Xiñee rudii Dios lugar chuʼ tu guquiichináʼ binni

Lu Biblia rieeteʼ caadxi historia stiʼ ca binni ni biquiichináʼ stobi. Casi rey Acab biʼniʼ mandar guidxi Israel lu siglu X ante de ca dxi stiʼ Jesús, laabe gucaláʼdxibe ñaanannebe ti layú stiʼ Nabot ne ca xiiñiʼ.a Reina Jezabel, gudixhe chaahuiʼ modo guuti laacabe para guiaanané layú stícabe ne qué ñuni Acab gastiʼ para nucueeza laabe (1 Reyes 21:1-16; 2 Reyes 9:26). Xiñee rudii Dios lugar chuʼ binni casi Jezabel.

Tobi de ca razón ca nga purtiʼ qué rusiguii diʼ Dios (Tito 1:2). Yanna, xiñee cuzéʼtenu ndiʼ pa laanu caninu de ca binni ni ruquiichináʼ stobi yaʼ. Cadi guiaandaʼ laanu, dxi bizáʼ Dios ca primé binni guyuu lu Guidxilayú gúdxibe laacaʼ záticaʼ pa qué guzuubacaʼ stiidxabe ne zaqué guca ni. Dede dxi maʼ qué niná Adán ne Eva nuzuubacaʼ stiidxaʼ Dios ndaaniʼ Jardín stiʼ Edén que guiráʼ xixé binni rati. Ne primé binni ni gutiʼ lu Guidxilayú riʼ nga Abel ne bíʼchibe Caín nga biiti laabe, dede dxi que maʼ bihuinni modo ruquiichinácabe binni (Génesis 2:16, 17; 4:8).

Dede dxi ca nga cayaca ni na ca diidxaʼ zeeda lu Biblia ra ná: «binni runi mandar binni para gacanacaʼ» (Eclesiastés 8:9). Jiobá maca gudixhená xquidxi zápacaʼ rey ni zuquiichináʼ laacaʼ, ne pur ngue zucaacaʼ ridxi laabe para gacanebe laacaʼ (1 Samuel 8:11-18). Dede rey Salomón biquiichináʼ Israel pur guiráʼ impuestu biquixe laacabe (1 Reyes 11:43; 12:3, 4). Ne laaca guyuu xcaadxi rey ni jma biquiichináʼ binni, casi rey Acab. Yanna, guníʼ ique ndiʼ: pa ñaca qué nudii Dios lugar ñuu tu nuquiichináʼ ca binni ca, cadi dxandíʼ niníʼ íquenu rusiguiibe la?

Cadi guiaandaʼ laanu, riníʼ Binidxabaʼ runi binni ni na Dios pur guiráʼ ni rudiibe laacaʼ (Job 1:9, 10; 2:4). Pa ñaca qué nudii Dios lugar nuquiichinácabe ca xpinni, cadi dxandíʼ nihuinni napa Binidxabaʼ razón la? Ne pa nulabe guiráʼ binni guidxilayú de lu náʼ cani ruquiichináʼ laacaʼ, nucaabe laacaʼ ñuni crecaʼ ti cosa ni cadi dxandíʼ: zanda gaca mandarcaʼ stúbicaʼ sin gacané Dios laacaʼ. Peru Biblia ruzeeteʼ cadi lu náʼ binni nuu quixhe ximodo guibani (Jeremías 10:23). Caquiiñenu gueeda Reinu stiʼ Dios purtiʼ zacatiʼ nga zaree guiráʼ cosa ni cadi jneza.

Ñee pur nga zanda guininu guiidxináʼ Dios la? Coʼ; nuu chupa cosa ni maʼ cayúnibe. Primé la? cusihuínnibe ca binni ni cuquiichináʼ stobi. Lu Stiidxabe zeeda guiráʼ ni biʼniʼ Jezabel para biiti Nabot. Biblia laaca ruzeeteʼ nuu tobi cayuni mandar lu Guidxilayú riʼ ne laa nga rucaa laacabe gúnicabe guiráʼ cosa malu nuu yanna, peru ruyúbibe modo cadi ganna binni tu laabe (Juan 14:30; 2 Corintios 11:14). Tu laabe yaʼ. Laabe nga Binidxabaʼ. Racané Dios laanu para cadi gúninu cosa malu purtiʼ rusihuínnibe cani ne guiráʼ cani ruquiichináʼ binni ne zaqueca tu rucaa laacaʼ gúnicaʼ ni. Zacá nga rápabe laanu ti ganda guibáninu sin qué chuʼ dxi gátinu.

Guiropa la? cayabi Dios laanu zabee guiráʼ cani ruquiichináʼ binni. Modo bisihuínnibe, biʼniʼ juzgarbe ne biʼniʼ castigarbe Acab ne Jezabel né guiráʼ binni ni biʼniʼ casi bíʼnicaʼ, racaneni laanu guni crenu zúnibe ni maʼ guniʼbe: zabídxibe cuenta guiráʼ ca binni malu (Salmo 52:1-5). Dios cayabi guiráʼ binni zabee guiráʼ cosa malu ni cayuniná ca binni Guidxilayú.b Nga runi, zanda guininu zuuyaʼ Nabot ne ca xiiñiʼ dxi gaca Guidxilayú riʼ ti Paraísu, ra maʼ qué ziuu guiráʼ cosa ni cadi jneza cayaca yanna (Salmo 37:34).