Zanda gúninu ni cabeza Jiobá de laanu
1. Xii ndiʼ cani zadxagalunu nuu tiru ne xiñee naquiiñeʼ gudxiilunu cani.
1 Pa gúninu cani na ley stiʼ Jiobá ne xcaadxi ni cusiidibe laanu ndaaniʼ Biblia la? zabáninu jma galán yanna riʼ, ne zacané cani laanu para icaanu ni zeeda ca: ti guendanabani ni qué ziuu dxi guiluxe (Sal. 19: 7-11; 1 Tim. 6:19). Peru, guiráʼ cani nuu ndaaniʼ guidxilayú stiʼ Binidxaba riʼ la? nabé rucaabieque cani laanu. Ne guendaruchee stinu riʼ laaca rúnini jma nagana para laanu gúninu ni na Jiobá. Laga cayúninu stipa pur gúninu cani canabaʼ Jiobá laanu la? nuu tiru zándaca guni sentirnu maʼ bidxáganu (Sal. 40:12; 55:1-8). Zándaca dede guinabadiidxanu laanu pa zanda gúninu guiráʼ cani cabeza Jiobá de laanu. Xi zacané laanu ti cadi gusaananu de gúninu ni na Jiobá ora maʼ nuunu zacá yaʼ.
2. Xiñee ndiʼ rinabaʼ Jiobá laanu cani zanda si gudiʼnu laabe.
2 Ca ley stiʼ Jiobá cadi nagana diʼ cani. Jiobá qué ziuu diʼ dxi guinábabe laanu ni qué zanda gudiinu laabe. Ca ley stibe cadi nagana diʼ cani, sínuque racané cani laanu (Deu. 10:12, 13; 1 Juan 5:3). Laabe ruuyabe ra nadanu, «ne rietenaláʼdxibe de que yú laanu» (Sal. 103:13, 14). Pur riubaláʼdxibe laanu nga ricaabe ca stipa rúninu pur gúninu ni nabe, neca cadi stálepeʼ ni cudiinu laabe pur modo nabáninu yanna (Lev. 5:7, 11; Mar. 14:8). Dios cayabi laanu gulaanu cani nuanu ca luguiabe, ne laabe nabe dxandipeʼ zacanebe laanu para cadi gucheenenu laabe (Sal. 55:22; 1 Cor. 10:13).
3. Ximodo runi Jiobá laanu nadipaʼ para guni huantarnu.
3 Naquiiñeʼ guni huantarnu. Ca historia stiʼ cani qué nucheené Jiobá casi Eliás, Jeremiás ne Pablu la? rusihuinni cani xiñee naquiiñeʼ guni huantarnu (Heb. 10:36). Jiobá gucané laacabe ca dxi gudíʼdicabe ra nagana ne ca dxi bidxágacabe (1 Rey. 19:14-18; Jer. 20:7-11; 2 Cor. 1:8-11). Yanna riʼ la? laaca racané laanu nga gánnanu de ca bíchinu ne de ca bizánanu ni qué rusaana Jiobá (1 Ped. 5:9). Guiníʼ íquenu cani bizaaca ca la? racané cani laanu para cadi guireenu gana.
4. Xiñee ndiʼ naquiiñeʼ cadi gusiaandanu cani maʼ bizaabiruaa Jiobá yaʼ.
4 Cuézanu gaca cani maʼ bizaabiruaa Dios ca la? «nga nga ni [ri]naaze dxiichi ladxidóʼ no [...] casi rinaaze ancla barcu para qué iniibi» (Heb. 6:19). Bicaani Abraan ne Sara guzuubacabe diidxaʼ ora Jiobá gunabaʼ laacabe gusaanacabe lídxicabe ne chindézacabe guidxi ni na Dios gudii laacabe que. Bidiini stipa Moisés para guca ti binni nadxibalú, ne zacá biʼniʼ adorarbe Dios jneza. Bidiini stipa Jesús para bini huantar yaga que (Heb. 11:8-10, 13, 24-26; 12:2, 3). Ra cadi gusaananu de gápanu fe lu cani maʼ bizaabiruaa Dios de ti guidxilayú cubi ra zaca puru si ni jneza ca la? laaca zacané ni laanu para cadi gusaananu de gúninu ni nabe (2 Ped. 3:11-13).
5. Xiñee galán nga guiníʼ íquenu cani maʼ huazaacanu sin gusaananu Jiobá.
5 Guiníʼ íquenu cani maʼ huazaacanu sin qué gusaananu Jiobá, guiráʼ ni maʼ bíʼninu pur gacanenu stobi neca gacananu ne gúninu ni ne guendanadxibalú la? laaca rudii cani stipa laanu para gúninu xhiiñaʼ Jiobá (Heb. 10:32-34). Rusietenaláʼdxini laanu guendanayecheʼ ni runi sentirnu ora rudiʼnu Jiobá ni canabaʼ laanu: guni adorarnu laabe de guidubi ladxidoʼno (Mat. 22:37).