Ximodo runiná tecnología xquendabiaaniluʼ
Guiráʼ dxi riziidiʼ binni, zándaca ra scuela, ra dxiiñaʼ o ratiica si nuu. Nabé racané tecnología binni guiziidiʼ. Ne cadi nagana guicaa binni información ni caquiiñeʼ sin guiree de ra lidxi o sin guiasa de ra zuba.
Peru ca binni ni nabé riquiiñeʼ tecnología zanda gápacaʼ guendanagana casi ca ni chiguzéʼtenu riʼ:
Raca nagana para laacaʼ gaca concentrarcaʼ ora cayuundacaʼ.
Raca nagana para laacaʼ gaca concentrarcaʼ ora cayúnicaʼ ti cosa.
Nagueenda raca aburrircaʼ ora nuucaʼ stúbicaʼ.
NI NAQUIIÑEʼ GÁNNALUʼ
ORA CAYUUNDACAʼ
Stale binni ruundaʼ ti luguiáʼ si lugar de niníʼ iquenecaʼ ni cayuundacaʼ.
Nuu biaje galán guʼndaʼ binni ti luguiáʼ si para guidxela ti respuesta. Peru qué racaneni laacaʼ gánnacaʼ jma de ni cayuundacaʼ.
GUNÍʼ IQUE NDIʼ: ¿Ñee raca nagana para lii gúʼndaluʼ textu xiroobaʼ la? ¿Xiñee rábiluʼ zabeenduluʼ ni galán pa gúniluʼ stipa gúʼndaluʼ textu xiroobaʼ para guiziidiluʼ? (PROVERBIOS 18:15).
GACA CONCENTRARCAʼ
Nuu binni riníʼ ique zanda gacané tecnología laacaʼ gúnicaʼ chupa cosa juntu casi guseendacaʼ mensaje ra nuu ca xhamígucaʼ ne guni estudiarcaʼ. Peru pa qué gaca concentrarnu lu xiixa cosa ni cayúninu, nin tobi de laacani qué zúninu biaʼsi.
Para gaca concentrar tuuxa la? caquiiñeʼ gucueeza laca laa ne nabé risaca gúnini. Ti baʼdudxaapaʼ láʼ Grace guníʼ: «Maʼ bidieeʼ cuenta ora racaʼ concentrar lu ni cayuneʼ la? qué ricá iqueʼ guneʼ stale cosa juntu, huaxiéʼ rucheeʼ ne qué racaʼ estresar».
GUNÍʼ IQUE NDIʼ: Ora racaláʼdxiluʼ gúniluʼ stale cosa, ¿ñee raca nagana para lii guiéneluʼ ne guietenaláʼdxiluʼ ni cayuni estudiarluʼ la? (PROVERBIOS 17:24).
ORA NUUCAʼ STÚBICAʼ
Nuu binni qué riuulaʼdxiʼ chuʼ stubi. Nga runi riquiiñecaʼ tecnología para cadi guni sentircaʼ nuucaʼ stúbicaʼ. Ti gunaa láʼ Olivia guníʼ: «Qué randa riuaaʼ 15 minutu sin guuyaʼ teléfono ne tablet stinneʼ, o sin gucaaguiéʼ televisión. Runeʼ ni purtiʼ racaʼ aburrir».
Peru de guiranu, cásica joven zaqueca ca ni huaniisi, caquiiñenu chuʼnu stúbinu ne guiníʼ íquenu ni cadúʼndanu. Pa gúninu ni bizéʼtenu riʼ, zacaneni laanu guizíʼdinu.
GUNÍʼ IQUE NDIʼ: Ora nuuluʼ stúbiluʼ, ¿ñee ribeeluʼ tiempu para guiníʼ íqueluʼ la? (1 TIMOTEO 4:15).
NI ZANDA GÚNILUʼ
GUNÍʼ IQUE XIMODO RIQUIIÑELUʼ TECNOLOGÍA
¿Ximodo zanda gacané tecnología lii guiziidiluʼ? Ne ora maʼ cayaca concentrarluʼ para guiziidiluʼ, ¿ximodo zanda guninani lii?
CONSEJU ZEEDA LU BIBLIA: «Gupa xquendabiaaniluʼ ne modo riníʼ íqueluʼ» (PROVERBIOS 3:21).