Historia 12
Binni cucuí ti yoo soo
GUDIʼDIʼ stale iza, ca xiiñiʼ Noé gúpacaʼ stale xiiñicaʼ. Ne ca xiiñicabe riʼ la? biniisicaʼ ne gúpacaʼ jma xiiñicaʼ, qué nindaa diʼ guyuu stale binni lu Guidxilayú.
Tobi de ca binni riʼ nga ti xiiñiʼ xhiaga Noé ni biree lá Nemrod. Laabe gúcabe malu purtiʼ gunaazebe ne biitibe maniʼ ne binni. Nemrod laaca biʼniʼ laa rey ti guni mandar xcaadxi binni. Dios la? qué ñuuláʼdxidibe Nemrod.
Guiráʼ binni de dxiqué guniʼcaʼ ti diidxaʼ si. Nemrod gucalaʼdxiʼ ñapa laacabe tobi si para guni mandar laacabe. Pur nga, nannuʼ xi bíʼnibe la? Gúdxibe laacaʼ gúnicaʼ ti guidxi ne ti yoo soo ndaaniʼ ni. Lu dibuju riʼ ruuyuʼ laacabe cayúnicabe ladríu.
Jiobá Dios qué ñuuláʼdxidibe yoo soo que. Laabe gucaláʼdxibe niree binni de raqué ne nibani lu guidubi Guidxilayú. Peru laacabe guníʼcabe: ¡Chuu! Gúninu ti guidxi ne ti yoo soo dede gucaa ique ni guibáʼ. ¡Zacá huaxa zacabiáʼ binni tuu nga laanu! Biyúbicabe guendanaróʼ stícabe ne cadi para Dios diʼ.
Pur nga runi, Dios bicueeza ca binni que de gucuicaʼ yoo soo que. Ñee nannuʼ ximodo bíʼnibe ni la? Málasi bisiniʼbe ca binni que gadxé gadxé diidxaʼ. Maʼ qué ñanda ñene saacaʼ laacaʼ, pur nga runi guidxi sticaʼ biree lani Babel, o Babilonia, ni riníʼ «Guendaruchenda».
Yanna guiráʼ binni que bireecaʼ de Babel. Ca binni ni riniʼcaʼ ti diidxaʼ si la? gúcacaʼ tobi si ne yendézacaʼ gadxé gadxé ladu de Guidxilayú.