Ñee gudxi Jesús hombre malu ni gucuané lu yaga que zabaninebe laa guibáʼ la?

Nabé runi binni guendarinabadiidxaʼ riʼ pur ni gudxi Jesús hombre malu ni gucuané lu yaga que, Jesús gudxi laabe: «Dxandipeʼ cayabeʼ lii yannadxí: Ziuuneluʼ naa ndaaniʼ Paraísu» (Lucas 23:43, TNM). Jesús qué niníʼ paraa ngue chichuu Paraísu que. Ñee ni gucaláʼdxibe niniʼbe nga zinebe hombre que guibáʼ la?

Guidúʼyanu primé xi naquiiñeʼ ñúnibe para ganda guibánibe guibáʼ. Ca xpinni Cristu ni chiguibani guibáʼ naquiiñeʼ chúʼnisacaʼ ne laaca naquiiñeʼ chúʼnisacaʼ né espíritu santu, ne óraca nga reeda gácacaʼ discípulo stiʼ Jesús, ni bibí pur espíritu (Juan 3:3, 5). Laacaʼ naquiiñeʼ guibánicaʼ modo riuulaʼdxiʼ Dios ne gusihuínnicaʼ nabánicaʼ jneza, guiacaʼ binni ne cadi cuánacaʼ stiʼ stobi (1 Corintios 6:9-11). Ne cadi naquiiñeʼ guixélecabe de Dios ne de Cristu biaʼ dxi guibánicabe lu Guidxilayú riʼ (Lucas 22:28-30; 2 Timoteo 2:12). Pa gúnicabe guiráʼ cani maʼ bizétenu riʼ, zabánicabe sti biaje para gúnicabe ti dxiiñaʼ risaca guibáʼ, ne laani nga gácacabe rey ne sacerdote né Cristu para gacanécabe binni ti mil iza (Apocalipsis 20:6).

Peru hombre que guca malu dede dxi guti (Lucas 23:32, 39-41). Neca bisihuínnibe respetu ora gúdxibe Jesús: «Bietenalaʼdxiʼ naa ora guiuuluʼ lu reinu stiluʼ» (Lucas 23:42, TNM). Peru hombre riʼ qué ñuunisa ne qué ñaca discípulo stiʼ Cristu ni bibí né espíritu santu, laaca cadi galán diʼ guca xpiaʼ ne qué nusihuinni qué zucheené Jesús. Yanna, pa zacá gúcabe, ñee zanda guininu gudxi Jesús laabe zácabe rey guibáʼ lade ca discípulo stiʼ, cani qué nucheené laa la? (Romanos 2:6, 7.)

Guzéʼtenu ti ejemplu. Guníʼ ique gulaʼnaʼ ti hombre xpuéltuluʼ, peru despué gúdxibe lii gutiidiláʼdxiluʼ stóndabe. Ne zándaca rábiluʼ qué zugaaniluʼ donda íquebe, peru ñee nusigápaluʼ laabe negocio stiluʼ o ñábiluʼ laabe ñápabe binnilídxiluʼ la? Coʼ njaʼ. Cadi dxandíʼ nudiiluʼ dxiiñaʼ ca tuuxa ni nánnaluʼ qué zabaʼnaʼ lii ne zapa binnilídxiluʼ la? Zacaca nga naquiiñeʼ guni ca binni ni chiguibani guibáʼ, napa xidé gusihuínnicaʼ zanda gúnicaʼ dxiiñaʼ sticaʼ jneza ne zuzuubacaʼ stiidxaʼ Dios ora guni mandarcaʼ binni guidxilayú (Apocalipsis 2:10). Neca de guidubi ladxidóʼ hombre que gudxi Jesús ca diidxaʼ que ora mayaca gati la? ne ngue si qué zanda diʼ gusihuínnibe dxandíʼ zúnibe ni jneza.

Peru ñee gudxi Jesús hombre que ziuuné laabe guibáʼ dxi queca la? Coʼ, cadi nga diʼ nga ni gudxi Jesús laabe. Purtiʼ Jesús qué ñe diʼ guibáʼ dxíqueca, sínuque guyuube «ndaani yu», o ndaaniʼ baʼ, chonna gubidxa (Mateo 12:40; Marcos 10:34). Ne despué de biásabe lade gueʼtuʼ, gudiʼdiʼ sti cuarenta dxi para bibiguétabe guibáʼ (Hechos 1:3, 9).

Yanna, gunáʼ nga paraísu ra chichuu hombre malu que yaʼ. Ora guiásabe lade gueʼtuʼ, zabánibe ndaaniʼ Paraísu lu Guidxilayú riʼ ora maʼ cayuni mandar Jesús (Hechos 24:15; Apocalipsis 21:3, 4). Pa riuuláʼdxiluʼ gánnaluʼ jma de Paraísu ca ne xi canabaʼ Dios laanu gúninu para ganda guibáninu ndaaniʼ ni la? guniʼné ti testigu stiʼ Jiobá.