Racané guendanachaʼhuiʼ para cadi chuʼ binni triste
DXI yeganna George ne Manon —chupa Testigu de Países Bajos—, ti gunaa maʼ nagola para gusiidicabe laa de stiidxaʼ Reinu, nabé feu modo bidxaagalú gunaa riʼ laacabe. George ne Manon gúnnacaʼ biaana binnigola riʼ viuda chupa biaje, guti ti xiiñiʼ ne napa ti guendahuará ni láʼ artritis grave. Neca guyuube galán ti ratu ora caniʼnécabe laabe, qué ñácabe nachaʼhuiʼ né ca Testigu.
Peru xi gucuá ique George guni yaʼ. Gúdxibe Manon chinécabe ti ramu guieʼ ora guibiguétacabe ra nuu gunaa que, purtiʼ ruluíʼ stubi binnigola riʼ nabeza ne nabé triste nuu. Zaqué bíʼnicabe ni, nabé bidxagayaa Rie, binnigola que pur laani. Cumu qué ñanda ñuni tender binnigola riʼ ca Testigu dxi que la? gudíxhecabe chigánnacabe laabe sti dxi. Peru dxi bibiguétacabe ralídxibe, guirutiʼ qué nuxheleʼ puertaʼ que. Neca guyécabe xhupa xhonna biaje, maʼ qué nidxélacabe laabe. Dede guníʼ íquecabe maʼ qué náʼ binnigola que guʼyaʼ laacabe.
Peru ti dxi bidxelaʼ George laabe ralídxibe. Gúdxibe George gutiidilaʼdxiʼ stóndabe purtiʼ qué ñuube dxi gudíxhecabe ne gúdxibe laa guyuube ra hospital. Despué guniʼbe: «Peru qué gannuʼ xi bineʼ bireesitu. ¡Bizuluáʼ biindaʼ Biblia!». Nabé sicarú modo byuíʼcabe diidxaʼ, dede guníʼ Rie zaa guʼndanécabe laa Biblia.
Ra ziziidiʼ Rie jma de Biblia, maʼ bisaana de chuʼ triste, guca ti binni nachaʼhuiʼ ne nayecheʼ. Neca qué randa rireebe ralídxibe, bizulú guníʼnebe guiráʼ tu chiganna laabe de ni caziidibe. Cumu huarabe la? qué randa riebe guiráʼ guendaridagulisaa, peru nabé riuuláʼdxibe chiganna ca xpinni Cristu laabe. Dxi bisaabe 82 iza, guyebe ti guendaridagulisaa de chupa gubidxa ne guyuunísabe raqué, zaqué bisihuínnibe maʼ bidiibe laabe Dios.
Chupa chonna beeu despué guti Rie, ne bidxélacabe ti poema ni bicaabe. Luni bicaabe pabiáʼ triste nga chuʼ binni stubi ora maʼ nagola ne bisihuínnibe lu poema que pabiáʼ risaca gaca binni nachaʼhuiʼ. Manon guníʼ: «Yendá poema que dede ndaaniʼ ladxiduáʼ, ne nuaaʼ nayecheʼ purtiʼ gucané Jiobá laadu gácadu nachaʼhuiʼ né Rie».
Dxandíʼ, ejemplu stiʼ Jiobá rucaani laanu gannaxhiinu binni ne gácanu nachaʼhuiʼ né laacaʼ (Efe. 5:1, 2). Jma zadxélanu binni ni guiziidiʼ de stiidxaʼ Dios pa gusihuínninu cayúninu xhiiñaʼ Dios ne pa gácanu nachaʼhuiʼ (2 Cor. 6:4, 6).