Chinenu ca diidxaʼ nacubi ne galán riʼ ra nuu iráʼ binni ganda chuunu
1. Xi biʼniʼ ca primé xpinni Cristu para gunda bicheechecaʼ ca diidxaʼ nacubi ne galán que ra nuu jma binni yaʼ.
1 Ca primé discípulo stiʼ Jesús izáʼ uyuuláʼdxicabe chigucheechecabe stiidxaʼ Reinu, ngue runi biyúbicabe ximodo ganda chinécabe ca diidxaʼ nacubi ne galán que ra nuu iráʼ binni. Primé la? ca xpinni Cristu ni bicaa Biblia, bicaacabe ca diidxaʼ gudxi Dios laacabe lu diidxaʼ griegu ni jma uníʼcabe dxiqué, ne laaca ngueca nga diidxaʼ ni jma uníʼ binni iráʼ ca guidxi ra biʼniʼ mandar Roma. Peru cadi ngue si diʼ, cani rucheeche diidxaʼ ni bibani lu iropa ne guionna siglu despué de guti Cristu, zándaca laaca laacabe nga bizulú bicaacabe Stiidxaʼ Dios lu libru, ne zaqué maʼ qué ñácapeʼ nagana para ca binni que nuyúbicaʼ ndaaniʼ cani casi uca nagana para laacabe ne ca rollo que.
2, 3. 1) Ximodo cayaca ni na Isaías 60:16 yanna riʼ. 2) Ximodo caquiiñeʼ ca cosa nacubi caree yanna riʼ para ganna binni guni adorar Dios jneza yaʼ.
2 Caquiiñeʼ ca cosa nacubi caree yanna. Isaías ni udixhená que bicaa caadxi diidxaʼ ni gudxi Jiobá laa chigaca: «Dxandipeʼ zádxiluʼ niidxi stiʼ ca guidxi roʼ ca» (Isa. 60:16). Cumu maʼ cayaca ni na ca diidxaʼ riguixhená ca yanna riʼ la? ca xpinni Dios caquiiñecabe iráʼ cani risaca napa ca guidxi roʼ ca para ucheechecabe diidxaʼ jma. Casi iza 1914, ante gunibiáʼ binni ca película ne ridxi, ca testigu stiʼ Jiobá o casi biree lácabe dxiqué cani Ruundaʼ Biblia, bizulú bitiidicaʼ Foto-Drama de la Creación (casi ti película ni cuzeeteʼ modo guyáʼ iráʼ cosa). Laani úcani de xhono hora ni, ne gúpani ridxi ne gúcani de color, biquiiñeʼ ni para gunda bireeche diidxaʼ ranuu millón de binni.
3 Yanna riʼ, xquidxi Dios caquiiñeʼ ca máquina ni jma nacubi ni rúnicaʼ dxiiñaʼ ne computadora ne nabé nagueenda cani, para aca Biblia ne xcaadxi guiʼchiʼ ni riquiiñenu lu stale diidxaʼ. Nagueenda rié iráʼ ca guiʼchiʼ cayaca ca purtiʼ nuu stale tipu carru ne avión ni randa risaana cani dede ra jma zitu lu Guidxilayú, ne rié cani ra nuu binni de 235 guidxi roʼ. Jiobá caquiiñeʼ espíritu stiʼ para cayacané ca xpinni ti ganda iquiiñecaʼ iráʼ cosa nacubi nuu yanna riʼ ne zacá ganna jma binni cani dxandíʼ rusiidiʼ Biblia.
4. Xi cayuni stale lu endanabani stiʼ para ganda chinecaʼ ca diidxaʼ nacubi ne galán riʼ ra nuu jma binni.
4 Uyúbinu modo gúninu jma dxiiñaʼ. Cani dxandíʼ runi adorar Dios la? laaca izáʼ riuláʼdxicaʼ uchaacaʼ modo nabánicaʼ para chinecaʼ ca diidxaʼ nacubi ne galán riʼ ra nuu jma binni. Stale tu riguixhe chaahuiʼ modo nabani ti ganda chigucheeche diidxaʼ jma. Stuudxi la? huareecaʼ de xquídxicaʼ ne maʼ zecaʼ ra jma caquiiñeʼ tu chigucheeche diidxaʼ. Ne xcaadxi caziidicaʼ sti diidxaʼ ni riníʼcabe Méjicu, ni riníʼcabe sti guidxi o seña para gúnicaʼ jma lu xhiiñaʼ Jiobá.
5, 6. Xi zándaruʼ gúninu para chuunu ra nuu jma binni neza ra rucheechenu diidxaʼ.
5 Laaca zanda gábinu binni ca diidxaʼ nacubi ne galán riʼ ra inínenu laacabe ora maʼ nuucabe ra lídxicabe, ne ra ganda idxélanu laacabe. Pa neza ra rucheecheluʼ diidxaʼ qué riuupeʼ binni ra lidxi ridxí, ñee zanda chigánnaluʼ laacabe jma huadxí la? Nuu lugar ra riuu stale binni ra zanda ucheecheluʼ diidxaʼ la? Maʼ huaníʼneluʼ binni pur teléfono o ca ra ridoo ca la? Ruyubuʼ ucheechuʼ diidxaʼ ora tiisi ne ra tiica zeluʼ la?
6 ¡Izáʼ nga riéchenu purtiʼ randa rúninu xhiiñaʼ Jiobá ne rininu de labe ne de Reinu stibe! Cadi usaana de chinenu ca diidxaʼ ni rudii endanabani zeeda lu Stiidxaʼ Dios ra nuu iráʼ binni ganda chuunu (Mat. 28:19, 20).