Carta stiʼ Grupu ni Zaniruʼ
Bíchidu ne bizánadu ni nadxiidu:
¡Guizáʼ galán guiráʼ ni cadúʼyanu tiempu riʼ, ne nabé nayecheʼ nuunu! Ti ndaayaʼ naroʼbaʼ nga guninedu laatu dxiiñaʼ, casi ñaca nuunu «tobi si». Dxiiñaʼ ni cayúninu nga gusíʼdinu binni de Jiobá ne qué huayuu dxi gaca dxiiñaʼ riʼ biaʼ cayácani yanna (Sof. 3:9; Juan 14:12).
Peru, cadi purtiʼ si nuunu nayecheʼ pur cayúninu xhiiñaʼ Jiobá zanda guininu maʼ qué zadxaagalunu guendanagana. Iza dxiiñaʼ gudídinu ca chupa chonna de laatu bidxagalú stale guendanagana casi ra guca xu roʼ, ra biree guiiguʼ, ra bininá huracán ne xcaadxi desgracia ni bizaaca (Mat. 24:7). Ne stale tu cayuniná ca yuubaʼ ni redané guendahuará ne guendayooxhoʼ. Ne guiranu cudxiilunu ca «enda naná» nuu yanna ne zeʼ dxi zidale cani (Mat. 24:8). Zaqueca ndaaniʼ caadxi guidxi casi Armenia, Corea del Sur ne Eritrea, stale xpinni Cristu deguyoocaʼ pur ni runi crecaʼ (Mat. 24:9).
Xi huayacané laanu para cadi guireʼnu gana neca cadxaagalunu guirá guendanagana riʼ yaʼ. Ni huayacané laanu nga ni bisietenalaʼdxiʼ textu stiʼ iza 2010 laanu: Ora nadxiinu tuuxa, zuni huantarnu laa. Ne qué ziuu dxi guinitilú guendarannaxhii (1 Cor. 13:7, 8). Zacá nga laani, nadxiisaanu ne nadxiinu Jiobá. Ne nga nga rudii stipa laanu para guni huantarnu.
Stale binni ni nacaʼ xpinni Cristu laacaʼ ridxagayaacaʼ ora ruuyacaʼ careeche diidxaʼ guiráʼ ladu ne gatigá rigánnanu laacaʼ. Chupa chonna de laacaʼ, neca qué runi crecaʼ ni runi crenu ne qué nacaʼ gusíʼdinu laacaʼ, peru rábicaʼ laanu: «Laatu nga cayúnitu dxiiñaʼ ni naquiiñeʼ ñúnidu». Xi racané ca testigu stiʼ Jiobá para cadi gusaana de gucheechecaʼ diidxaʼ guiráʼ dxi yaʼ. Casi maʼ bizéʼtenu que, ni racané laacabe nga guendarannaxhii. Cásica Bixhózenu ni nuu guibáʼ, laanu laaca qué racaláʼdxinu guinitilú nin ti binni (2 Ped. 3:9). Iza dxiiñaʼ gudídinu ca guyuu 7,508,050 ni rucheeche diidxaʼ, ne deruʼ yanna nga guyuu biaʼ ca. Nga rusihuinni racaláʼdxinu guilá guiráʼ binni. Ñee nuu sti religión ra nuu stale binni ni nadxiicaʼ xcaadxi binni, ne pur nga riuuláʼdxicaʼ gacanecaʼ laacabe para chuʼca gaxha de Dios la?
Nabé riuʼnu gana ora ridúʼyanu modo cayaca ca diidxaʼ ni bicaa profeta Isaías riʼ: «Ra maʼ ziluxe ca dxi ca napa xidé guzuhuaa dxiichiʼ dani ra zuba lidxi Jiobá ne ziuuni jma luguiáʼ que guiráʼ dani, ne zácani jma nasoo que guiráʼ dani huiiniʼ; ne zadxiña guiráʼ guidxi ra nuuni» (Isa. 2:2-4). Lade ca binni ni cadxiña ra lidxi Jiobá nuu 294,368 binni ni guyuunisa iza dxiiñaʼ gudídinu ca ne riéchenu purtiʼ maʼ nuucabe ndaaniʼ xquidxi Jiobá. Cumu nadxiinu ca xpinni Cristu la? nga rucaa laanu gacanenu laacabe para cadi guiábacabe lu ca trampa stiʼ Binidxabaʼ, xhenemígunu (1 Ped. 5:8, 9).
Martes 30 stiʼ marzo 2010 bietenaláʼdxinu guendaguti stiʼ Cristu ne guyé 18,706,895 binni. Ndiʼ nga primé biaje cheʼ biaʼ riʼ. Nga rusihuinni nuuruʼ millón de binni ni zándaruʼ guiziidiʼ ni dxandíʼ ne zacá chúʼnecaʼ laanu tobi si ra guni adorarnu Dios. Nabé nayecheʼ runi sentirnu purtiʼ caʼruʼ gunitilú Jiobá ca cosa malu nuu ndaaniʼ Guidxilayú riʼ. Laga caʼruʼ guedandá dxi ca, guendarannaxhii ni nápanu ca zacané ni laanu para guni huantarnu (2 Tes. 3:5).
Ca guendaridagulisaa de chonna gubidxa ni biree lá: «Cadi guixélenu de Jiobá» ni guca lu guidubi naca Guidxilayú —casi guiráʼ cani gúcacani lu iza 2010— nabé gucané cani laanu para chuʼnu jma gaxha de Jiobá. Jnézapeʼ nga ca diidxaʼ guníʼ hombre ni bicaa salmo riʼ: «¡Nayecheʼ nga riuu ti guidxi ora nápacaʼ Jiobá casi Dios sticaʼ!» (Sal. 144:15). Nanna dxíchinu, intiica guendanagana ni gueeda gápanu, pa nuu Jiobá gaxha de laanu la? gastiʼ qué liica zuchibi laanu (Sal. 23:4). Maʼ cadi candaa zaquiiñeʼ Jiobá Xiiñiʼ para «uchiá xhiiña binidxabaʼ» (1 Juan 3:8). ¡Guizáʼ maʼ racaláʼdxinu guedandá dxi ca! Laga cabézanu gueeda ni, caquiiñeruʼ gúninu jma dxiiñaʼ (1 Cor. 15:58).
Naquiiñeʼ gánnatu qué rusaana de guzéʼtedu laatu lu ca oración stidu (Rom. 1:9). Canábadu laatu «cadi ixele tu de Dios ni nadxii laatu laga cabeza tu dxi udii Señor Jesucristu laanu enda nabani ni qué zaluxe. Ne zuni be ni purti rilaselaʼdxi be laanu» (Jud. 21).
¡Guizáʼ nadxiidu laatu!
Ca bíʼchitu ne bizáʼnatu,
Grupu ni Zaniru’ sti’ ca Testigu sti’ Jiobá