rizíʼcabe ne rutoocabe. Ca gunaa que zuchaahuicaʼ ne caadxi falda color nayecheʼ, ne nabé namónacaʼ para sacaʼ ne maʼ dxiʼbaʼ jma bultu íquecaʼ. Ca calle que ridxácani de mototaxi ni maʼ ziné binni ra runi dxiiñaʼ ne luguiaa. Guiráʼ ladu rihuinni ca yoo de yaga ni napa mancha yaaseʼ ne rutieecabe ti franja azul ladi cani.

Biaananedu xcaadxi testigu stiʼ Jiobá guidúʼyadu ra Yoo stiʼ Reinu ni nuu Ndosho para chigucheechenedu laacaʼ diidxaʼ lugar ra ruyubi binni guilá. Nabé biuubaʼ ladxiduáʼ ora biiyaʼ ca dxaapahuiiniʼ ne ca hombrehuiiniʼ, ca viuda, ca bizabi ne ca xpinni Cristu ni napa xiixa guendahuará ni rucueeza laacaʼ gúnicaʼ stale cosa. Stale de laacabe huayacanácabe purtiʼ nabé feu guiráʼ ni huazaacacabe, peru yanna maʼ nabánicabe jma galán purtiʼ gudixhe íquecabe chinándacabe ca conseju ni zeeda lu Biblia. Ndaaniʼ ladxidóʼcabe maʼ nuu stale de ca cosa sicarú ni ruzeeteʼ Biblia zazaaca, ne nápacabe stale gana guiníʼcabe de laacani. Lu ti guendaridagulisaa huiiniʼ ni gúpadu guyuu 130 binni, luni gúdxicabe laadu xi textu stiʼ Biblia zanda gúʼndanedu binni para cuʼdu gana laacaʼ, de raqué gulaadu para gunda guyuudu ndaaniʼ gaayuʼ camión huiiniʼ ne ti camioneta.

Media hora despué yendadu ra ziuudu que, lugar ra ruyubi binni guilá. Málasi bidúʼyadu gayuaa yoo huiiniʼ de lari naquichiʼ ni bicuícabe lu ca beñe ni maʼ bibidxi stiʼ volcán que. Bidúʼyadu nuu ca bañu ne ca lavaderu ni riquiiñeʼ ca binni que galaa de lugar ra nuu ca yoo huiiniʼ que ne zuhuaa cani derechu derechu. Guiráʼ ladu bidúʼyadu binni ni caguiibiʼ lari, ni cayuni guendaró, ni cusiá ne ni cunduubaʼ ra puertaʼ yoohuiiniʼ ra nabeza.

Gunínedu tobi de ca hombre ni rapa ca binni ni nuu lugar que, ni rábicabe papa Jacques. Laabe nabé ricá íquebe modo gusiniisibe ca xiiñibe ca dxi nagana riʼ. Nabé guyuuláʼdxibe ora bisaananedu laabe libru Lo que los jóvenes preguntan. Respuestas prácticas, ne gúdxibe laadu gúʼndasibe ni zúnibe grupu huiiniʼ de binni para gusiénebe laacaʼ ni biziidibe.

Guzadu sti ndaa ne raqué binibiaʼdu ti gunaa ni rábicabe mama Betrice. Laabe gunabadiidxabe laadu xiñee rudii Dios lugar gacaná binni. Gunaa riʼ riníʼ ique cayuni castigar Dios laa purtiʼ guti xheelaʼ lu ti guendaridinde, xiiñidxaapabe qué gapa xheelaʼ ne cadiʼdiʼ castigu para gusiniisi xiiñiʼ lugar que, ne laaca biʼniʼ secuestrárcabe ti hombrehuiiniʼ stibe maʼ raca chupa chonna beeu ne guirutiʼ ganna paraa nuu.

Guiráʼ ni cadiʼdiʼ mama Betrice que rucaani naa guiníʼ iqueʼ ni biʼniʼ sentir Job pur guiráʼ guendanagana ni gudiʼdiʼ. Biluidu laabe xi pur ridiʼdiʼ binni lu stale guendananá ne gúdxidu laabe cadi Dios diʼ nga cayuni castigar binni (Job 34:10-12; Santiago 1:14, 15). Ne laaca bíʼndanedu laabe de lu Biblia ra cusiene maʼ cadi candaa zuni chaahuiʼ Jiobá guiráʼ ni nuu lu Guidxilayú riʼ, ne zúnini ra iquiiñeʼ Reinu stiʼ. Oraqueruʼ bizulú bixidxihuiinibe ne gúdxibe laadu maʼ naguixhe íquebe guiziidirube de Biblia ne guinábabe Dios gacané laabe.

Nabé sicarú gudídidu dxi que ne nanna dxíchidu Jiobá ngue gucané laadu para gúdxidu ca binni que xi chigúnibe ne guluʼdu gana laacaʼ. Ora chiguibiguétadu de raqué stale de ca binni que bireecaʼ de ralidxicaʼ, naazecaʼ tratadu, revista ne ca libru bisaananedu laacaʼ, ne cuzabinacaʼ ludu né laacani.

Neza ziúpadu ralídxidu maʼ zeeda guiníʼ íquedu modo guyuudu. Nayecheʼ nuaaʼ pur dxi nabé sicarú riʼ. Rietenalaʼdxeʼ pabiáʼ guyuulaʼdxiʼ papa Jacques ni bisíʼdidu laa, pabiáʼ galán biʼniʼ sentir mama Beatrice né ca diidxaʼ ni gúdxidu laa, ne pabiáʼ nadipaʼ bidii naʼ ti gunaa gola laadu ne bixidxiné laadu. Riníʼ iqueʼ de ca hombrehuiiniʼ ne ca dxaapahuiiniʼ ni gunabadiidxaʼ laadu stale cosa nabé nagana ne bisihuínnicaʼ riníʼ íquecaʼ casi binni huaniisi neca nahuiinirucaʼ. Guizáʼ ridxagayaaʼ ora guietenalaʼdxeʼ pabiáʼ runi huantar ca binni riʼ, purtiʼ ruxídxirucaʼ neca cadíʼdicaʼ lu stale guendananá.

Lugar huiiniʼ riʼ, ridúʼyadu stale binni cayuni stipa de guidubi ladxidóʼ pur gacané xcaadxi ni cadiʼdiʼ lu guendananá. Para naa la? ti ndaayaʼ naroʼbaʼ nga iquiiñeʼ Biblia para gulueeʼ binni ximodo chigaca chaahuiʼ guiráʼ guendanagana ni nápacaʼ ne maʼ qué chuʼruʼ dxi guniná cani laacaʼ. Nabé nayecheʼ runeʼ sentir purtiʼ nuaaʼ lu ti grupu de binni ni cayacané xcaadxi guiziidiʼ de Dios, ne qué ziuu dxi guihuinni stiʼ grupu casi laani.