Zuiʼ cabe stiidxa Dios
1. Xiñee nánnanu guirutiʼ qué zanda gucueeza laanu de gucheechenu diidxaʼ.
1 Gastiʼ qué liica zanda gucueeza Jiobá de guni ni na (Isa. 14:24). Dxi yené juez Gedeón 300 hombre para gucaalú ti grupu de 135,000 soldadu madianita la? ruluíʼ nga qué ñanda ñuni ganarbe laacaʼ. Peru Jiobá gudxi laabe: «Dxandipeʼ zulaluʼ Israel de lu náʼ Madián. Cadi naa nga cuseendaʼ lii la?» (Jue. 6:14). Yanna, xi dxiiñaʼ nga cayacané Jiobá gaca ca dxi riʼ yaʼ. Jesús guníʼ xi laani: «Zuiʼ cabe stiidxa Dios de idubi naca guidxilayú» (Mat. 24:14). ¡Guirutiʼ qué zanda guni xiixa para gucueeza de gaca dxiiñaʼ ca!
2. Xiñee zanda guni crenu zacané Jiobá cada tobi de laanu ora maʼ cucheechenu diidxaʼ.
2 Racané Jiobá cada tobi de laanu. Nánnanu qué zusaana Jiobá de gacané guiranu casi Testigu stiʼ, peru, ñee runi crenu zanda gacanebe cada tobi de laanu la? Dxi gudiʼdiʼ apóstol Pablu lu caadxi guendanagana, biʼniʼ sentirbe modo biquiiñeʼ Jiobá Jesús para gucané laabe (2 Tim. 4:17). Naquiiñeʼ guni crenu de guidubi ladxidoʼno laaca zaguube ndaayaʼ ca stipa ni guni cada tobi de laanu purtiʼ cayúninu ni nabe (1 Juan 5:14).
3. Pora nga racané Jiobá laanu.
3 Ñee runi sentirluʼ maʼ huaxiéʼ stipa rápaluʼ para gucheecheluʼ diidxaʼ pur ca dxiiñaʼ rúniluʼ guiráʼ dxi la? Jiobá cudii «stipa cani maʼ bidxaga» (Isa. 40:29-31). Ñee nuu tu cucaalú lii o canazananda lii la? «Bilaa guiráʼ ni nualuʼ luguiáʼ Jiobá, ne laapebe zacanebe lii.» (Sal. 55:22.) Ñee riuu biaje runi sentirluʼ qué zanda guiniʼluʼ la? «Guyé, ne naa ziuaaniáʼ lii ora guiniʼluʼ.» (Éxo. 4:11, 12.) Ñee maʼ huaxiéʼ rucheecheluʼ diidxaʼ purtiʼ napuʼ xiixa guendahuará la? Jiobá rusisaca ni guʼnuʼ de guidubi ladxidoʼloʼ, neca huaxiéʼ ni, ne riquiiñebe ni para gaca ni naguixhe íquebe (1 Cor. 3:6, 9).
4. Xi zúninu pa dxandíʼ runi crenu Jiobá de guidubi ladxidoʼno.
4 Sicaríʼ caníʼ Biblia de Jiobá: «Ora maʼ bisigaanabe, guirutiʼ zanda gudxiguétani» (Isa. 14:27). Sicaríʼ biʼniʼ ca xpinni Cristu dxiqué: «Byuíʼ cabe stiidxa Señor sin nidxibi cabe, purti nanna cabe nuu né Señor laacabe» (Hech. 14:3). Ngaca nga laanu, cumu nánnanu riguu Jiobá ndaayaʼ laanu ora rucheechenu diidxaʼ la? qué chuʼ dxi gusaana de gúninu dxiiñaʼ ca.