Gacanésaanu
1. Xi zanda gusihuínninu ora chiganna binnigola ni riganna ca neza binni ridagulisaa laanu.
1 Apóstol Pablu bicaa ra nuu ti neza binni ridagulisaa ni guyuu Roma, nabe: «Napa stale gana guuya laatu para acaniá laatu guiene chaahui tu stiidxa Dios ti uzuhuaa chaahui tu. Ne zacá zacané saa nu pur fe stinu, purti zacané tu naa pur fe stitu, ne zacaniá laatu pur fe stinneʼ» (Rom. 1:11, 12). Ca dxi stinu riʼ, ora reeda binnigola ni riganna ca neza binni ridagulisaa laanu, laaca zanda gusihuínninu «racanésaanu pur fe stinu» ora guidagulisaanu.
2. Xiñee rieeteʼ dede ante ra ridagulisaanu padxí chiganna binnigola ni riganna ca neza binni ridagulisaa laanu.
2 Ra ridagulisaanu. Chonna beeu ante, ra ridagulisaanu rieeteʼ chigueeda binnigola ni riganna ca neza binni ridagulisaa ra nuunu. Xiñee yaʼ. Para cuaquiʼ chaahuinu tiempu stinu ti zacá ganda gucheechenu diidxaʼ semana ca biaʼ gándatiʼ (Efe. 5:15, 16). Pa rúniluʼ dxiiñaʼ la? zanda guinábaluʼ permisu patrón stiluʼ para gucheecheneluʼ binnigola ca diidxaʼ. Zanda gácaluʼ precursor beeu cheʼ binnigola ni riganna ca neza binni ridagulisaa ca laatu. Peru pa zareeluʼ de viaje semana ca la? xiñee qué guchaaluʼ ni ti zacá chuʼluʼ ora chiganna binnigola ca laatu yaʼ.
3. Xi zanda guni cada tobi de laanu para gacané binnigola ni riganna ca neza binni ridagulisaa laanu.
3 Xi para rié binnigola ni riganna ca neza binni ridagulisaa ra nuunu. Para uguube gana ne gacanebe laanu gucheechenu diidxaʼ. Xiñee qué guinábaluʼ guireeneluʼ laabe, o xheelabe, pa maʼ bichaganabe yaʼ. Bíʼchinu ca riuulaʼdxiʼ guireené gadxé gadxé ni rucheeche diidxaʼ, neca qué gánnapecaʼ o caquiiñeʼ gacanécabe laacaʼ modo gúnicaʼ xiixa ora maʼ zigucheechecaʼ diidxaʼ. Guiranu zanda guizíʼdinu modo ruzulú guiníʼnebe binni de yoo pur yoo ne guizíʼdinu de ca conseju ni gudiibe laanu (1 Cor. 4:16, 17). Pa guni invitarnu laabe ra lídxinu para gobe la? laaca ziúʼnenu laabe nayecheʼ (Heb. 13:2). Ne cumu lu ca libana stibe zaniʼbe paraa caquiiñeʼ gúninu dxiiñaʼ la? riquiiñeʼ gucaadiaga chaahuinu cani.
4. Ximodo zanda uguʼnu gana binnigola ni riganna ca neza binni ridagulisaa ca.
4 Binnigola ni riganna ca neza binni ridagulisaa. Apóstol Pablu laaca gupa guendanagana ne guyuu xizaa cásica gupa ca bíʼchibe ne ca bizáʼnabe ni yegánnabe dxiqué. Biquiiñebe chuʼ tuuxa ni gacané laabe ne bidiibe xquíxepeʼ pur laacani (2 Cor. 11:26-28). Ora neza binni ridagulisaa ni nuu Roma gunna zadeguyoo Pablu ndaaniʼ guidxi que la? stale de laacaʼ guzacaʼ 74 kilómetru para guidxagalucaʼ laabe luguiaa stiʼ Apio. «Ora biʼya Pablu laacabe, bidii diuxquixe Dios ne bieche ladxidóʼ.» (Hech. 28:15.) Laanu laaca zanda uguʼnu gana binnigola ni riganna ca neza binni ridagulisaa ca. Ximodo zanda gúninu ni yaʼ. Ra gusisácanu ne gucheechenenu laabe diidxaʼ semana ca (1 Tim. 5:17). Gudxi laabe nayecheʼ nuuluʼ pur gucanebe lii ne bisihuinni cayúniluʼ ni de guidubi ladxidoʼloʼ. Ziéchepeʼ bíʼchinu ca ne xheelaʼ gúʼyacaʼ fe, guendarannaxhii stiluʼ ne pabiáʼ cayuni huantarluʼ (2 Tes. 1:3, 4).
5. Xiñee guiranu caquiiñenu ugúʼsaanu gana laanu ne gacanésaanu laanu yaʼ.
5 Tuu nga cadi caquiiñeʼ uguucabe gana ne gacanécabe laa ca dxi nagana nabáninu riʼ yaʼ (2 Tim. 3:1). Gudixhe ique chuʼluʼ guidubi semana gueeda binnigola ni riganna ca neza binni ridagulisaa ca laatu. Guiranu, cásica binnigola ca zaqueca cani rucheeche diidxaʼ, zanda gacanésaanu para chuʼnu nayecheʼ. Pa gúninu zacá la? zagúʼsaanu gana laanu ne zaguidxi fe stinu (1 Tes. 5:11).