Historia 24

José ruuyaʼ pa maʼ bichaa ca biʼchiʼ

JOSÉ nuu ganna pa máluruʼ ca chii biʼchiʼ huaniisi que. Nga runi rábibe laacaʼ: Laatu zeeda gundaachitu. Zeeda guuyatu ximodo nuu xquídxidu.

Coʼ, cadi nga diʼ zeeda gúnidu, nácabe. Hombre chaʼhuiʼ laadu, guiradu bíchidu. Dócedu peru tobi maʼ qué guinni ne laadu ne ni jma nahuiiniʼ que biaanané bixhózedu yoo.

José rúnisi de que qué guni cré diʼ laacabe, runi mandarbe guiaana bíʼchicabe ni láʼ Simeón que ndaaniʼ lidxi guiibaʼ ne rudiibe lugar stuudxi que chinecaʼ guendaró ralídxicaʼ. Peru rábibe laacaʼ: Ora guibiguétatu la? nápatu xidé guedanetu bíʼchitu ni jma nahuiiniʼ que.

Ora bibiguétacabe ralídxicabe Canaán la? gúdxicabe bixhózecabe Jacob guiráʼ ni guca. Jacob guizáʼ riuu triste, ruunabe ne nabe: José maʼ qué guinni, ne yanna Simeón laaca maʼ qué guinni. Qué zudiediaʼ lugar chinetu Benjamín, xiiñeʼ ni jma nahuiiniʼ riʼ. Peru dxi maʼ cará guendaró stícabe la? Jacob rudii lugar chinécabe Benjamín Egipto ti ganda guedanécabe jma guendaró.

Ora biiyaʼ José zeeda ca biʼchiʼ la? riéchebe stale ora ruuyabe Benjamín bíʼchibe ni jma nahuiiniʼ. Peru nin tobi de laacabe que ganna pa hombre risaca riʼ nga José. Yanna José runi xiixa ti guuyaʼ pa maʼ bichaa ca biʼchiʼ.

Rábibe ca mozo stibe guchacaʼ guendaró ndaaniʼ ca sacu stícabe. Peru sin gánnacabe, laaca rábibe ca mozo stibe uguucaʼ copa de plata ni jma riuláʼdxibe ndaaniʼ sacu stiʼ Benjamín. Guzásicabe zitu la? José biseenda ca mozo stiʼ chinanda laacabe. Ora bigaanda ca mozo que laacabe la? rábicaʼ laacabe: Xiñee guláʼnatu copa de plata stiʼ xpixuaanadu pue.

Qué nibánadidu copa stibe na ca bíʼchibe. Peru, pa guidxélatu de que tobi de laadu ucuaani la? laguuti laa.

Nga runi ca mozo que ruyúbicaʼ ndaaniʼ guiráʼ sacu que ne bidxélacabe copa que ndaaniʼ sacu stiʼ Benjamín, cásipeʼ modo ruuyuʼ lu dibuju riʼ. Para na ca mozo que: Stuudxi ca zanda checaʼ peru Benjamín nápadu xi chinedu laa. Yanna xi guni guiráʼ bíʼchicabe yaʼ.

Guirácabe bibiguetanécabe Benjamín ralidxi José. Para na José rabi ca biʼchiʼ: Guiratu zanda chibiitu ralídxitu, peru Benjamín napa xidé guiaana raríʼ casi esclavu stinneʼ.

Óraque Judá rabi laabe: Pa naa guibiguetaʼ sin hombrehuiiniʼ ca la? bixhozeʼ zati, purtiʼ guizáʼ nadxii laabe. Nga runi, xiñee que guiaanaʼ casi esclavu stiluʼ ne gudiiluʼ lugar chebe.

Zacá ruuyaʼ José maʼ bichaa ca biʼchiʼ. Maʼ cadi malu diʼ laacabe. Guidúʼyanu xi runi José yanna.

Génesis 42:9-38; 43:1-34; 44:1-34.