Nuu xiixa ni zanda gudiʼnu Jiobá
1 Ñee nuu xiixa ni zanda gudii binni Dios la? Casi Abel, bidiibe Jiobá ca dendxuhuiiniʼ ni jma galán gúpabe, Noé ne Job la? laaca bidiicaʼ Jiobá ca maniʼ ni jma galán gúpacaʼ (Gén. 4:4; 8:20; Job 1:5). Ne cadi bidiidicabe ni laabe para guidale guiráʼ ni nápabe purtiʼ laabe nga stibe guiráʼ xixé ni nuu, sínuque ne laacani biluíʼcabe pabiáʼ nadxiicabe laabe. Yanna laanu la? laaca zanda iquiiñenu tiempu stinu, stipa ne cani risaca ni nápanu para «usisaca nu» Jiobá (Heb. 13:15).
2 Tiempu. Galán cueenu tiempu de ca cosa huaxiéʼ risaca ni rúninu purtiʼ zacá zanda gúninu jma lu xhiiñaʼ Jiobá (Efe. 5:15, 16). Casi pa quixhe chaahuinu tiempu stinu la? zanda gácanu precursor auxiliar chupa o jma beeu lu ti iza. O laaca zanda gucheechenu diidxaʼ jma que biaʼ rúninu. Casi pa gúninu sti media hora jma que biaʼ rúninu lu ti semana la? ¡biaʼsi lu ti beeu ca zúninu chupa hora jma que biaʼ rúninu!
3 Stipa stinu. Pa racaláʼdxinu gápanu stipa para ganda gucheechenu diidxaʼ ne gúninu jma lu xhiiñaʼ Jiobá la? cadi guyúbinu gúninu xiixa dxiiñaʼ ni gusidxágapeʼ laanu o pur chizanu xiixa lugar maʼ cadi gúninu xhiiñaʼ Jiobá ne stale gana. Peru laaca cadi naquiiñeʼ chúʼpenu xizaa pur xiixa cosa, purtiʼ nga laaca zanda gucueeza laanu de gúninu jma lu xhiiñaʼ Dios (Pro. 12:25). Nécapeʼ nuu razón para chuʼnu xizaa pur xiixa la? jma galán guinábanu Jiobá gacané laanu (Sal. 55:22; Fili. 4:6, 7).
4 Guiráʼ ni risaca ni nápanu. Sti modo zanda gacanenu guireeche diidxaʼ nga gudiʼnu de ca cosa risaca nápanu. Nga runi, Pablu gúdxibe ca xpinni Cristu de dxiqué cueecaʼ ti ndaa de ni runi ganarcaʼ para ganda gacanecaʼ cani caquiiñeʼ ni (1 Cor. 16:1, 2). Laanu laaca zanda gúninu zacá ti ganda gudiʼnu de ni nápanu para guiaxa ca gastu raca ra ridagulisaanu ne para dxiiñaʼ raca lu guidubi guidxilayú. Biaʼ tiica gudiʼnu, pa gudiʼnu ni de guidubi ladxidoʼno la? Jiobá zusisácani (Luc. 21:1-4).
5 Stale nga ni maʼ bidii Jiobá laanu (Sant. 1:17). Yanna laanu rusihuínninu rudiʼnu xquíxepeʼ laabe ra gudiʼnu de tiempu stinu, stipa stinu ne ca cosa risaca nápanu para gúninu ni nabe. Pa gúninu zacá la? zusiéchenu laabe, «purti nadxii Dios ni rudii [...] de idubi ladxidóʼ» (2 Cor. 9:7).