Chupa moneda huiiniʼ ni huaxiéʼ risaca

Ti modo zanda gacanenu lu xhiiñaʼ Reinu nga gudiʼnu biaʼ nápanu de guidubi ladxidoʼno ti guireeche diidxaʼ lu guidubi naca Guidxilayú. Peru pa huaxiéʼ bidxichi nápanu para gudiʼnu yaʼ.

Ti biaje biiyaʼ Jesús ti viuda nabé pobre cusaba chupa moneda huiiniʼ ni huaxiéʼ risaca ndaaniʼ caja ra rusábacabe bueltu ni nuu ndaaniʼ yuʼduʼ roʼ. Cumu nadxiibe Jiobá, bicaani laabe gudiibe «irá ni napa be para tidi né be dxi» (Mar. 12:41-44). Ra bizeeteʼ Jesús de viuda que bihuinni bisisaca Jiobá ni bíʼnibe. Sti ejemplu ni zanda chinándanu nga stiʼ ca xpinni Cristu de Macedonia ni bibani lu primé siglu. Nabé bisisácacabe gudiicabe ni nápacabe, neca pobre o ricu laacabe. Pablu bizeeteʼ «neca huaxiéʼ [gu]pa cabe» peru gunábacabe gudiicabe de ni nápacabe ti «acané cabe ca xcaadxi hermanu» (2 Cor. 8:1-4).

Nga runi, neca chupa moneda huiiniʼ ni huaxiéʼ risaca nápanu zanda gudiʼnu cani, purtiʼ ra guicaasaacani né ni gudii xcaadxi zácacani stale. Ora rudiʼnu de guidubi ladxidoʼno rinándanu ejemplu stiʼ Jiobá, Bixhózenu ni nadxii cani rudii de guidubi ladxidóʼ (2 Cor. 9:7).