Dios racalaʼdxiʼ guidúʼndanu Stiidxaʼ

¹ Xiñee nabé risaca nga ganna ca xpinni Dios gúʼndacaʼ ne gucaacaʼ. Guníʼ ique ndiʼ, guyuu stale iza qué niná ca xaíque stiʼ ca religión ni cadi dxandíʼ ca niziidiʼ binni ñuundaʼ ne nucaa, ne jma bíʼnicabe ni ne ca binni pobre. Ca binni que biziidicaʼ ni rusiidisícabe laacaʼ, peru qué ñanda diʼ ñuuyacabe pa dxandíʼ zeeda cani caziidicabe que lu Biblia. Yanna laanu, cani dxandíʼ xpinni Cristu la? nánnanu nabé risaca para guiráʼ xixenu guidúʼndanu Stiidxaʼ Dios, guiénenu ni ne gusíʼdinu ni cá luni jneza (Mat. 28:19, 20). Nga runi, rábinu binni ni deruʼ caziidiʼ de Dios ne cani rucheeche diidxaʼ, guiziidicaʼ gúʼndacaʼ ne gucaacaʼ diidxaʼ gulenecaʼ.

² Ni ribeendú binni ora nanna guʼndaʼ ne gucaa. Pa nánnanu gúʼndanu ne gucaʼnu la? zácanu binni ni jma guiene Biblia ne libru ne revista ni rusiidiʼ laanu de Dios. Cadi guiaandaʼ ndiʼ laanu: «Racalaʼdxi [Dios] ulá irá binni, ne ganna ca ni dxandíʼ» (1 Tim. 2:3, 4). Pa nánnanu gúʼndanu la? zanda guyúbinu paraa cá ni racaláʼdxinu gánnanu, zanda guidúʼndanu ni chupa chonna biaje dede ra guiénenu ni, ne zanda gúʼndanu ni ora caquiiñeʼ gúninu ni. Ne jneza nga gúninu zacá, purtiʼ nin tobi de laanu qué zanda diʼ guietenalaʼdxiʼ guiráʼ xixé ni maʼ biziidiʼ.

³ Ne laaca rusíʼdinu jma jneza ni cá lu Stiidxaʼ Dios ora nánnanu gúʼndanu. Tobi de ca razón ni nápanu para guidúʼndanu Biblia nga ni cá lu 2 Timoteo 3:17 ra na: «Ti iziidi chaahui ca xpinni Dios para ganda guni irá ni riree ndu». Dxiiñaʼ ni jma risaca ni naquiiñeʼ gúninu nga gusíʼdinu binni ca cosa nacubi ne galán stiʼ Reinu stiʼ Dios. Ne ora nánnanu gúʼndanu zanda guluinu xipeʼ nga cusiidiʼ Biblia, gábinu binni xi biʼniʼ sentir ca binni ni bicaa ni ne guidúʼndanu ca textu stini jma jneza.

⁴ Pa nánnanu gúʼndanu ne gucaʼnu la? jma zabeendunu stale cosa galán lu guiráʼ ca guiʼchiʼ ni rudii «mozo ni nuu xpiaaniʼ ne ni runi jneza» laanu. Laaca zacaneni laanu para gusíʼdinu jma jneza ca diidxaʼ nacubi ne galán stiʼ Reinu stiʼ Dios (Mat. 24:45; 2 Cor. 3:5). Laaca zanda gacanécani laanu para gúninu ti libana, gucaʼnu xiixa ora maʼ nuunu lu ca guendaridagulisaa, ora maʼ cadúʼndanu Stiidxaʼ Dios laasinu ne ora gucaʼnu ti carta para gucheechenu diidxaʼ.

⁵ Quixhe íquenu guizíʼdinu gúʼndanu ne gucaʼnu. Ora guidúʼyanu guiráʼ ni ribeendunu purtiʼ nánnanu gúʼndanu ne gucaʼnu lu stiidxanu la? maʼ qué ridxagayaadinu xiñee gudixhe Dios guizíʼdinu guiʼchiʼ para guidúʼndanu ni cá lu Stiidxabe. Yanna nga jma caquiiñeʼ gúninu cani maʼ bizéʼtenu ca purtiʼ stale cosa nga ni zabeendunu de laacani. Ca binni ni qué ganna guʼndaʼ ne gucaa la? nuu stale razón para guiziidicaʼ. Zacá nga zanda gusiidicabe ni cá lu Stiidxaʼ Dios jneza ne zúnicabe ni ne stale gana. Jiobá gudxi Habacuc ni riguixhená que: «Bicaa visión ca, ne bicaani jneza lu ca tabla ca, ti ora guʼndaʼ binni ni la? gúnini jneza» (Hab. 2:2).