¡Caquiiñeʼ maestru ni gusiidiʼ sti diidxaʼ!
1. Xiñee raca cursu para guiziidiʼ binni sti diidxaʼ nagueenda lu guidubi Guidxilayú.
1 Jiobá maʼ guluu ndaayaʼ dxiiñaʼ ni cayúninu de «gucheechenu guiráʼ ca diidxaʼ nacubi ne galán ca» ra nuu binni ni riníʼ gadxé gadxé diidxaʼ (Hech. 20:24, NM; Apo. 7:9). «Mozo ni nuu xpiaaniʼ ne ni runi jneza» riquiiñeʼ guiráʼ ni napa para ganda chindá ca diidxaʼ nacubi ne galán ca ra nuu guiráʼ binni ni riníʼ gadxé diidxaʼ (Mat. 24:45). Nga runi, lu guidubi Guidxilayú rúnicabe cursu para guiziidiʼ binni sti diidxaʼ nagueenda. Para ganda gaca ca cursu ca la? ribícabe stale hombre guiráʼ iza para gusiidicabe laacaʼ gácacaʼ maestru.
2. Xiñee caquiiñeruʼ maestru para gusiidiʼ sti diidxaʼ.
2 Lu ca últimu gaayuʼ iza ni maʼ gudiʼdiʼ ca, maʼ biziidiʼ 144 binni para gaca maestru lu 34 diidxaʼ ni riníʼcabe Méjicu. Pur dxiiñaʼ ni huayuni ca maestru riʼ maʼ biziidiʼ jma de trece mil xpinni Cristu para gucheechecaʼ stiidxaʼ Reinu lu sti diidxaʼ gadxé de ni maca riniʼcaʼ. Lu guidubi Méjicu riníʼcabe 68 diidxaʼ ne 364 variante stiʼ ca diidxaʼ ca. Nga rusihuinni nuuruʼ stale dxiiñaʼ ni naquiiñeʼ gúninu. Yanna, pa riniʼluʼ tobi de ca diidxaʼ ca, ñee zanda guiniʼluʼ casi profeta Isaías: «¡Raríʼ nuaaʼ! Biseendaʼ naa» la? (Isa. 6:8.) Tuu nga cani zanda gaca maestru para gusiidiʼ sti diidxaʼ ne tu zanda gacané laacabe yaʼ.
3. Tuu nga cani zanda gaca maestru para gusiidiʼ sti diidxaʼ.
3 Tuu nga cani zanda gaca maestru. Ni jma riquiiñeʼ para gaca tuuxa maestru nga gusihuinni maʼ biniisi lu stiidxaʼ Dios. Nga runi jma ruyúbicabe ca binnigola ne ca siervu ministerial. Nécapeʼ cadi nexheʼ hasta panda iza nga naquiiñeʼ gapa tuuxa la? zanda gácacabe maestru pa qué gápacabe xiixa guendahuará ni gucueeza laacabe. Zanda cuícabe cani caʼruʼ guichaganáʼ ne cani maʼ bichaganáʼ. Jma galán pa gulenécabe diidxaʼ chigusiidicabe ca, peru pa cadi zacá ni la? naquiiñeʼ guiníʼcabe diidxaʼ ca jneza. Cani racalaʼdxiʼ gaca maestru la? naquiiñeʼ guiníʼnecaʼ binnigola ni riganna ca binni ridagulisaa, laa zuseendaʼ guiʼchiʼ stícabe Betel, ne zuseendabe ni juntu ne guiʼchiʼ gucaa ca binnigola ni nuu ra ridagulisaacabe.
4. Ximodo racané Betel ne binnigola ni riganna ca binni ridagulisaa para gaca ca cursu ca.
4 Dxiiñaʼ runi Betel. Betel zaniʼné ca xpinni Cristu ni gulícabe para gaca maestru ti guʼyaʼ pa zándaruʼ gusiidicabe ora gaca ca clase ca. Despué zaca invitárcabe para chécabe ti cursu ni raca Betel ti guiziidicabe ximodo gúnicabe ni. Betel zaniʼné binnigola ni riganna ca binni ridagulisaa para guyubi ti grupu de binnigola ni quixhe modo gaca ca cursu ca. Zacá maʼ qué ziuupeʼ maestru ca xizaa de xcaadxi cosa ne jma zaguixhe ique gusiidiʼ. Binnigola ni riganna ca binni ridagulisaa zuyubi tuu nga ca binni cheʼ cursu ca, peru cadi naquiiñeʼ chuʼ jma de veintiséis binni (1 Cor. 14:40).
5. Ximodo zanda quixhe maestru ca modo guni ca clase ca.
5 Dxiiñaʼ guni maestru ca. Maestru ca zaniʼné binnigola ni riganna ca binni ridagulisaa para gábibe laa pora zanda gúnicabe ca clase ca. Galán pa gaca clase ca de ti hora o chonna hora cada semana, ne cadi guindaa diʼ cursu ca jma de xhoopaʼ beeu. Peru, pa zanda guni maestru ca chupa chonna clase lu ti semana la? zanda guilúxebe ca cursu ca biaʼ ti beeu o ante guizaa ti beeu.
6. Xi guníʼ ti xpinni Cristu ni rusihuinni riguu Jiobá ndaayaʼ ca binni riuulaʼdxiʼ gusiidiʼ sti diidxaʼ neca gácani nagana para laacaʼ.
6 Ñee zanda gacaneluʼ la? Zándaca chuʼ xpinni Cristu guiníʼ qué zanda gusiidiʼ stiidxaʼ o qué zanda gusiidiʼ purtiʼ nabé natuí. Peru zanda gacané espíritu santu laacabe para gúnicabe ni na Dios (Juan 14:16). Ti carta ni bicaa tobi de ca maestru ca Betel rusihuinni zacá ni, laabe guniʼbe: «Racalaʼdxeʼ gabeʼ laatu qué nizayadiáʼ scuela nin ti dxi. Lade ca binni ridagulisaa nga biziideʼ guundaʼ ne gucaaʼ. Ante guicaaʼ cursu para ca maestru ni rusiidiʼ sti diidxaʼ la? guníʼ iqueʼ qué zanda diʼ guneʼ ni. Peru rudieeʼ xquíxepeʼ Jiobá, purtiʼ zeʼ dxi jma caziideʼ modo guneʼ ni jneza. Lu ca clase ca ruuyaʼ modo racané espíritu santu stiʼ Jiobá naa ne cani caziidiʼ. Zendaʼ de ti guidxi nabé pobre ni nuu lade dani. Peru casi xpinni Jiobá la? nabé ricu laanu purtiʼ nuunu gaxha de laabe».
7. Ximodo zusihuínninu dxandíʼ racaláʼdxinu guseendaʼ Jiobá jma binni para gacané laanu gaca dxiiñaʼ riʼ casi rinábanu ni laabe.
7 Rihuinni cacabi Jiobá ca oración stinu ora rinábanu laa guseendaʼ jma binni para guni dxiiñaʼ (Mat. 9:38). Runiibi Jiobá ladxidóʼ mil de precursor ne cani rucheeche diidxaʼ para checaʼ sti lugar ra caquiiñeʼ tu gucheeche stiidxaʼ Reinu lu sti diidxaʼ. Ñee zanda gusiidiluʼ laacabe stiidxaluʼ la? Pa guʼnuʼ ni la? gunna dxichi guizáʼ zaguu Jiobá ndaayaʼ ca stipa gúniluʼ (Mal. 3:10).