Ndaa ra rinabadiidxaʼ
◼ Xi zanda gúninu para gacanenu gaca ca guendaridagulisaa ca ti lugar ra ganda guizíʼdinu jma (Deu. 31:12).
Cumu runi respetarnu Jiobá ne ca guendaridagulisaa ra rusiidibe laanu la? galán chindanu tempranu ne chuʼnu listu para gucaadiáganu. Jneza nga cuinu lu ca primé banguʼ ni nuu ndaaniʼ Yoo stiʼ Reinu, ne gusaananu ca banguʼ ni nuu atrá para cani napa baʼduhuiiniʼ ne para cani nuu si tiru chindá huadxí. Ante guzulú guendaridagulisaa ca, naquiiñeʼ guyúbinu modo para cadi guchiiñaʼ ca celular ca o xcaadxi casi laani cani cucaadiaga. Pa guiranu gusihuínninu runi respetarnu ca guendaridagulisaa ca la? qué ziuupeʼ ni guchiiñaʼ laanu (Ecl. 5:1; Fili. 2:4).
Ora guzulú ca nacubi ca checaʼ ca guendaridagulisaa stinu la? ti xpinni Cristu ni runibiáʼ laacabe zanda cuiné laacabe. Galán guni cani rucheeche diidxaʼ zacá, jmaruʼ si pa napa ca binni ca xiiñicaʼ ni nahuiiniʼ. Cumu nacubi cadagulisaané ca binni riʼ laanu la? zándaca jma ziuuláʼdxicabe cuícabe lu ca banguʼ nuu atrá. Zacá maʼ qué zuchiiñacabe cani cucaadiaga ora guireenécabe ca xiiñicabe para guni tendércabe laacaʼ (Pro. 22:6, 15). Cadi naquiiñeʼ diʼ cuí ca familia ca ndaaniʼ sti sala ra guni sentir ca xcuidi ca zanda gúnicaʼ ridxi. Jma galán guireené bixhózecabe o jñaacabe laacabe ti ratu para guʼyaʼ xi caquiiñecabe o para gulídxecaʼ laacabe, de racá maʼ guiuunecaʼ laacabe sti biaje.
Ca acomodador ca nga racanecaʼ para ganda gaca adorar Dios jneza ndaaniʼ Yoo stiʼ Reinu. Racanécabe ca familia ne cani nuu si tiru chindá huadxí guidxélacaʼ ra cuicaʼ, ne ruyúbicabe modo chinécabe laacaʼ lugar sticaʼ sin guchiiñacabe cani cucaadiaga. Ne maca nánnacabe xi naquiiñeʼ gúnicabe ora guizaaca xiixa. Ne pa pur cadi nuudxí ti xcuidi maʼ huaxiéʼ cucaadiaga ca binni ridagulisaa la? ruyúbicabe ximodo gacanécabe bixhózecaʼ o jñaacaʼ.
Casi maʼ bidúʼyanu ca, guiranu nga zanda gacanenu para gaca Yoo sti Reinu ti lugar ra zanda guizíʼdinu de Jiobá. Laaca rizíʼdinu ximodo naguixhe íquebe gueedanebe ti guidxilayú cubi ra zaca puru si ni jneza ne ra zabani binni nayecheʼ (Heb. 10:24, 25).