Xiñee qué ruzeeteʼ Biblia lá caadxi binni ni bibani dxiqué

Lu libru stiʼ Rut biquiiñecabe diidxaʼ Fulano para guníʼcabe de ti hombre ni qué niná ñuni tobi de ca cosa ni rinabaʼ Ley stiʼ Moisés que guni binni (Rut 4:1-12). Ñee rusihuinni nga malu ca binni ni qué rieeteʼ lá lu Biblia o huaxiéʼ risácacabe la?

Coʼ. Guidúʼyanu sti ejemplu. Últimu gueelaʼ chiguni Jesús Pascua que para goxhiné ca discípulo stiʼ dede ante biseendabe laacaʼ «ndaani guidxi ra nuu tobi hombre» para uguucaʼ listu ralidxi hombre que purtiʼ raqué chitoxhícabe (Mateo 26:18). Ñee jneza nga guiníʼ íquenu malu hombre que o huaxiéʼ risácabe la? Coʼ. Nánnanu gúcabe ti discípulo stiʼ Jesús, peru cadi caquiiñepeʼ guzeetecabe labe lu relatu ca.

Ne lu Biblia jma nga rieeteʼ lá stale binni malu ne huaxiéʼ ruzeeteʼ ni lá binni nachaʼhuiʼ. Chiguzéʼtenu ti ejemplu, guiráʼ binni nanna Eva nga lá primé gunaa guyuu lu Guidxilayú. Peru cumu biyúbibe gúnibe ni riuuláʼdxisibe, ne qué nuzuubabe diidxaʼ la? ne laabe nápabe donda bichee Adán, ne pur nga nabé rápanu guendanagana (Romanos 5:12). Casi xheelaʼ Noé la? qué rieeteʼ diʼ lá lu Biblia neca bíʼnibe xhiiñaʼ Dios de guidubi ladxidoʼbe, bizuubabe diidxaʼ ne gucanebe xheelabe para biʼniʼ ti dxiiñaʼ nabé risaca. Racá ridúʼyanu qué rieeteʼ diʼ labe, peru cadi purtiʼ qué risácabe o purtiʼ qué niguu Jiobá ndaayaʼ laabe.

Lu Biblia zeeda relatu stiʼ xcaadxi binni, ni qué rieeteʼ lá luni, neca bíʼnicaʼ stale cosa risaca —dede bíʼnicaʼ ni huaxiéʼ si tu randa runi— para gunda guca cani maʼ gudixhe ique Dios guni. Yanna guiníʼ íquenu de xa dxaapahuiiniʼ israelita ni guca criada stiʼ xheelaʼ Naamán, xaíque stiʼ ca soldadu stiʼ guidxi Siria. Dxaapahuiiniʼ riʼ guca nadxibalú para bizeeteʼ lu xheelaʼ Naamán de ti profeta stiʼ Jiobá ni nuu ndaaniʼ guidxi Israel. Ne pur ngue guca ti milagru (2 Reyes 5:1-14). Biblia laaca ruzeeteʼ sti ejemplu nabé risaca stiʼ ti baʼdudxaapaʼ ni nabé gupa fe. Laabe nga xiiñiʼ Jefté, ti juez stiʼ ca israelita. Baʼdudxaapaʼ riʼ qué nichaganáʼ ne qué ñapa xiiñiʼ para gunda biʼniʼ ni bidii stiidxaʼ bixhoze (Jueces 11:30-40). Laaca qué rieeteʼ lá ca binni ni bicaa jma de cuarenta salmo ni zeeda lu Biblia ne laaca qué rieeteʼ lá caadxi profeta ni biʼniʼ xhiiñaʼ Jiobá cásipeʼ modo gúdxibe laacaʼ gúnicaʼ ni (1 Reyes 20:37-43).

Ne sti ejemplu jma sicarú nga stiʼ ca ángel. Neca nuu gayuaa millón de ángel, peru lá chupa si de laacabe ruzeeteʼ Biblia: Gabriel ne Miguel (Daniel 7:10; Lucas 1:19; Judas 9). Biblia qué ruzeeteʼ diʼ lá xcaadxi ca. Ti dxi gunabadiidxaʼ Manóah, bixhoze Sansón, ti ángel sicaríʼ: «Ñee zanda gaʼbuʼ naa tu laluʼ la? ti gusisácadu lii ora maʼ gaca ni na ca diidxaʼ guniʼluʼ ca». Xi bicabi ángel que laabe yaʼ. Laa gudxi laabe: «Xiñee canabadiidxaluʼ naa tu laʼyaʼ pue». Ángel ca qué nudxiibaʼ laca laa ne qué niná nusisácacabe laa purtiʼ Jiobá si nga naquiiñeʼ gusisácacabe (Jueces 13:17, 18).

Biblia qué rusiene xiñee lá caadxi si binni rieeteʼ luni ne lá xcaadxi coʼ. Peru zanda guizíʼdinu stale de ca binni ni biʼniʼ ni na Dios sin nicá íquecaʼ ñanna binni tu lacaʼ.