Lachinanda ejemplu stiʼ ca profeta: Jonás
1. Xi guenda sicarú gupa Jonás.
1 Xi riníʼ íquenu ora guietenaláʼdxinu de profeta Jonás. Nuu tu riníʼ ique gúcabe ti hombre ni bidxibi, o tuuxa ni qué riáʼ binni. Peru rihuinni dxíchica gúcabe ti hombre ni qué nudxiibaʼ laca laa, ni nadxibalú ne bíʼnibe ni na Dios neca guyuu xquendanabánibe ra naxoo. Yanna, ximodo zanda chinándanu ejemplu sti Jonás yaʼ (Sant. 5:10).
2. Ximodo zanda chinándanu ejemplu stiʼ Jonás, ti hombre ni qué nudxiibaʼ laca laa.
2 Qué nudxiibabe laca laabe. Dxi gucuaa Jonás ti dxiiñaʼ, bixooñelú de laani ne gucuaa gadxé ladu. Ne laanu nanna dxíchinu bíʼnibe zaqué purtiʼ nánnabe nabé malu ca asiriu que, dede binibiáʼ binni Nínive casi ti «guidxi ni ruxhii rini» (Nah. 3:1-3). Peru guluu jneza Jiobá Jonás ne laa bisihuinni qué rudxiibaʼ laca laa ora gucuaa dxiiñaʼ que sti biaje ne guyé ra maca biseendabe laa (Prov. 24:32; Jon. 3:1-3). Neca primé que gucalaʼdxiʼ Jonás nuxooñelú de dxiiñaʼ gucuaa, peru despué bizuubaʼ stiidxaʼ Dios (Mat. 21:28-31). Yanna laanu, ñee zucheecherunu diidxaʼ neca uguu jnézacabe laanu ne neca huaxiéʼ rucaadiaga binni stiidxaʼ Dios neza ra rucheechenu diidxaʼ la?
3. Xiñee naquiiñeʼ gácanu nadxibalú ne gucheechenu diidxaʼ neca gácani nagana para laanu.
3 Gúcabe nadxibalú ne guluube xquendanabánibe ra naxoo. Ora bidii Jonás cuenta pur cadi cayuni ni jneza ngue nuu xquendanabani ca binni ni runi dxiiñaʼ lu barcu que ra naxoo la? guná gatiʼ para ganda guilácabe (Jon. 1:3, 4, 12). Despué, dxi maʼ nuube Nínive cayúnibe dxiiñaʼ gucuaabe, guzabe dede galahuiʼ guidxi que, zándaca para chiyúbibe ti lugar jma galán para guiniʼbe xi chigueedané Jiobá luguiáʼ ca binni que. Pa ñácabe ti binni ridxibi la? qué ñúnibe nga, peru ni bíʼnibe ca bisihuinni nácabe ti binni nadxibalú (Jon. 3:3, 4). Xi rusiidiʼ ni bíʼnibe ca laanu yaʼ. Rusiidiʼ ni laanu naquiiñeʼ guinábanu laabe gacanebe laanu gácanu nadxibalú para cadi gusaana de gucheechenu diidxaʼ neca nuunu lade binni malu (Hech. 4:29, 31). Ne laaca galán cueenu tiempu ne iquiiñenu stipa stinu para gúninu xhiiñaʼ Jiobá neca gácani nagana para laanu (Hech. 20:24).
4. Xiñee naquiiñeʼ cueenu tiempu para guiníʼ íquenu de ejemplu sicarú bisaana ca profeta.
4 Ora guidúʼndanu ca relatu ni cuzeeteʼ de chupa chonna profeta stiʼ Dios, galán guiníʼ íquenu xi ñúninu pa ñácanu tobi de laacabe. Guinabadiidxanu laca laanu: «Xi ñuneʼ pue. Xi naquiiñeʼ guneʼ para gapaʼ ca guenda ni gúpacabe pue» (Heb. 6:11, 12). Lu xcaadxi Xhiiñaʼ Reinu ni Rúninu zieeteruʼ xi zanda guizíʼdinu de xcaadxi profeta stiʼ Dios, ni qué nusaana de nuzuubaʼ diidxaʼ.