Conseju ni zacané laanu chuʼnu nayecheʼ né ni nápanu
Guiranu racaláʼdxinu guibáninu nayecheʼ gastiʼ naca pa solteru laanu, pa maʼ bichagananu, pa joven laanu o maʼ huaniisinu. Laaca racalaʼdxiʼ Dios ni bizáʼ laanu guibáninu nayecheʼ. Nga runi, maʼ bidiibe laanu caadxi conseju guizáʼ galán ni zanda gacané laanu.
Biʼniʼ dxiiñaʼ jneza
Ti binni naquiiñeʼ «iquiiñeʼ náʼ para guni dxiiñaʼ jneza ti ganda gapa xiixa ni gudii tuuxa ni caquiiñeʼ» (EFESIOS 4:28).
Racalaʼdxiʼ Dios ni bizáʼ laanu guidúʼyanu dxiiñaʼ casi xiixa guizáʼ galán. ¿Xiñee yaʼ? Purtiʼ ti binni ni runi dxiiñaʼ qué riaadxaʼ laa gastiʼ, rudii ni caquiiñeʼ familia stiʼ, ne nga riguu laa nayecheʼ. Dede zanda gacané tuuxa ni caquiiñeʼ ni. Nabé rusisaca ca patrón ca binni ni runi dxiiñaʼ jneza, ne pur nga qué runíticaʼ dxiiñaʼ sticaʼ. Nga runi, biaʼsi nga ni ruzeeteʼ Biblia ora ná ricaa binni stale ndaayaʼ ora runi dxiiñaʼ jneza (Eclesiastés 3:13).
Guca honradu
«Nánnadu nayá nuu conciencia stidu, ne racaláʼdxidu gácadu honradu lu guiráʼ cosa» (HEBREOS 13:18).
Pa gácanu honradu, ziuʼnu gana, zatadxí ladxidoʼno ne zásinu galán. Ne cadi ngasi, laaca zápacabe respetu ne confianza laanu. Peru cadi zacá diʼ ribani ca binni ni cadi honradu purtiʼ nisi maʼ cuchiiñaʼ conciencia sticaʼ laacaʼ ne ridxíbicaʼ ganna binni xi cayúnicaʼ.
Cadi gúniluʼ jma pur bueltu
«Lagusihuinni cadi nadxiitu bueltu pur modo nabánitu, sínuque lachuu nayecheʼ né ca cosa si ni nápatu» (HEBREOS 13:5).
Riquiiñenu bueltu para sinu guendaró ne xcaadxi cosa, peru ti peligru nga gannaxhiinu ni. Nuu binni riquiiñeʼ tiempu ne stipa stiʼ para guni dxiiñaʼ ti gapa stale cosa. Ne ora jma ricá ique tuuxa gapa stale cosa, riuu xquendaxheelaʼ ra naxoo, qué rapa tiempu para ca xiiñiʼ ne dede raca huará (1 Timoteo 6:9, 10). Ne ora tuuxa gannaxhii bueltu, rucaani laa guni xiixa ni cadi jneza. Sicaríʼ guníʼ ti hombre nuu xpiaaniʼ: «Ti binni ni naca fiel ricaa stale ndaayaʼ, peru tu gacalaʼdxiʼ gaca ricu nagueenda la? zuni ni cadi jneza» (Proverbios 28:20).
Bidii lugar gusiidiʼ Dios lii
«Gupa sabiduría stiluʼ ne modo riníʼ íqueluʼ» (PROVERBIOS 3:21).
Neca racané scuela laanu gácanu responsable ne gusiniisinu ca xiiñinu jneza, qué zanda gacaneni laanu guibáninu nayecheʼ ne cadi guiaadxaʼ laanu gastiʼ. Nga runi, para ganda guibáninu nayecheʼ caquiiñenu gusiidiʼ Dios laanu. Biblia ná binni ni gucaadiaga Dios zabeendú ni galán (Salmo 1:1-3).