Ruchá típabe ladxidoʼno

Ñee rizaalaʼdxiʼ Dios binni guidxilayú la? o qué rizaaláʼdxibe pa cayacanacaʼ. Modo ricabi Biblia guendarinabadiidxaʼ riʼ nabé riguixhedxini ladxidoʼno. Dios dxandíʼ rizaalaʼdxiʼ laanu ne racalaʼdxiʼ guibáninu nayecheʼ. Guiráʼ dxi rudiibe lugar guʼyaʼ guiráʼ binni pabiáʼ nacháʼhuibe dede né ca binni ni qué rudii xquíxepeʼ laabe. Guníʼ ique ca diidxaʼ guníʼ Pablu. (Biindaʼ Hechos 14:16, 17.)

Ora guniʼné Pablu ca binni ni qué runibiáʼ Dios ni nabeza ndaaniʼ guidxi Listra, gúdxibe laacaʼ ca diidxaʼ riʼ: «Chiqué bidii [Dios] lugar biʼni binni ni na ique. Peru biluíʼ be laaca tu laabe pur ni biʼni be, purti ucané be laaca casi racané be laanu yanna, rusaba be nisa guie para gaca xquela nu. Qué rusiaadxa be ni idóʼ no, ne ruchá be ladxidóʼ no de enda nayecheʼ». Ximodo biene ca binni que ca diidxaʼ guníʼ Pablu ca yaʼ.

Qué ñaca diʼ nagana para ca binni de Listra ñénecaʼ ca diidxaʼ ni guníʼ Pablu purtiʼ laacabe nabánicabe ti lugar ra runi binni dxiiñaʼ layú ne ra nabé rudii cosecha. Bisietenalaʼdxiʼ Pablu laacabe, Dios nga rusaba nisaguié ne racané gudii guiráʼ ni rudxiibaʼ binni lu layú. Ngue runi, guiráʼ biaje gudii layú stícabe stale cosecha o gócabe ti guendaró nanixe la? rudiicabe cuenta pur guendanachaʼhuiʼ stiʼ Dios ngue nápacabe cani.

Lu ca versículo riʼ rizíʼdinu stale cosa risaca de Jiobá.

Bisaana Jiobá lu nanu cuinu xi gúninu. Biblia na bidii Jiobá lugar binni de guiráʼ guidxi guni «ni na ique». Ti libru ni riquiiñeʼ ca binni ni rutiixhi Biblia na ca diidxaʼ ca laaca riníʼcani «stubi si binni zanda cuí gunáʼ nga neza ni jma galán para laa». Casi maʼ bidúʼyanu ca, qué rucaa diʼ Jiobá binni guni ni na pa qué racalaʼdxiʼ guni ni ne bisaanabe lu nanu cuinu xi gúninu lu xquendanabáninu (Deuteronomio 30:19).

Jiobá racalaʼdxiʼ gunibiaʼnu laa. Sicaríʼ guníʼ apóstol Pablu: «Biluíʼ be laaca tu laabe pur ni biʼni be». Guiráʼ cani bizaʼbe rusihuinni cani «ximodo laabe», nacháʼhuibe, nuu xpiaanibe, nápabe poder ne nadxiibe binni (Romanos 1:20). Ne lu Biblia ruluíʼ Jiobá laanu ximódopeʼ laa (2 Timoteo 3:16, 17). Yanna, ñee qué rusihuinni nga racaláʼdxibe gunibiaʼnu laabe la?

Racalaʼdxiʼ Jiobá guibáninu nayecheʼ. Pablu bizeeteʼ: «Qué rusiaadxa [Dios] ni idóʼ no, ne ruchá be ladxidóʼ no de enda nayecheʼ». Dede ca binni ruchee ne qué rudii xquíxepeʼ laabe zanda gó guiráʼ ni gacalaʼdxiʼ ne zanda guininu riuu nayecheʼ. Peru Dios racalaʼdxiʼ gánnanu xi zacané laanu guibáninu nayecheʼ, ne zanda gánnanu ni ra guizíʼdinu ni dxandíʼ de laabe ne guzúʼbanu stiidxabe (Salmo 144:15; Mateo 5:3).

Guiranu ridúʼyanu pabiáʼ nachaʼhuiʼ Dios né laanu guiráʼ dxi. Yanna, ñee qué riuuláʼdxiluʼ gánnaluʼ xi zanda guʼnuʼ para gusihuínniluʼ rudiiluʼ xquíxepeʼ Dios purtiʼ qué rusiaadxabe ni guidoʼno, ne ruchá típabe ladxidoʼno de guendanayecheʼ la?