ÑEE NANNUʼ NI LA?

Ñee gurí yuʼduʼ stiʼ Jerusalén que sti biaje binitilú si ni lu iza 70 despué de ca dxi stiʼ Jesús la?

JESÚS guníʼ «qué ziaana nin ti guie luguiá sti guíe» ora guinitilú yuʼduʼ que, ne guca ni guniʼbe que dxi binitilú general Tito ne ca soldadu stiʼ guidxi Jerusalén lu iza 70 despué de ca dxi stiʼ Jesús (Mat. 24:2). Gudiʼdiʼ si biaʼ chonna siglu, gucalaʼdxiʼ emperador Juliano nucuí yuʼduʼ que stiʼ biaje.

Sobrinu Constantino I ni Huaniisi nga Juliano, ne stale binni riníʼ guca Juliano últimu emperador stiʼ Roma ne laaca biʼniʼ adorarbe stale dios. Neca bisiidicabe laabe de Cristu, peru ora gúcabe emperador lu iza 361, bidxiidéchebe guiráʼ ni bisiidicabe laabe, purtiʼ para laabe cadi jneza stale cosa runi ca binni que, ne guniʼbe zanda guni adorar binni stale dios. Nga runi, lu stale libru ni ruzeeteʼ de historia runibiáʼcabe laabe casi «Hombre ni bixeleʼ de Dios».

Nabé guca nanalaʼdxiʼ Juliano ca binni ni na xpinni Cristu laacaʼ, ne zándaca gúcani purtiʼ dxi nápabe xhoopaʼ iza biiyabe biiti ca binni que bixhózebe ne xcaadxi binnilídxibe. Stale hombre ni rucaa historia riniʼcaʼ gudxi Juliano ca judíu que gucuicaʼ yuʼduʼ que sti biaje, zándaca para gusihuínnibe cadi dxandíʼ ni guníʼ Jesús.a

Nánnanu dxandíʼ gucalaʼdxiʼ Juliano nucuí yuʼduʼ que sti biaje. Peru qué ganna chaahuinu pa dxandíʼ bizulúcabe ca dxiiñaʼ que, ne pa zacá gúcani la? laaca qué gánnanu xiñee bisaanacabe ni. Ni nánnanu nga guti Juliano ante gusaa chupa iza de naca emperador, nga runi maʼ qué ñaca ni gudixhe íquebe.