Rihuinni naguidxi fe stinu
1. Xi guiráʼ cosa ndiʼ na Jesús zuchibi binni.
1 Ca apóstol que bicaadiágacaʼ Jesús dxi guníʼ xi zahuinni dxi guibiguetaʼ ne dxi guinitilú guiráʼ ca guendaquéiquiiñeʼ ni cayaca lu guidxilayú riʼ. Bizeetebe ximodo zuuyaʼ binni guidxilayú stale cosa ni zuchibi laa, casi: guendaridinde stiʼ ca guidxi ca, ziaadxaʼ ni gó binni, zaca xu naroʼbaʼ ne ziuu stale guendahuará. Laaca bizeetebe zaca nanalaʼdxiʼ binni cani gacalaʼdxiʼ sananda laabe ne zuniná binni laacaʼ; ne dede ziuu tu zuuti laacaʼ. Ziuu tu zaníʼ cusiidiʼ Stiidxaʼ Dios peru cadi dxandíʼ, ne zabeechucaʼ stale binni. Stale binni zusaana de gannaxhii saa.
2. Xiñee guendaridxagayaa nga guireeche diidxaʼ lu guidubi naca guidxilayú.
2 Cumu zacá nga gudxi Jesús laacabe zabani binni la? zándaca bidxagayaacabe ora binadiágacabe guniʼbe zareeche ca diidxaʼ nacubi ne galán stiʼ Reinu stiʼ Dios lu guidubi naca guidxilayú (Mat. 24:3-14). Yánnapeʼ nga cadúʼyanu cayaca ni na ca diidxaʼ ca. Neca nuu stale guendanagana la? laanu ca testigu stiʼ Jiobá cadi cusaananu de gucheechenu Stiidxaʼ Dios ne stale gana. Zusaana binni de gannaxhiisaa, peru laanu zeʼ dxi jma ziyannaxhiisaanu. Nécapeʼ nanaláʼdxicabe laanu ndaaniʼ guiráʼ guidxi roʼ ca, peru casi ndaaniʼ guiráʼ cani rucheechenu diidxaʼ.
3. Pabiáʼ bidale dxiiñaʼ ni guca lu guidubi naca guidxilayú.
3 Lu ca yaza 3 dede 6 stiʼ Xhiiñaʼ Reinu ni Rúninu riʼ zeeda dxiiñaʼ biʼniʼ ca testigu stiʼ Jiobá lu iza dxiiñaʼ 2007. Pa gúʼyanu cani zaguucani gana laanu. Xiñee yaʼ. Purtiʼ bibiguetaʼ bíninu jma de mil millón de hora ora maʼ zigucheechenu diidxaʼ ne ra bisíʼdinu binni de Biblia ne maʼ zinenu dieciséis iza de cayácani zacá. ¡Rihuinni dxíchica naguidxi fe stinu! Bidale ca precursor regular ti 5.8% jma que iza gudiʼdiʼ ca, ne cani rucheeche diidxaʼ bidale 3.1% ne ca binni ni rúʼndanenu Biblia bidale 4.4% ne guyuu nisa 20.1%. ¡Nayéchepeʼ nga gánnanu nuu biaʼ gadxe millón de binni ni cadi cusaana de guni ni na Jiobá! ¡Qué huayuu dxi guidálecabe biaʼ ca! Xiruʼ guyuuláʼdxiluʼ de cani zeeda lu tabla ca.
4. Xi guendanagana bidxiilú ti hombre para gunda guyuunisa.
4 Nécapeʼ ridxagayaanu guiráʼ dxiiñaʼ ni guca ca la? galán guietenaláʼdxinu gunda guca cani pur stipa ni biʼniʼ stale binni ni nuu lu guidxilayú riʼ. Chiguidúʼyanu ejemplu stiʼ Guillermo, ti hombre ni biniisi ndaaniʼ guidxi Bolivia. Laabe gúlebe lu iza 1935, ne dede dxi nápabe gaʼ iza bizulú bíʼnibe dxiiñaʼ ra rudxiibacabe cocaína. Dede dxi nahuiinibe biaabe gásabe bandaga stiʼ cocaína para gusiaandabe dxiiñaʼ naná ni rúnibe que. De raqué bizulú güeʼ xhaatabe nisa dxuʼniʼ ne gudúʼbabe gueza. Dxi maʼ bizulú caziidiʼ Guillermo xi rinabaʼ Dios guni binni la? bisaana de niguʼbaʼ gueza ne de ñeʼ xhaataʼ nisa dxuʼniʼ. Peru ni jma nagana guca para laabe nga gusaana de gásabe bandaga stiʼ cocaína que. Cumu qué nusaanabe de ñuni orarbe Dios la? ngue gucané laabe gusaanabe ni. Dxi maʼ bisaanabe ca viciu stibe que guyuunísabe. Laabe guniʼbe sicaríʼ: «Yanna huaxa maʼ runeʼ sentir nayecheʼ ne maʼ nuaa nayá».
5. Xi racaláʼdxinu gúninu.
5 Dxandipeʼ rizaalaʼdxiʼ Jiobá binni. Laabe racaláʼdxibe guchaa binni modo nabani (2 Ped. 3:9). Laanu laaca ngaca racaláʼdxinu. Ribézanu gucaa ladxidoʼno laanu gúninu guiráʼ ni ganda para gacanenu ca binni ni gacalaʼdxiʼ gunibiáʼ Dios de guidubi ladxidóʼ, ne gannaxhiicaʼ Jiobá cásica rúninu.