Dxi stiʼ Jiobá maʼ nuu gaxha
1 Ca xpinni Cristu izáʼ maʼ racaláʼdxicaʼ gueeda dxi stiʼ Jiobá, dxi unitilube iráʼ ca cosa malu nuu yanna riʼ. Tiidiʼ si dxi riʼ zuzulú ti guidxilayú cubi ra iráʼ binni zuni puru si ni jneza (2 Ped. 3:12, 13). Cumu qué gánnanu padxí nga gueeda ni la? naquiiñeʼ gatananu ne acanenu xcaadxi guni zacá (Eze. 33:7-9; Mat. 24:42-44). Iníʼ íquenu ni cá lu Stiidxaʼ Dios la? zacané nga laanu guni crenu jma maʼ gaxha nuu dxi stiʼ Jiobá (Sof. 1:14).
2 Ziasa gadxé gadxé guidxi roʼ ni nadipaʼ. Lu Apocalipsis 17:9-11, apóstol Juan ruzeeteʼ de «gadxe rey», ni zeeda ácacaʼ gadxe guidxi roʼ ni nadipaʼ ni ziasa. Laaca riniʼni de stobi ne ndiʼ rizaa «xhono rey », ne nga nga naca nagasi ca guidxi roʼ ni rúnicaʼ dxiiñaʼ tobi si ni láʼ Naciones Unidas. Ñee zabézanu ireeruʼ xcaadxi guidxi roʼ ni nadipaʼ la? Coʼ, purtiʼ ora ihuinni últimu rey ca Biblia na zanitilú ni, de racá maʼ qué rieeteʼ diʼ nin sti rey lu guidxilayú riʼ. Ñee qué racané ndiʼ lii gánnaluʼ xii ndiʼ ca dxi nabáninu la?
3 Daniel 2:31-45 rusiene chaahuiʼ laanu ximodo nga gueeda dxi stiʼ Jiobá. Lu ca diidxaʼ riguixhená riʼ, rihuinni ti hombre de gadxé gadxé clase guiibaʼ uyaʼné ni uníʼ xcaandaʼ Nabucodonosor ne reeda ácani iráʼ ca guidxi roʼ ni nadipaʼ ni huayuu lu guidxilayú riʼ. Ne maʼ bihuinni iráʼ cani. Yanna, xi tiempu ndiʼ nabáninu yaʼ. Zanda ininu maʼ nabáninu ni zeeda aca ñee hombre ni uníʼ xcaandaʼ Nabucodonosor que. Stiidxaʼ Dios rabi laanu xi chigaca despué: zunitilube iráʼ xixé gobiernu ni nuu ndaaniʼ Guidxilayú riʼ ti maʼ chuʼ lugar para ti gobiernu ni qué ziuu dxi guinitilú. Yanna maʼ bidiiluʼ cuenta pabiáʼ maʼ gaxha nuu dxi stiʼ Jiobá la?
4 Nuuruʼ jma razón. Nuuruʼ jma ni cusihuinni maʼ gaxha nuu dxi stiʼ Jiobá. Casi yanna, cayúʼyanu cayaca cani uníʼ apóstol Pablu modo zaca binni lu ca «últimu dxi» riʼ (2 Tim. 3:1-5). Ne laaca cayacanenu lu ti dxiiñaʼ cayaca lu idubi naca Guidxilayú de usíʼdinu binni Stiidxaʼ Dios ante iluxe guidxilayú riʼ (Mat. 24:14). Nga runi, dxiiñaʼ rúninu ca naquiiñeʼ usihuínnini dxandíʼ rizaláʼdxinu ca diidxaʼ uníʼ ángel riʼ: «Laidxibi Dios ne lausisaca laa, purti ma bidxiña dxi cuidxi cuenta binni» (Apo. 14:6, 7).