Zeeda gaca respetu ca casi cementu ni zacané chuʼ xquendaxheelatu tobi si.
PARA CA GUENDAXHEELAʼ
3 Gápanu Respetu
¿XII NI YAʼ?
Ca guendaxheelaʼ ni runi respetársaacaʼ rizaaláʼdxicaʼ laca laacaʼ neca cadi nuucaʼ de acuerdu. Libru ni láʼ Diez claves para transformar tu matrimonio ná: «Ora rapa ca guendaxheelaʼ riʼ guendanagana la? ruyúbicaʼ modo guni chaahuiʼ ca ni, lugar de chuʼdíndecaʼ. Né stale respetu rucaadiágacaʼ xheelacaʼ ne ruyúbicaʼ xii nga ni jma galán para laacaʼ».
CONSEJU ZEEDA LU BIBLIA: «Ti binni ni napa amor la? [...] qué ruyubi puru para laasi» (1 Corintios 13:4, 5).
Micah guníʼ: «Ni jma risaca para naa nga guneʼ respetar xheelaʼ, gusisacaʼ laa ne cadi gunenaʼyaʼ laabe o guchiayaʼ xquendaxheeladu».
¿XIÑEE NABÉ RISACA NI?
Ndaaniʼ ti guendaxheelaʼ ra gastiʼ respetu la? nisi maʼ cadíndecaʼ, cayuni búrlacaʼ o dede runinásaacaʼ. Ca binni ni nanna de guendaxheelaʼ nacaʼ ora runi ca guendaxheelaʼ guiráʼ ni maʼ bizéʼtenu riʼ qué rindaa raca divorciarcaʼ.
Brian ná: «Ora riguudí ti hombre xheelaʼ o runi burla laabe la? runinabe ladxidóʼ ne pur nga maʼ qué zapa xheelabe confianza laabe».
¿XI ZANDA GÚNILUʼ?
GUNÍʼ IQUE NDIʼ
Guníʼ ique de xidé huaníʼneluʼ ne ximodo huayuni tratarluʼ xheelaluʼ ca últimu semana riʼ. Despué bicabi ca pregunta riʼ:
¿Panda biaje guniʼluʼ cadi jneza ni cayúnibe ne panda biaje gúdxiluʼ laabe diidxaʼ galán?
¿Ximodo rusihuínniluʼ runi respetarluʼ xheelaluʼ?
GUNIʼNÉ XHEELALUʼ
¿Xi ca cosa rúnidu ne rinidu ni rusihuinni runi respetardu laadu?
¿Xi ca cosa rúnidu ne rinidu ni rusihuinni qué runi respetardu laadu?
NI CAQUIIÑEʼ GÚNILUʼ
Galán gucaatu chonna cosa ni ñuuláʼdxitu ñuni xheelatu para guni respetar laatu. De racá zanda gudiiluʼ laabe lista ca ne gúnitu stipa chinándatu ni ná ni.
Biʼniʼ ti lista ne bicaa ca cualidad galán ni napa xheelaluʼ ne gudxi laabe nabé risácabe para lii.
Megan bizeeteʼ: «Cumu racalaʼdxeʼ guneʼ respetar xheelaʼ la? runeʼ stipa gusisacaʼ laabe para chuʼbe nayecheʼ. Cadi caquiiñeʼ peʼ gudiʼnu stale cosa risaca xheelanu para gusihuínninu runi respetarnu laa, purtiʼ respetu ca zanda guihuínnini dede lu ca cosa jma nahuiiniʼ».
Ni jma risaca nga guni sentir xheelaluʼ runi respetarluʼ laa.
CONSEJU ZEEDA LU BIBLIA: «Lagusihuinni nadxiitu binni ne riatu laacaʼ, lagaca nachaʼhuiʼ, lagaca humilde, lagaca nadóʼ ne lagapa paciencia» (Colosenses 3:12).