Ora ruzuubaʼ tuuxa stiidxaʼ bixhoze ne jñaa ne naca responsable, jma rápacabe confianza laa. Zeeda gácani casi ti bancu ni rutiiñeʼ bueltu ti binni purtiʼ nanna responsable laa.
PARA CA JOVEN
10 Biyubi gapa binni confianza lii
¿XII NI YAʼ?
Ti binni ni rápacabe confianza laa la? runi guiráʼ ni rábicabe laa, runi cumplir guiráʼ ni riníʼ ne siempre riníʼ ni dxandíʼ. Ti binni ni runi zacá, rápacabe confianza laa.
¿XIÑEE NABÉ RISACA NI?
Para gudiicabe lugar gúniluʼ xcaadxi cosa, caquiiñeʼ gusihuínniluʼ zanda gápacabe confianza lii.
Sarahi guníʼ: «Para gapa bixhózeluʼ ne jñaaluʼ confianza lii, caquiiñeʼ gácaluʼ responsable ne gúniluʼ ni jneza neca cadi cayuuyacabe lii».
CONSEJU ZEEDA LU BIBLIA: «Siempre laguuyaʼ tu clase binni nácatu» (2 Corintios 13:5).
¿XI ZANDA GÚNILUʼ?
Ca conseju ni chiguzéʼtenu riʼ zacanécani gapa bixhózeluʼ ne jñaaluʼ jma confianza lii.
Guníʼ ni dxandíʼ. Pa gusiguiiluʼ, qué zapa binni confianza lii, peru pa guiniʼluʼ ni dxandíʼ ne gácaluʼ honradu jmaruʼ si ora gucheeluʼ la? zuni ganarluʼ confianza stiʼ stobi.
Caiman ná: «Cadi nagana guiniʼluʼ ni dxandíʼ ora runi convenir lii, peru nagana ni ora bíʼniluʼ xiixa ni cadi jneza ne nga nga ni racané para gapa xcaadxi confianza lii».
CONSEJU ZEEDA LU BIBLIA: «Racaláʼdxidu gácadu honradu lu guiráʼ cosa» (Hebreos 13:18).
Guca responsable. Lu ti encuesta ni guca Estados Unidos 78% de ca binni ni runi dxiiñaʼ ra recursos humanos guníʼ «naquiiñeʼ gaca tuuxa responsable para ganda guicaa ti dxiiñaʼ». Nga runi, risaca gaca binni responsable purtiʼ zacaneni laa ora maʼ huaniisi.
Sarah bizeeteʼ: «Rudii bixhozeʼ ne jñaaʼ cuenta ora runeʼ xiixa sin gucaacaʼ naa guneʼ ni. Ruuyacabe responsable naa ne jma rápacabe confianza naa».
CONSEJU ZEEDA LU BIBLIA: «Nannaʼ zuʼnuʼ ni canabaʼ lii ne nannaʼ zuʼnuʼ jma que nga» (Filemón 21).
Gupa paciencia. Cadi nagana gudiiluʼ cuenta ora maʼ ziniisi tuuxa, casi pa maʼ zisoobe o maʼ ziroobe, peru naquiiñeʼ tidiʼ tiempu para gúʼyaluʼ pa maʼ riníʼ íquebe casi ti binni huaniisi ne pa maʼ nácabe responsable.
Brandon ná: «Qué zanda gapa bixhózenu ne jñaanu confianza laanu de ti dxi sti dxi, peru pa siempre gácanu responsable, cada dxi tidiʼ zápacabe jma confianza laanu».
CONSEJU ZEEDA LU BIBLIA: «Lagapa paciencia» (Colosenses 3:12).