Cadi gusaananu de gudiʼnu pabiáʼ dxiiñaʼ bíninu guiráʼ beeu
1 Nabé riéchenu guidúʼyanu modo cayaca ni na ca diidxaʼ guníʼ Jesús lu Mateo 24:14 ra na: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ». Nga runi, para gánnadu pabiaʼpeʼ nga careeche diidxaʼ la? rucaʼdu guiráʼ xixé dxiiñaʼ raca cada beeu.
2 Libru stiʼ Hechos racané laanu gánnanu guiráʼ ni guleendú cani bicheeche diidxaʼ ni bibani lu primé siglu que, ne nga rusihuinni nabé bisisaca ca discípulo stiʼ Cristu gudiicaʼ pabiáʼ dxiiñaʼ bíʼnicaʼ (Hech. 1:15; 2:5-11, 41, 47; 4:4; 6:7). Zacaca rácani yanna, ca guiʼchiʼ rudiitu cada beeu racanécani laadu gánnadu pabiáʼ dxiiñaʼ cayaca lu guidubi naca guidxilayú, ne zacá randa ridúʼyadu paraaruʼ caquiiñeʼ guireeche diidxaʼ ne padxí nga jma naquiiñeʼ gácani.
3 Laanu rudiʼnu pabiáʼ dxiiñaʼ bíninu cada beeu purtiʼ racaláʼdxinu gusihuínninu cayúninu dxiiñaʼ bisaanané Jiobá laanu. Ne cadi purtiʼ racaláʼdxinu gusihuínninu cayúninu jma que xcaadxi, ne qué ruchaaganu ni rúninu ne ni runi xcaadxi xpinni Cristu (Fili. 2:4). Cumu gadxé gadxé nga modo nabáninu la? qué zanda diʼ gúninu biaʼca runi stobi, peru Jiobá rusisaca guiráʼ stipa rúninu pur gucheechenu diidxaʼ. Yanna, ñee nagueendaca rudiʼnu pabiáʼ dxiiñaʼ rúninu cada beeu la? Guizáʼ galán nga gúninu zacá, purtiʼ qué riquiiñeʼ diʼ tiidiʼ nin ti beeu sin guininu de ni runi crenu (Rom. 10:9, 10).
4 Cadi gusaana de gucheechenu diidxaʼ. Gudiʼnu guiʼchiʼ ra cá pabiáʼ dxiiñaʼ bíninu cada beeu nagueendaca. Zacá la? dxiiñaʼ cayúninu ca ziuuni cuenta ne dxiiñaʼ ni cayuni millón de binni ni rusisaca Jiobá lu guidubi naca Guidxilayú (Sal. 148:12, 13).