Ni rusiidiʼ stiidxaʼ Dios
¿Xi zazaaca dxi guni juzgar Dios binni guidxilayú?
Zacané artículo riʼ lii guidxélaluʼ lu Biblia stiluʼ respuesta stiʼ caadxi pregunta ni zándaca huayúniluʼ laca lii. Pa racaláʼdxiluʼ la? zanda gacané ca testigu stiʼ Jehová lii gánnaluʼ respuesta stiʼ ca pregunta riʼ.
1. ¿Xii nga juiciu stiʼ Dios?
Lu ilustración ni cá ladu derechu riʼ, rihuinni modo rixuiʼlú binni zaca dxi guni juzgar Dios binni, ruxuiʼlúcabe zuhuaa stale binni ni maʼ gutiʼ nezalú trono stiʼ Dios para gaca juzgarcaʼ pur ca ni bíʼnicaʼ ne riníʼ íquecabe nuu de laacaʼ ziecaʼ guibáʼ ne xcaadxi zié ndaaniʼ infiernu, peru lu Biblia rusiidiʼ zaca juiciu riʼ, peru para cueeni guirá guendaquéiquiiñeʼ ni nuu lu Guidxilayú (Salmo 96:13). Ne Jesús nga juez ni maʼ gulí Dios para guni justicia lu Guidxilayú riʼ. (Biindaʼ Isaías 11:1-5 ne Hechos 17:31).
2. ¿Ximodo zaca justicia dxi guni juzgar Dios binni?
Bidxiideche Adán, primé hombre que Jehová Dios, ne pur nga guiráʼ ca ni zá de laabe rucheecaʼ, racanacaʼ ne ráticaʼ (Romanos 5:12). Ne para gaca chaʼhuiʼ ni bizaaca riʼ, zusibani Jesús stale binni ni maʼ guti ne lu libru stiʼ Apocalipsis ruzeeteʼ zaca ndiʼ lu ti mil iza guni mandar Jesucristu. (Biindaʼ Apocalipsis 20:4, 11, 12).
Ca ni guibani de lade gue’tu’ riʼ, zaca juzgarcaʼ peru cadi pur ni bí’nica’ ante gáticaʼ, sínuque zaca juzgarcaʼ pur ca ni gúnicaʼ según ni cá lu ca rollo ni riete lu capítulo 20 stiʼ Apocalipsis (Romanos 6:7). Ora guníʼ apóstol Pablo de «ca ni bi’ni’ ni jneza ne ca ni qué ñuni ni jneza» caniʼbe de ca binni ni ziasa de lade gue’tu’ ne zápacaʼ oportunidad de guiziidicaʼ de Dios. (Biindaʼ Hechos 24:15).
3. ¿Xiruʼ zazaaca dxi guni juzgar Dios binni yaʼ?
Ca binni ni guti sin ñunibiáʼ Dios zápacaʼ oportunidad gúnicaʼ ni nabe. Ca ni guni ni ná Dios la? ziásacaʼ «para guibánicaʼ» peru ca ni qué guzuubaʼ stiidxabe ziásacaʼ «para gaca juzgarcaʼ». (Biindaʼ Juan 5:28, 29 ne Isaías 26:10; 65:20).
Zuni juzgar Jehová ti 1,000 iza ne ora maʼ biluxe ti mil iza ca la? zabiguetaʼ zaca binni perfectu cásica dxi bizáʼ Dios laacaʼ (1 Corintios 15:24-28). ¡Guizáʼ naro’ba’ ndaayaʼ zacaa ca ni guzuubaʼ stiidxaʼ Dios! Despué de guieguyoo Binidxabaʼ 1,000 iza ndaaniʼ ti bizé la? zalaabe sti biaje para gutiidibe binni lu últimu prueba. Zuni Binidxabaʼ stale cosa para guxheleʼ binni de Jehová, peru ca ni tidiʼ lu últimu prueba riʼ zabánicaʼ para siempre lu Guidxilayú riʼ. (Biindaʼ Isaías 25:8 ne Apocalipsis 20:1, 7-9).
4. ¿Xi sti juiciu zedané ndaayaʼ para binni yaʼ?
Biblia ruzeeteʼ ziuu sti juiciu. Ne dxi ca nga guiluxeʼ guiráʼ ca cosa malu ni cayaca lu Guidxilayú riʼ. Málasi zeeda dxi riʼ, cásica dxi beeda Diluvio que tiempu stiʼ Noé ne binitilú guiráʼ ca binni malu ni bibani dxiqué. Ma’ cadi candaa zanitilú guiráʼ «ca binni ni qué runi respetar Dios» ne zabani puru si binni nacha’hui’ lu Guidxilayú riʼ «ra zaca puru si ni jneza». (Biindaʼ 2 Pedro 3:6, 7, 13).
Pa racaláʼdxiluʼ gánnaluʼ jma, guyé lu yaza 213 hasta 215 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jehová.
[Imagen]
El Juicio Final, de Gustave Doré (1832-1883)
[Ra gucuaacabe imagen]
Grabado de Doré
[Imagen]
[Imagen]
[Imagen]