Gúninu ni maʼ uninu ra acanenu binni chinanda Cristu
1, 2. Ximodo ruuyaʼ Jiobá gúninu ni maʼ uninu.
1 Ndaaniʼ Salmo 15:4 rihuinni ximodo ruuyaʼ Jiobá gúninu ni maʼ uninu :«Maʼ guníʼ guni ni malu, peru qué ruchaa diʼ ni». Nuu lugar la? maʼ biaa binni iníʼ guni xiixa o cheʼ paxa raa ne qué runi diʼ ni. Zándaca dede nahuiinicaʼ irutiʼ tu nusiidiʼ laacaʼ de que naquiiñeʼ gúnicaʼ ni maʼ uniʼcaʼ.
2 Xi naquiiñeʼ guni cani zinanda Cristu yaʼ. Casi pa gúdxinu tuuxa ibiguétanu ra nuu para acanenu laa chulaʼdxiʼ iziidiʼ jma o para gúʼndanenu laa Biblia la? zándaca chuʼ sti cosa ni jma cuidxi laanu gúninu. Nuu biaje nabé nagana raca para laanu gúninu ni maʼ gudixhe íquenu.
3. Ximodo zanda cueendunu ni galán ora gúninu ni maʼ uninu.
3 Biiyaʼ de que ribeendunu ni galán ora gúninu ni maʼ uninu. Ti baʼdudxaapaʼ bicaabe ti guiʼchiʼ ra raca dxiiñaʼ stiʼ ca testigu stiʼ Jiobá Méjicu, nabe: «Raca chonna iza biseendaʼ ti guiʼchiʼ ra canabaʼ ti libru ni láʼ ¿Existe un Creador que se interese por nosotros?, izáʼ biecheʼ ora bidii ti testigu stiʼ Jiobá ni naa, ne uniʼbe de que zeeda guundanebe naa. Lu ti iza si bichaa stale, bizuluaʼ bicheecheʼ diidxaʼ ne 11 stiʼ octubre 2003 guyuaanisaʼ. Yanna la? benda ne bizánacaʼ maʼ cayuneniáʼ laatu dxiiñaʼ riʼ. Yanna maʼ ruundaniáʼ chupa binni, ne ndaayaʼ stiʼ Jiobá caniisicabe lu stiidxabe».
4. Xi ejemplu ruluíʼ de que naquiiñeʼ gúninu xhiiñanu de acanenu binni ni dxandíʼ racalaʼdxiʼ iziidiʼ.
4 Ñee nibeendú ni rucheeche diidxaʼ riʼ ni galán pa qué nibiguétabe para ñacanebe baʼdudxaapaʼ ca la? Stobi riʼ maʼ gadxé modo bizaaca, ti dxaapahuiiniʼ de 10 iza bicaa sicaríʼ: «Nabé riulaʼdxeʼ ñuundanécabe naa ra lidxeʼ, ne maʼ xadxí huanabaʼ ni. Maʼ huadxiñaʼ ca baʼdudxaapaʼ ni rucheeche diidxaʼ ca ora ridxagaluaʼ laacabe lu caye ne huayabeʼ laacabe xi racalaʼdxeʼ, rábicabe naa ziécabe peru qué riédicabe, ne naa racalaʼdxeʼ acaʼ ti testigu stiʼ Jiobá ne nuaa iziideʼ ni racalaʼdxiʼ Dios gúninu para usiecheʼ laabe, ne zacá acaʼ tobi de cani chiguibani sin qué chuʼ dxi gáticaʼ». Ñee cadi raʼbuʼ de que naroʼbaʼ nga dxiiñaʼ nápanu de acanenu ca binni ni dxandíʼ racalaʼdxiʼ iziidiʼ ca la?
5. Xi zándaca gueeda aca pa qué guni tenderluʼ cani cayuundaneluʼ.
5 Pa cayuundaneluʼ tuuxa la? cadi usaana de chigannuʼ laabe, zanda guʼnuʼ ni iráʼ semana; peru pa qué guʼnuʼ ni maʼ uniʼluʼ la? binni ca zareebe gana ne maʼ qué ziuláʼdxidibe ucaadiágabe.
6. Ximodo uluinu de que nácanu ti maestru ni nanna usiidiʼ.
6 Xi clase de maestru nácanu yaʼ. Ora rininu ibiguétanu para acanenu binni chulaʼdxiʼ iziidiʼ jma o para gúʼndanenu laabe, ñee rúninu ni maʼ uninu ca la? Pa maʼ biaananenu tuuxa gúʼyanu laa ne udíxhenu ti ora, ñee riuunu hora ni maʼ udíxhenu ca la? Jiobá nga naguixhe ejemplu ca nezalunu: qué nucheenédibe ca xpínnibe ne qué nireecuedibe de ni dxandíʼ, pur nga runi crenu cani maʼ bizabiruaabe (Jos. 23:14).
7. Xi zabeendunu pa gúninu ni maʼ uninu, ra acanenu binni chinanda Cristu.
7 Binni runi cré cani runi ni riníʼ. Jiobá laaca ribézabe de que ca xpínnibe gannadxíchicaʼ unáʼ nga xhiiñacaʼ ne gúnicaʼ ni. Pa racaláʼdxinu aca xhamígunu Dios la? naquiiñeʼ gúninu ni maʼ uninu; neca maʼ uninu gúninu ni malu para laanu, cadi uchaadinu cani ra ireecueʼnu de ni maʼ uninu. Gúninu ni maʼ uninu ra acanenu binni chinanda Cristu, ti zacá idxíñacabe para guni adorárcabe Dios ni dxandíʼ ca (Sal. 31:5).