Historia 1

Ra bizulú Dios bizáʼ guiráʼ ni nuu

GUIRÁʼ ni galán zeeda de Dios. Laabe bizaʼbe Gubidxa para guzaaniʼ laanu ridxíʼ, Elabeeu ne ca beleguí (estrella) ca para guzaaniʼ laanu huaxhinni. Ne bizaʼbe Guidxilayú para guibáninu lu.

Peru Gubidxa, Elabeeu, ca beleguí ca ne Guidxilayú la? cadi ca nga diʼ nga ni bizáʼ Dios primé. Nannuʼ xi bizaʼbe primé la? Bizaʼbe binni casi laabe. Ca binni riʼ la? qué zanda diʼ guidúʼyanu laacabe cásica qué zanda guidúʼyanu Dios. Biblia ribee lá ca binni riʼ ángel. Dios bizáʼ ca ángel riʼ para guibaninécabe laabe guibáʼ.

Primé ángel ni bizáʼ Dios nabé risaca stale. Gúcabe primé Xiiñiʼ Dios, ne bíʼnibe dxiiñaʼ ne Bixhózebe. Gucanebe Dios guni guiráʼ xixé ni nuu. Gucanebe guca Gubidxa, Elabeeu, ca beleguí ca ne Guidxilayú stinu riʼ.

Ximodo naca Guidxilayú riʼ dxiqué yaʼ. Primé la? guirutiʼ nibani lu Guidxilayú riʼ, nisi ti nisadóʼ nuchii guidubi naca luni. Peru Dios gucalaʼdxiʼ guibani binni lu Guidxilayú riʼ. Ngue runi bizulube binichaahuibeni para laanu. Xi bíʼnibe yaʼ.

Buenu, primé la? Guidxilayú riʼ biquiiñeʼ ni biaaniʼ. Ngue runi Dios biʼniʼ de que biaaniʼ stiʼ Gubidxa ca guzaaniʼ lu Guidxilayú. Bíʼnibe ni ti ganda chuʼ ridxíʼ ne huaxhinni. De raqué la? bíʼnibe de que nisadóʼ ca guiaanani xagueteʼ guidxilayú.

Primé la? gastiʼ nuu lu guidxilayú. Biluíʼ ni casi ruuyuʼ lu dibuju riʼ, gastiʼ guieʼ nin yaga nin maniʼ. Nin benda gastiʼ ndaaniʼ nisadóʼ ca. Nabé gupa Dios stale dxiiñaʼ guni para ganda guibani ca maniʼ ca ne ca binni ca galán lu Guidxilayú riʼ.

Jeremías 10:12; Colosenses 1:15-17; Génesis 1:1-10.