NI RINABADIIDXAʼ CANI RUUNDAʼ

Ximodo nánnanu biʼniʼ ganar ca israelita guidxi Jericó lu chupa chonna gubidxa si.

Josué 6:10-15, 20 na bidii ca israelita buelta guidxi Jericó ti biaje cada dxi lu xhoopaʼ gubidxa. Lu gadxe gubidxa que bidiicabe buelta ni gadxe biaje, de raqué bisaba Jiobá ca muru naroʼbaʼ stiʼ guidxi que. Óraque biuu ca soldadu que ndaaniʼ guidxi que ne biʼniʼ ganarcaʼ ni. Ñee huadxela ca arqueólogo xiixa prueba ni gusihuinni biʼniʼ ganar ca israelita guidxi Jericó lu chupa chonna gubidxa si la?

Ca ejércitu guyuu dxiqué gúpacaʼ costumbre de uguucaʼ leʼ ca guidxi napa muru ni racaláʼdxicaʼ guni ganarcaʼ, qué rudiicaʼ lugar chuʼ binni o guiree binni ndaaniʼ guidxi que. Ca binni ni maʼ naguucabe leʼ xquidxi que la? rocaʼ guendaró si ni nápacaʼ. Ora maʼ biʼniʼ ganar ti ejércitu guidxi que la? riuucaʼ ndaaniʼ ni ne ricaacaʼ guiráʼ cosa risaca nuu raqué, lade cani nga nuu ca guendaró ni biaana. Peru ca arqueólogo ni gundaa lade ca ruina stiʼ Jericó bidxélacaʼ stale guendaró. Revista Biblical Archaeology Review na: «Bidxélacabe bisiʼñaʼ stiʼ traste de yú, peru ni jma bidxélacabe lade ca ruina que nga biidxiʼ». Nabé risaca ndiʼ. Xiñee yaʼ. Revista que caniʼruʼ: «Qué huayuu dxi guidxela ca arqueólogo xiixa sicaríʼ guidxi Palestina. Nuu tiru ridxélacabe tobi o chupa guisuhuiiniʼ dxaʼ biidxiʼ, peru qué huayuu dxi guidxélacabe stale. Guizáʼ bidxagayaa binni ni bidxélacabe riʼ».

Biblia na gupa ca israelita razón galán para cadi chinecaʼ biidxiʼ o guendaró nuu ndaaniʼ guidxi Jericó: biʼniʼ mandar Jiobá laacabe cadi gúnicabe ni (Josué 6:17, 18). Laaca ruzeeteʼ Biblia bicaalúcabe guidxi que despué de gundísacaʼ cosecha (lu beeu marzo o abril), dxi nuu stale biidxiʼ (Josué 3:15-17; 5:10). Ra bidxélacabe stale guendaró lade ca ruina stiʼ Jericó riʼ, rusihuínnini chupa chonna gubidxa si nga guluucabe leʼ guidxi riʼ, casi na Biblia.