Iquiiñenu ca cosa risaca nápanu para gacanenu cuí yoo para gaca adorar Jiobá
1. Xi dxiiñaʼ caquiiñeʼ gaca ne ximodo zanda gacanenu.
1 Xquidxi Jiobá riquiiñeʼ ca cosa risaca napa pa gucuí ne guni chaahuicaʼ ca lugar ra runi adorarcaʼ laabe. Nabé caquiiñeʼ cuí jma Yoo stiʼ Reinu lu ca últimu dxi riʼ, ne para gaca nga la? caquiiñeʼ gacanenu. Ca xpinni Jiobá nabé runibiáʼ binni laacaʼ purtiʼ rudiicaʼ de ni nápacaʼ (Pro. 3:9, 10).
2, 3. Lu ca dxi stinu riʼ, ximodo maʼ huabí jma Yoo stiʼ Reinu ne xiruʼ caquiiñeʼ gaca.
2 Lu dxiiñaʼ riʼ maʼ stale guca purtiʼ ndaaniʼ guidxi Méjicu iza dxiiñaʼ 2007, gurí 357 Yoo stiʼ Reinu ¡Biaʼ ti Yoo stiʼ Reinu gurí ti dxi! Ne guiráʼ dxiiñaʼ ca guca cani pur ndaayaʼ stiʼ Jiobá ne pur gucané ca bíʼchinu ni nuu lu Grupu ni Rucuí Yoo stiʼ Reinu, ne Grupu de Binnigola ni Ruuyaʼ Cuí Yoo stiʼ Reinu ne ca xpinni Cristu ni nuu ndaaniʼ ca neza binni ridagulisaa (Sal. 127:1). Ñee riníʼ íquenu pagala biquiiñeʼ para guca guiráʼ dxiiñaʼ ca la?
3 Peru cayaadxaruʼ stale dxiiñaʼ gaca. Casi para lu beeu enero stiʼ 2008 cayaadxaruʼ cuí 1,295 Yoo stiʼ Reinu guidubi guidxi Méjicu. Ximodo zanda gacané guiráʼ cani rucheeche diidxaʼ para gaca dxiiñaʼ naroʼbaʼ riʼ yaʼ.
4. Ximodo na Biblia iquiiñenu ca cosa risaca ni nápanu.
4 Ca Yoo stiʼ Reinu ni maʼ gurí. Pa ridagulisaaluʼ ndaaniʼ tobi de ca Yoo stiʼ Reinu ni gurí lu ca últimu 15 iza gudiʼdiʼ ca la? huabeenduluʼ stale cosa ni galán de guiráʼ ni maʼ biziidiluʼ de Dios racá, pur modo laacani randa runi adorarnu Jiobá jma galán. Cabeenduluʼ stale cosa galán purtiʼ guyuu Testigu ni bidii «cosa risaca» ni napa para cuícani (Pro. 3:9). Peru nuuruʼ stale neza binni ridagulisaa ni nabé caquiiñecaʼ ti lugar para guni adorarcaʼ. Cani maʼ ridagulisaa ndaaniʼ ti Yoo stiʼ Reinu casi maʼ bizéʼtenu riʼ la? zanda gacanecaʼ para gapa xcaadxi Yoo sticaʼ ra gúnicaʼ ni na 2 Corintios 8:14: «Para gapa tu biaʼca, biaʼca. Laga napa tu yanna la? laudii cani huaxiéʼ napa, ne ora ma qué gapa tu ne napa cabe la? ma laacabe udii cabe laatu, ne zacá ziaana tu biaʼca».
5. Xi naquiiñeʼ guiduʼyaʼ chaahuinu ante quixhe íquenu pabiáʼ zanda gudiʼnu.
5 Lu beeu enero stiʼ guiráʼ iza ca, guiráʼ neza binni ridagulisaa ni riquiiñeʼ ti Yoo stiʼ Reinu ni maʼ biluxe la? riguíxhecaʼ pagala zanda gudiicaʼ «Pur iquiiñecaʼ Yoo stiʼ Reinu» ca. Guiráʼ iza ruchaacabe pagala zanda gudiicabe ti zacá cada xpinni Cristu o familia guʼyaʼ pa zándaruʼ gudii jma biaʼ ndaayaʼ cudii Jiobá laacaʼ (Deu. 16:17).
6. Xi stipa naquiiñeʼ guni ca neza binni ridagulisaa ni racalaʼdxiʼ gapa ti Yoo stiʼ Reinu.
6 Ca neza binni ridagulisaa ni qué gapa ti Yoo stiʼ Reinu nacubi. Nabé riéchenu ora guidúʼyanu ca Yoo stiʼ Reinu ni napa letreru ni na: «Yoo stiʼ Reinu stiʼ ca Testigu stiʼ Jiobá». Pa qué gápatu ti Yoo stiʼ Reinu nacubi o ni maʼ guca chaahuiʼ ne caquiiñetu gápatu tobi la? zándaca maʼ gudxi ca binnigola stitu laatu maʼ cuyúbicaʼ ti layú para cuí ti Yoo stiʼ Reinu gaxha de ra rucheechetu diidxaʼ, ne cayacané Betel laacabe para gúnicabe ni. Ximodo zanda gacanenu para ganda gápanu ti Yoo stiʼ Reinu yaʼ. Zanda gúninu ni pa chinándanu modo naguixhe ca binnigola gácani ne quíxhenu pagala zanda gudiʼnu. Ca bueltu ni gudixhe ique cada binni ridagulisaa ca gudiicaʼ zacané cani para ganda guidxela ti layú ne ganda cuí Yoo stiʼ Reinu.
7. Xi zanda guni ca binnilídxinu para gacanecaʼ.
7 Cada tóbinu zanda quixhe ique pabiáʼ gudii. Ximodo zanda guni binnilídxinu o cada tóbinu para gacanenu yaʼ. 1 Corintios 16:2 cayabi laanu ti modo zanda gacanenu: «Cada tobi de laatu, biaʼ acané Dios laa guni ganar la? cuee chu tindaa de lú ni cada domingu». Zanda guiale de ndaaniʼ ladxidoʼno gacanenu para gaca dxiiñaʼ nabé risaca riʼ. Nga runi, nabé jneza sti biaje guidúʼndanenu binnilídxinu Biblia guyúbinu ti tema ni gacané laanu ximódoruʼ zanda gacanenu para cuí jma Yoo stiʼ Reinu. Zadxélatu de laani lu w01-S 1/11 yaza 27, «Ndaayaʼ stiʼ Jiobá... nga nga ni runi binni ricu», w02-S 1/11 yaza. 26, «Ni huayaca para guni adorar binni Dios» ne jv-S cap. 21 yaza 340, «Paraa riree bueltu para gaca dxiiñaʼ ca».
8. Ximodo zanda gacanenu cada tóbinu ra cabí Yoo stiʼ Reinu ne xi ndaayaʼ zacaanu.
8 Pa guiníʼ íquenu ximodo caquiiñenu guiráʼ ni cudii Jiobá laanu la? nga zacané laanu guidúʼyanu pa cudiʼnu Dios biaʼ naquiiñeʼ (Mal. 3:10). Zanda guinabadiidxanu laca laanu: Ñee rusihuinneʼ napa fe ne runeʼ cré zacané Jiobá naa ora gudiéʼ bueltu stinneʼ la? Ñee nabé naguibeʼ para gudiéʼ la? Cani rudiʼnu ca rusihuínnicani pabiáʼ nadxiinu Jiobá ne racaláʼdxinu gacanenu para gaca xhiiñabe. Pa gudiʼnu de cani nápanu la? laacani zeeda gácacani casi na Pablu casi ñaca cudiʼnu «xquixe[peʼ] Dios» (2 Cor. 9:8-13). Jiobá riguu gana laanu gudiʼnu de cani nápanu purtiʼ zacá rusihuínninu nadxiinu laabe (Deu. 11:13-15). Despué de guidúʼyanu ximodo zanda gudiʼnu Jiobá de cani nápanu la? zándaca zaníʼ íquenu casi rey David ora guníʼ: «Tuu nga naa ne tuu nga ca binni xquidxeʼ para cadi gusigáʼdedu lii xiixa de guidubi ladxidoʼdo yaʼ. Purtiʼ guirani cudiiluʼ ne de ni huadiiluʼ cudiʼdu lii» (1 Cró. 29:14).
9. Bisiene xcaadxi modo zanda gacanenu ra cabí Yoo Stiʼ Reinu.
9 Caquiiñeʼ tu gacané. Sti modo gudiʼnu de ni nápanu nga gacanenu ra cabí Yoo stiʼ Reinu. Pa racaláʼdxiluʼ gacaneluʼ la? zanda guiníʼneluʼ tobi de ca binnigola stiluʼ ne binnigola ni riganna ca binni ridagulisaa, purtiʼ laa nanna xi dxiiñaʼ caquiiñeʼ gaca ne paraa caquiiñeʼ tu gacané. Ne pa maʼ nápaluʼ biaʼ ti iza de guyuunísaluʼ ne nápaluʼ biaʼ 19 dede 55 iza la? zanda chigacaneluʼ biaʼ chupa semana o chupa beeu ra nuu Grupu ni Rucuí Yoo stiʼ Reinu; para ganda gúniluʼ nga la? naquiiñeʼ guchaluʼ guiʼchiʼ ni láʼ Solicitud para el programa de voluntarios de construcción de Salones del Reino (A-25-S). Pa ruuyuʼ zanda gacaneluʼ biaʼ tiempu ca la? ca binnigola stiluʼ o binnigola ni riganna ca binni ridagulisaa zudiicaʼ lii ti guiʼchiʼ ca.
10. Xii nga cayúninu ora maʼ cayacanenu ra cabí Yoo stiʼ Reinu.
10 Cásica ora gucheechenu diidxaʼ ne zaqueca ora gacanenu cuí Yoo stiʼ Reinu la? cayuni adorarnu Jiobá (Apo. 7:15). Nga runi, cadi gusaananu de gacanenu ra cabí Yoo stiʼ Reinu.
[Preguntas]
[Box of page 9]
Yoo stiʼ Reinu ni maʼ biluxe
[Blurb on page 9]
Ni maʼ biluxe 31 stiʼ enero 2008
[Blurb on page 9]
Yoo stiʼ Reinu ni maʼ gurí
[Blurb on page 9]
,