Scuela stiʼ cani Rucheeche Diidxaʼ iza 2015 zacané laanu gusíʼdinu binni jma jneza

¹ Sicaríʼ bicaa David: «Bidii lugar gusiecheʼ lii pur guiráʼ ni guinieeʼ ne guiráʼ ni guiníʼ iqueʼ, Jiobá, lii nga guié stinneʼ ne ni rulá naa» (Sal. 19:14). Laanu laaca racaláʼdxinu chuulaʼdxiʼ Jiobá cani rininu ne nabé risaca para laanu guininu de stiidxaʼ Dios ndaaniʼ neza binni ridagulisaa ne ora maʼ zigucheechenu diidxaʼ. Para ganda guizíʼdinu gucheechenu diidxaʼ la? riquiiñeʼ Jiobá stale cosa ne tobi de laacani nga Scuela stiʼ cani Rucheeche Diidxaʼ. Guiráʼ semana ridiʼdiʼ scuela riʼ ndaaniʼ jma de 111,000 neza binni ridagulisaa ni nuu lu guidubi Guidxilayú ne huayacaneni ca xpinni Jiobá ni guyé scuela ne cani qué ñé para gusiidicaʼ ca diidxaʼ nacubi ne galán sin guidxíbicaʼ, gánnacaʼ ximodo gúnicaʼ ni ne gánnacaʼ gucuudxicaʼ binni (Hech. 19:8; Col. 4:6).

² Cani zaquiiñenu lu scuela iza 2015 nga folletu Bicaadiaga Dios, Cani zaziidiluʼ lu Stiidxaʼ Dios, Cani zeeda lu Biblia, ne Tuu nga cani cayuni ni na Jiobá ca dxi riʼ. Sti cosa nacubi nuu nga maʼ bidxaa panda minutu tiidiʼ cani bibí ra guiuundaʼ Biblia ne zaqueca primé libana. Guidúʼyanu xi bidxaa luni ne ximodo naquiiñeʼ gutiidinu ca libana ni ridiʼdiʼ lu scuela riʼ.

³ Cani bibí ra guiuundaʼ Biblia. Hermanu gutiidiʼ ni zaquiiñeʼ chupa minutu para guiníʼ ti puntu risaca ne ni zanda gacané laanu ni bidxela ra biindaʼ Biblia semana ca. Para ganda gusiéneluʼ tobi si de laacani ca binni ridagulisaa biaʼ tiempu nexheʼ gúniluʼ ni la? naquiiñeʼ gaca preparar chaahuiluʼ. De racá, casi maca rácani, cani cucaadiaga nápacaʼ xhoopaʼ minutu para gudiicaʼ comentariu de treinta segundu ra guiniʼcaʼ de xiixa ni bidxélacaʼ ni zanda gacané laacaʼ ora biindacaʼ Biblia. Para ganda gudiʼnu comentariu de treinta segundu o menu de treinta segundu la? naquiiñeʼ gaca preparar chaahuinu ti ganda gúninu ni biaʼ tiempu naguíxhecabe gácani. Pa gúninu zacá la? zacanenu ganda gudii tiempu guni comentar xcaadxi hermanu xi biziidiʼ ra biindaʼ Biblia.

⁴ Primé libana. Maʼ chonna si o menu de chonna minutu nexheʼ guiuundaʼ Biblia. Ni gutiidiʼ libana riʼ naquiiñeʼ guʼndaʼ reciu stale biaje ne guʼyaʼ guʼndaʼ jneza ne cadi gucá ora guʼndaʼ ti ganda guiénecabe laa. Guiranu ca testigu stiʼ Jiobá naquiiñeʼ gúninu stipa pur guidúʼndanu jneza, purtiʼ nabé risaca guidúʼndanu jneza ora runi adorarnu Jiobá. Riéchenu guidúʼyanu nuu stale xcuidihuiiniʼ ndaaniʼ neza binni ridagulisaa nánnacaʼ gúʼndacaʼ. Laaca galán guni felicitarnu ca hermanu ni rizaalaʼdxiʼ gusiidiʼ xiiñiʼ né diidxaʼ nadóʼ guʼndaʼ jneza.

⁵ Guiropa libana. Ti hermana zutiidiʼ ti libana de gaayuʼ minutu. Naquiiñeʼ gutiidibe tema ni gucuaabe. Ora lu folletu ni láʼ Cani zaziidiluʼ lu Stiidxaʼ Dios zeeda libana ca la? naquiiñeʼ gúnibe ni casi modo rucheechecabe diidxaʼ ti ganda gacaneni ca binni ridagulisaa. Ora lu sti publicación zeeda libana ca, naquiiñeʼ quixhe chaahuibe tema ca ne cuibe xi textu zanda iquiiñebe. Laaca zanda iquiiñebe xcaadxi textu ni caníʼ de tema ca. Ni rutiidiʼ scuela ca nga guiníʼ tu gacané laabe.

⁶ Guionna libana. Libana riʼ naquiiñeʼ tiidini gaayuʼ minutu ne zanda gutiidiʼ ti hermanu o ti hermana ni. Pa gutiidiʼ ti hermana ni la? naquiiñeʼ gúnibe casi modo ridiʼdiʼ guiropa libana. Ne ora ti hermanu gutiidiʼ ni ne iquiiñebe sti publicación la? zúnibe ni casi modo ridiʼdiʼ ti libana ndaaniʼ Yoo stiʼ Reinu. Hermanu ni gutiidiʼ libana riʼ nga quixhe chaahuiʼ tema ca ne laa cuí xi textu iquiiñeʼ.

⁷ Sti modo zanda gutíʼdinu guionna libana. Ora tema ca bireeni lu folletu ni láʼ Cani zaziidiluʼ lu Stiidxaʼ Dios, ne gutiidiʼ ti hermanu ni la? naquiiñeʼ gúnibe ni casi ora cayuni adorarbe Dios né binnilídxibe o cayuni ensayárcabe modo gucheechecabe diidxaʼ. Stale biaje la? ni rutiidiʼ scuela ca nga guiníʼ tu tiidinebe ne ximodo gutiidibe ni. Ne hermanu ni tiidinebe ca naquiiñeʼ gácani ti binnilídxibe o sti hermanu. Ne zanda iquiiñebe xcaadxi textu ni caníʼ de tema ca. Nuu biaje zutiidiʼ ti binnigola ni ne laabe cuibe tu tiidinebe ne ximodo gutiidibe ni. Ora guʼyaʼ ca xpinni Cristu modo rusiidiʼ binnigola riʼ ti binnilidxi o stiʼ hermanu la? nabé zaguuni gana laacaʼ.

⁸ Conseju. Ni rutiidiʼ scuela ca zaquiiñe chupa minutu despué de cada libana para uguu gana ni bitiidiʼ libana ca ne para gudiibe xiixa conseju zeeda lu libru Benefíciese. Ora ni cutiidiʼ scuela ca guiníʼ chitiidiʼ ti libana la? qué zaniʼbe paraa chigúnicabe dxiiñaʼ. Peru despué de tiidiʼ libana ca zaniʼbe chupa chonna diidxaʼ ni uguu gana ni bitiidiʼ libana ca ne zaniʼbe paraa cayuni dxiiñaʼ. Laaca zusiénebe ximodo biʼniʼ xpinni Cristu riʼ dxiiñaʼ ra naquiiñeʼ guni ne laaca zuyúbibe modo guiniʼbe xiñee naquiiñeʼ guni dxiiñaʼ raqué.

⁹ Cani gutiidiʼ libana zanda gúʼyacaʼ lista ni zeeda lu yaza 79 dede 81 stiʼ libru Benefíciese ra cá ximodo zanda gutiidicaʼ libana. Ora guiluxe guendaridagulisaa, zucaa hermanu ni rutiidiʼ scuela ca lu libru stiʼ xpinni Cristu ca ni naquiiñeʼ gucaa ne zanabadiidxabe laa pa biʼniʼ ejerciciu ni zeeda lu ra cayuni dxiiñaʼ. Laaca zanda uguube gana laa ne gudiibe laa xiixa conseju ni zanda gacané laa óraque o zanda gúnibe sti dxi. Galán guni cani rutiidiʼ libana chinándacaʼ conseju ni rudii ni rutiidiʼ scuela ca laacaʼ purtiʼ zacaneni laacaʼ gudiicaʼ libana jma jneza (1 Tim. 4:15).

¹⁰ Pa tiidiʼ ni cutiidiʼ libana ca de tiempu la? ni rutiidiʼ scuela ca zuni ti seña laabe sin gudii xcaadxi cuenta o zuxhidxi xiixa ti gánnabe maʼ gudíʼdibe de tiempu. Pa guizaaca nga, ni cutiidiʼ libana ca naquiiñeʼ gunduuxeʼ ni caníʼ ne guiete de lu plataforma (biiyaʼ yaza 282, párrafo 4 stiʼ libru Benefíciese).

¹¹ Riguʼdu gana cani nabani casi modo rusiidiʼ Stiidxaʼ Dios guinábacaʼ guicá lacaʼ lu Scuela stiʼ cani Rucheeche Diidxaʼ (biiyaʼ yaza 282, párrafo 6 stiʼ libru Benefíciese). Rusiidiʼ scuela riʼ ca xpinni Dios gánnacaʼ gucheechecaʼ diidxaʼ jneza ne racaneni laacaʼ gusihuínnicaʼ dxandíʼ runi crecaʼ guiráʼ ni chiguni Reinu ora gusiidicaʼ ne runi cani né stale guendarannaxhii. Riuulaʼdxiʼ Jiobá guʼyaʼ cayacané scuela ca laanu para gusisácanu laa (Sal. 148: 12, 13; Is. 50: 4).