Ca desgracia ni runiná binni: Ñee rusihuínnicani malu Dios la?

NUU BINNI RINÍʼ: «Dios nga ruseendaʼ ca desgracia ni raca ora riaba nisaguié ne ora raca xu purtiʼ laabe cayuni mandarbe guidxilayú; nga runi malu laabe».

NI RUSIIDIʼ BIBLIA: «Naaze dxiichi binidxaba idubi guidxilayú» (1 Juan 5:19). Ca diidxaʼ ni cuzeeteʼ textu ca racanécani laanu gánnanu xiñee rizaaca xiixa desgracia. Yanna, ñee raca nagana para laanu guni crenu Binidxabaʼ nga cayuni mandar guidubi naca guidxilayú riʼ la? Binidxabaʼ zanda gucaabe binni guyubi puru para laa si, gachelú gapa ni napa stobi ne qué guʼyaʼ ni chiguizaaca despué, cásica rúnibe. Nga racané laanu guiénenu xiñee cunitilú binni Guidxilayú. Stale binni ni nanna de tema riʼ huaníʼ, cumu qué ganna binni gapa Guidxilayú riʼ la? zándaca pur nga rizaaca xiixa desgracia ni raca ora riaba nisaguié ne ora raca xu, racaná stale binni ne riuu xquendanabánicaʼ ra naxoo.

Yanna, xiñee cudii Dios lugar gapa Binidxabaʼ stale poder yaʼ. Ante guininu xiñee la? napa xidé guzéʼtenu de dxi bizulú guyuu binni lu Guidxilayú riʼ. Adán ne Eva, ca primé bixhózenu, qué ninacaʼ ñuni mandar Dios laacaʼ ne dede dxiqué stale binni cayuni cásica bíʼnicabe. Pur ni gudixhe íquecabe gúnicabe ca bisaanacabe guidxilayú riʼ lu náʼ Binidxabaʼ, xhenemigu Dios. Nga runi, guníʼ Jesús Binidxabaʼ nga «xaíque sti guidxilayú riʼ» (Juan 14:30). Peru zedandá dxi gusaana Binidxabaʼ de guni mandar.

Cadi cayuuyadxí si Jiobáa modo cayuniná Binidxabaʼ binni. Ne Biblia ruzeeteʼ ximodo biʼniʼ sentir Jiobá ora bíʼyabe xi guiráʼ guendanagana bidxaagalú guidxi Israel: «Biaʼ tiempu bindaa yuubaʼ stícabe, biáʼqueca bindaa yuubaʼ stibe» (Isaías 63:9). Cumu rilaselaʼdxiʼ Jiobá binni la? maʼ gudixhe ique cuee Binidxabaʼ de guni mandar ne mayaca gúnibe ni. Ne bicuibe Xiiñibe Jesucristu, ni runi ni jneza, casi rey ne qué ziuu dxi gusaana de guni mandar.

NI NAQUIIÑEʼ GÁNNANU: Qué huayuu dxi gulá Binidxabaʼ binni de xiixa desgracia, peru Jesús zuni ni qué huayúnibe ca. Dxi guyuu Jesús lu Guidxilayú bilá ca discípulo stiʼ ora gunaazeʼ ti bi yooxhoʼ laacaʼ. Biblia na: «Gudinde né be bi yooxho que ne rabi be nisa que: “Guta dxí”. Ne biaana dxí bi que ne ma qué ñasa ru ola». Nabé bidxagayaa ca discípulo que ne gunabadiidxasaacaʼ: «Tu laabe pue, dede bi ne nisa ruzuuba stiidxa be» (Marcos 4:37-41). Ni bíʼnibe ca racaneni laanu guni crenu dxandíʼ zápabe guiráʼ binni ni guzuubaʼ diidxaʼ ora guni mandarbe (Daniel 7:13, 14).