Ñee nannuʼ ni la?
Ñee zanda guni crenu rudxiibaʼ tuuxa guixi malu lu layú stiʼ sti binni tiempu gucuá Biblia la?
Ti copia ni guca lu iza 1468 stiʼ Digesto ni bicaa emperador Justiniano, laani nga tobi de ca documentu ni cusiene chaahuiʼ ximodo biquiiñecabe ca ley stiʼ Roma dxiqué.
LU MATEO 13:24-26 zeeda caadxi diidxaʼ guníʼ Jesús: «Modo runi mandar Dios zeda gaca casi ti hombre bisaba semiá ndaani ñaa stiʼ, peru laga nisiaasi binni, beeda tuuxa nanalaʼdxi laabe ne bidxiiba baladxi [o guixi malu] lade semiá que ne zeʼ. Dxi ma biniisi semiá que, ma cabee guieʼ bihuinni nuu baladxi que lade». Neca nuu de cani rucaa libru qué runi crecaʼ pa dxandíʼ relatu ca, nuu documentu ni napa ca romanu ra na dxandíʼ ni.
Ti diccionariu ni riníʼ de Biblia na: «Gudxiibacabe guixi malu lu ti layú para guquíxecabe ni biʼniʼ tuuxa laacabe la? [...] cucheenécabe ley stiʼ Roma. Pa guyuu ti ley ni caníʼ de laani, nga riníʼ nanna binni huayaca ni». Alastair Kerr, ti especialista de tema legal na, lu iza 533, emperador romanu Justiniano gulee ti Digesto, caadxi ley ni gupa Roma ra zeeda caadxi textu stiʼ ca jurista tiempu bisaca ca derechu gupa ca romanu (100-250 d.J.). Casi na obra riʼ (Digesto, 9.2.27.14), jurista Ulpiano guníʼ de ti guendanagana ni biʼniʼ tender Celso, ti políticu romanu ni bibani lu guiropa siglu: tuuxa bidxiibaʼ guixi malu lu layú stiʼ sti binni ne guca feu cosecha stiʼ. Digesto que bisiene pur ca ley que xi zanda guni xpixuaanaʼ layú que para ganda quixe ni biʼniʼ feu cosecha que laabe.
Casi maʼ bidúʼyanu ca, bizaaca ca cosa riʼ lu Imperiu romanu, nga rusihuinni dxandíʼ bizaaca ni guníʼ Jesús lu relatu que.
Xii nga cani bidii Roma lugar guni ca autoridad judíu lu primé siglu.
TIEMPU que biquiiñeʼ ca romanu que ti gobernador ne caadxi hombre ni nuu lu ejércitu para guni mandarcaʼ Judea. Dxiiñaʼ jma risaca runi gobernador que nga gutopa bueltu ni riguixe ca judíu que impuestu para Roma ne guʼyaʼ chuʼdxí binni ne cadi tinde. Ca romanu que ruuyacaʼ cadi gucheené binni ley raqué ne cani runi ni rinécabe laacaʼ nezalú justicia. Ca romanu que rudiicaʼ lugar guni mandar ca xaíque ni nuu Judea que ca guidxihuiiniʼ ni nuu gaxha.
Ti sesión stiʼ Sanedrín judíu
Sanedrín que nga beeda gaca tribunal supremo stiʼ ca judíu ne cani ruuyaʼ chinanda binni ley. Laaca guyuu xcaadxi tribunal guidubi guidxi Judea ni ruuyaʼ gaca chaahuiʼ guendanagana gapa binni ne xcaadxi jma naroʼbaʼ casi ora guuticabe tuuxa, sin uguu ruaa Roma laacaʼ. Peru ca tribunal judíu que, qué zanda guiniʼcaʼ pa naquiiñeʼ gatiʼ tuuxa ni guni xiixa. Óraca Roma si nga naquiiñeʼ guiníʼ xi gaca. Peru lu ti casu ra qué ñaca ni zaqué nga stiʼ Esteban, purtiʼ Sanedrín que nga biʼniʼ juzgar laabe ne despué bichácabe guié laabe (Hechos 6:8-15; 7:54-60).
Casi maʼ bidúʼyanu ca, gupa Sanedrín que stale autoridad. Peru casi guníʼ ti historiador ni láʼ Emil Schürer, «guyuu cosa ni qué ñanda ñúnicabe, guyuu biaje ca romanu que biʼniʼ mandarcaʼ laasicaʼ sin nulábicaʼ laacabe, casi dxi guníʼ íquecabe nuu ti guendanagana lu política stícabe». Ti ejemplu ni nuu nga ni biʼniʼ comandante militar Claudio Lisias ora gunaazeʼ apóstol Pablu, laa naca de Roma (Hechos 23:26-30).