Ácanu casi Jiobá, ti «Dios ni nayecheʼ»
1 Dxandíʼ nga racalaʼdxiʼ Jiobá chuʼ binni nayecheʼ. Stiidxaʼ Dios rusiécheni laanu ora ruzeeteni de ca ndaayaʼ izáʼ sicarú ni chigudiibe binni guidxilayú (Isa. 65:21-25). Nga runi, naquiiñeʼ usihuínninu nuunu nayecheʼ ora ininu ca diidxaʼ nacubi ne galán stiʼ Dios ni nayecheʼ riʼ (1 Tim. 1:11). Modo inínenu binni ora maʼ ziucheechenu diidxaʼ naquiiñeʼ usihuínnini pabiáʼ nadxiinu ni rusiidiʼ Biblia ne pabiáʼ rizaaláʼdxinu binni (Rom. 1:14-16).
2 Dxandíʼ, nuu tiru raca nagana para laanu usihuínninu nuunu nayecheʼ. Zándaca huaxiéʼ nga tu ucaadiaga laanu ora maʼ ziucheechenu diidxaʼ o zándaca laapenu cadiidinu lu xiixa endanagana. Peru para cadi usaananu de chuʼnu nayecheʼ la? naquiiñeʼ iníʼ íquenu pabiáʼ caquiiñeʼ ucaadiaga binni ne guiene ca diidxaʼ nacubi ne galán ni rucheechenu ca (Rom. 10:13, 14, 17). Ra iníʼ íquenu cani uninu ca la? zacané cani laanu cadi usaananu de chuʼnu nayecheʼ ora maʼ ziguinínenu ca binni ca cani maʼ udixhe Jiobá para acané laanu ilanu purtiʼ riubaláʼdxibe binni.
3 Ininu ni acané binni. Laaca naquiiñeʼ idúʼyanu xi ininu. Neca uzulú inínenu binni de xiixa endanagana, o xiixa ni uca ni nabé cuzeeteʼ binni la? cadi naquiiñeʼ diʼ ininu puru si de laacani. Dxiiñaʼ stinu nga chinenu ca «diidxaʼ nacubi ne galán stiʼ xiixa ni jma sicarú» (Isa. 52:7, Rom. 10:15). Ca diidxaʼ rucheechenu caníʼ cani de caadxi cosa sicarú bizabiruaa Dios guni lu ca dxi ni zeeda ca (2 Ped. 3:13). Ne ora ininu cani la? naquiiñeʼ iquiiñenu ca textu stiʼ Biblia para «guchenda[nu] venda cani cayuubaʼ ladxidóʼ» (Isa. 61:1, 2). Pa gúninu zacá la? nga zacané laanu chuʼnu nayecheʼ iráʼ ora.
4 Ora inínenu binni de Stiidxaʼ Dios la? zudiicabe cuenta binni nayecheʼ laanu. Nga runi, cadi usaananu de usihuínninu nácanu casi Jiobá, ti «Dios ni nayecheʼ», ora chiguininenu ca binni nabeza neza ra rucheechenu ca diidxaʼ nacubi ne galán stiʼ Reinu.