Ni rusiidiʼ ti Dios ni bizáʼ laanu rudii ni laanu ti esperanza
Cayuni prometer Dios laanu zazaaca stale cosa sicarú lu ca dxi ni zeeda ca. Maʼ qué zuni sufrir binni ne guizáʼ nayecheʼ zabánicaʼ (Salmo 37:11). ¿Xiñee zanda guni crenu dxandíʼ zaca cumplir promesa riʼ yaʼ? Purtiʼ «Dios cadi binni diʼ laa para gusiguii» (Números 23:19). Guidúʼyanu caadxi cosa ni zuni Dios ni bizáʼ laanu.
Zunitilú Dios binni malu
«Ora guidale binni malu casi rindani guixi malu ne guidale binni qué iquiiñeʼ, zanitilucaʼ para siempre» (SALMO 92:7).
Casi bizíʼdinu lu artículo ni gudiʼdiʼ que, zeʼ dxi jma feu nabani binni. Peru cadi naquiiñeʼ guidxagayaanu purtiʼ maca cá lu Biblia zazaaca ni, lu 2 Timoteo 3:1-5 ná nabé feu zaca xpiaʼ binni «lu ca últimu dxi». Peru ¿xii nga «ca últimu dxi» ca yaʼ? Ca últimu dxi sti ca binni ni qué runi respetar Dios. Maʼ cadi candaa zunitilú Dios ca binni ni qué naʼ gusaana ca cosa malu ni runi. Peru zusaanabe lu Guidxilayú riʼ ca binni ni guzuubaʼ stiidxabe. Casi ná Salmo 37:29, «zacaa ca ni biʼniʼ ni jneza guidxilayú ne zabánicaʼ luni para siempre».
Zunitilú Dios Binidxabaʼ
«Dios ni riguixhedxí ladxidóʼ binni» zuxhaatañee Binidxabaʼ (ROMANOS 16:20).
Ora guinitilú Binidxabaʼ, ca demonio ne guiráʼ ca binni malu, ziuu paz ndaaniʼ Guidxilayú. Casi cayuni prometer Dios ni bizáʼ laanu: «Qué ziuu tu guchibi» laanu (Miqueas 4:4).
Zabee Dios guendahuará ne guendaguti
«Nuu carpa stiʼ Dios ra nuu binni [...]. Ne zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (APOCALIPSIS 21:3, 4).
Nuu stale guendananá ndaaniʼ Guidxilayú riʼ purtiʼ nuu Binidxabaʼ ndaaniʼ ni, purtiʼ qué nuzuubaʼ Adán ne Eva stiidxaʼ Dios ne purtiʼ binni ruchee laanu. Peru maʼ cadi candaa zabee Dios guiráʼ ca guendananá ca. Nga runi, maʼ qué zacaná binni, maʼ qué zaca huará ne «maʼ qué ziuuruʼ guendaguti». Ca binni ni gannaxhii ne ni guzuubaʼ stiidxaʼ Dios zabánicaʼ para siempre. Peru ¿paraa yaʼ?
Zuni Dios Guidxilayú riʼ ti paraísu
«Guizáʼ nayecheʼ ziuu desiertu ne ca layú ra gastiʼ nuu, ne nayecheʼ ziuu guiráʼ llanu ne zaca ni casi guieʼ azafrán» (ISAÍAS 35:1).
Ora gunitilú Dios ca cosa malu, zaca Guidxilayú riʼ ti paraísu. Ziuu stale parque ne jardín lu guidubi Guidxilayú ne laaca ziuu stale guendaró (Salmo 72:16). Nisadóʼ, ca laguna ne ca guiiguʼ ca zaca ca ni nayá ne zapa ca ni guendanabani. Ne dede maʼ qué zaquiiñenu diidxaʼ contaminación. Zucuí binni lidxi ne zabánicaʼ ndaaniʼ ni. Maʼ qué ziuu guendapobre, guirutiʼ zandaana ne guirutiʼ zabani lu calle (Isaías 65:21, 22).
Zandisaʼ Dios ca ni maʼ guti
«Cabezaʼ gusibani Dios ca ni maʼ guti» (HECHOS 24:15).
¿Ñee ñuuláʼdxiluʼ ñuuyaluʼ familia stiluʼ ne ca xhamíguluʼ ni maʼ gutiʼ la? Dios ni jma napa poder zusibani laacabe dxi gaca Guidxilayú riʼ ti paraísu. ¡Bixuiʼlú pabiáʼ ziécheluʼ ora gúʼyaluʼ ne guidxaagaluluʼ laacabe! Lu Biblia riete guyuu xcuidi ne binni huaniisi ni biasa de lade gueʼtuʼ ne guyuucaʼ tobi si né familia sticaʼ sti biaje. Ne laaca riete bisibani Jesús binni de lade gueʼtuʼ nezalú stale binni (Lucas 8:49-56; Juan 11:11-14, 38-44).